याकब 2

भेदभाब करनअ हआ पाप

1हे मेरै भाई-बैहणीओ, तम्हैं करा प्रतप्पा आल़ै प्रभू ईशू मसीहा दी विश्वास तै निं थारै मन्‍नैं होरी लै पक्षपात लोल़ी हुअ।1

2थारी सभा दी ज़ै कुंण मणछ सुन्‍नें मुंदल़ी बान्हीं अर नऊंऐं झिकल़ै बान्हीं दी एछे अर कुंण गरीब मणछ बी पराणैं झिकल़ै बान्हीं थारी सभा दी एछे, 3अर तम्हैं बोले तेऊ नऊंऐं झिकल़ै आल़ै लै खास्सअ अदर करी, “तूह बेश इधी राम्बल़ी ज़ैगा अर तेऊ गरीबा लै बोले इहअ कि तूह रह इधी खल़्हुई, या इधी बेश बोरी प्रैंदै।” 4तै इहअ करै कै तम्हैं आप्पू मांझ़ै भेदभाब निं किअ? कि तम्हैं बूरी सोठ डाही नसाफ करनै आल़ै निं हुऐ?

5मेरै पैरै भाईओ, शूणां परमेशरै कै एऊ संसारे गरीब निं छ़ांटै कि तिंयां बी विश्वासा दी सेठ बणें? अर तिंयां बी स्वर्ग राज़े हकदार होए ज़ेता दैणें करार प्रभू तिन्‍नां लै आसा किई दी ज़ुंण तेऊ संघै झ़ूरी करा? 6पर तम्हैं किई तेऊ गरीबे बेइज़ती, ईंयां सेठ लोग कै तम्हां लै उपद्रभ निं करदै? तिंयां ई निंयां ज़ोरा-ज़ोरी दालता लै घिशी तल़िंगी ताकि तम्हां सज़ा होए? 7तिंयां कै तेऊ प्रभू ईशूए महान नाओंए निंदा निं करदै ज़सरै तम्हैं आसा?

8तैबी ज़ै तूह पबित्र शास्त्रे साबै तेऊ राज़ बधाना पूरअ करे, “तूह कर आपणैं साथी-संघी संघै एही झ़ूरी ज़िहअ तूह आप्पू लै झ़ूरा।” ज़ै तूह बधाने एऊ बैणा इहअ मना तै करा तूह ठीक।2

9पर ज़ै तम्हैं भेदभाब करे, तै करा तम्हैं पाप, अर बधाने साबै बी आसा तम्हैं दोशी।3

10किल्हैकि, ज़ै तम्हैं बधाने सोभी गल्‍ला मने बी पर कहा एकी गल्‍ला दी गलती करे, तै आसा सह बधाने साबै सोभी गल्‍ला दी दोशी। 11तैही ज़ुंणी इहअ बोलअ, “तूह निं कंज़री गल्‍ला करी,” अर तेऊ ई बोलअ इहअ बी, “तूह निं हत्या करी।” एते तैणीं कि तूह निं किधी कंझ़रूअ आथी पर हत्या किई, तैबी हुअ तूह बधाने साबै दोशी।4

12तम्हैं करा तिन्‍नां मणछा ज़ेही झींण करी गल्‍ला अर काम, ज़सरअ नसाफ आज़ादी दैणैं आल़ै बधाना करै हणअ। 13होरी माफ करनै आल़ै निं परमेशरा बी माफ करनै। पर परमेशर आसा झणैल़ू! सह करा म्हारअ नसाफ, तेता का ज़ादअ करा सह हाम्हां माफ!

विश्वास अर कर्म

14हे मेरै भाई-बैहणीओ, ज़ै कुंण इहअ बोला कि मुंह आसा मसीहा दी विश्वास पर होरी लै भलै काम निं करदअ, तेतो निं किछ़ै फाईदअ! इहअ विश्वास निं कधि उद्धार करी सकदअ। 15ज़ै कुंण विश्वासी भाई या बैहण नांगै बल़िंगै होए, अर तिन्‍नां का बैल़ी-क्लारी खाणां लै नांईं होए, 16अर तम्हां मांझ़ै कुंण इहअ बोले कि शांती दी डेओआ, अर नैत्तै-तात्तै रहा अर रज्ज़ी खाआ-पिआ! पर ज़ुंण च़िज़ा देही लै ज़रूरी आसा अर तिन्‍नां नांईं दैए, तै किज़ै फाईदअ हुअ?

17तिहअ ई ज़ै विश्वास करनै आल़अ भलै काम नांईं करदअ ता, तै आसा तेऊओ विश्वास मूंअ द।

18कई सका इहअ बोली, “तूह करा विश्वास, पर हुंह करा तेते साबै भलै काम।” पर हुंह बोला तम्हां लै इहअ, “तम्हैं आपणअ विश्वास किहअ करै सका रहैऊई ज़ै कि तम्हैं भलै काम; करदै निं? पर मुंह रहैऊंणअ तम्हां का भलै काम करी आपणअ विश्वास।”

19ज़ै थारअ इहअ विश्वास आसा कि परमेशर आसा एक्‍कै ई, ठीक बोलअ तम्हैं! भूत बी करा विश्वास अर तिन्‍नां बी लागा परमेशरे डरै काम्मणीं। 20पर ओ ऐडै मणछा, ताखा कै इहअ बी थोघै निं आथी कि भलै काम किऐ बाझ़ी आसा विश्वास बृथा?

21ज़धू म्हारै दाद-बाब आबरामै आपणअ शोहरू इसहाक बेदी दी बल़ी करना लै डाहअ, सह कै तेऊ भलै काम करी निं बणअ धर्मीं?5

22तंऐं हेरअ भाल़ी कि तेऊ किअ विश्वास अर तेऊ ई साबै भलै काम बी किअ अर भलै काम करी हुअ तेऊओ विश्वास पाक्‍कअ। 23पबित्र शास्त्रो अह बैण हुअ पूरअ, “आबरामै किअ परमेशरा दी विश्वास अर तेऊ शूणअ तिहअ ज़िहअ तेऊ बोलअ अर अह गणअ तेऊ लै धर्म इधी तैणीं कि तेऊ लै बोलअ परमेशरो साथी।”6 24तै हेरी तम्हैं अह गल्‍ल भाल़ी कि मणछ निं सिधअ विश्वास करी धर्मीं हंदअ पर तेऊ लागा भलै काम बी करनै।

25एही ई राहाब कंज़री बी, ज़धू तैहा गुप्त दूता लै आपणैं घअरै आसरअ दैनअ अर कहा होरी बाता बाती काढै तिंयां बागै, तेसे तेऊ भलै कामां करनै करै मनी सह धर्मीं।7

26ज़ेही देही शाह बाझ़ी मूंईं दी आसा, तिहअ ई आसा विश्वास बी भलै कामां बाझ़ी मूंअ द।