Kulvi Outer Seraji Bible
होशे 8
इज़राईले मुहुर्ती पूज़ा पाप
बिधाता बोला इहअ, “चतैनगी दैणा लै बाज़ा नर्शिंगै! दुशमण पल़ै मुक्षरलै ज़िहै उटअ डैअ दैई मेरी ज़ैगा लै चुटी! मेरी परज़ा पाई मुंह संघै मेरी करार चोल़ी, तिन्नैं किअ मेरै बधाना लै द्रोह। तज़ी बी मांगणी तिन्नां मुंह परमेशरा का मज़त, तिन्नां बोल़णअ इहअ, ‘हाम्हैं इज़राईली ज़ाणा ताह कि तूह आसा म्हारअ परमेशर।’ पर इज़राईली निं भलअ करदै ई आथी! तैही पल़ै तिन्नें दुशमण तिन्नां पिछ़ू।
“मेरी परज़ा छ़ांटा आप्पू लै आपणीं मरज़ीए राज़ै, तेता लै निं तिंयां मुंह पुछ़दै आथी। तिंयां छ़ांटा आप्पू प्रैंदै सैणैं पर मेरी ज़ाज़त निं तिंयां तेता लै लंदै। तिंयां बणाआं आपणैं सुन्नैं-च़ंदी करै आप्पू लै मुहुर्ती ज़ेता करै तिन्नों आपणअ बनाश हआ। सामरी नगरीए लोगे सुन्नें बाछ़ूए पूज़ा करनै का आसा मुंह नफरत। मुंह आसा तिन्नां लै खास्सी रोश्शै आई दी। इहअ कधू हणअ कि तिंयां किछ़ै कशूर निं करे। इज़राईली कारीगीर बणाआं मुहुर्ती, पर तिंयां निं परमेशर आथी ई! सामरी नगरी सुन्नें बाछ़ूए हणैं ठोर-ठोर। इज़राईली परज़ा डाही बागरी बऊई। ढिश-डुआल़अ हणीं तिन्नें फसल ज़ुंण तिन्नां झाल़णीं! तिन्नें साल-फसल हणीं पोल्ली, तेथ निं किछ़ नाज़ निखल़णअ अर नां तेता का पिठअ हणअ। ज़ै तेथ धख नाज़ लागे बी, सह पाणअ परदेसी लोगा आप्पू लै। इज़राईल देश हणअ होरी देशा जैंदरी बाख खतम। सह हणअ फुटै दै गाडल़ू ज़िहअ बृथा। इज़राईली सैणैं आसा बरेल़्हुऐ दै बणें गाधै ज़िहै ज़हा ओर्ही अर पोर्ही ठुर्हा हआ लागी दी। तिंयां डेऊऐ अश्शूरी सेटा मज़त मांगदै। एप्रैमी लोगै मांगी ढब्बै दैई आपणैं अश्शूरी लोभी का मज़त! पर ऐबै लाऐ मंऐं तिंयां झाल़ी करै कठा करी संघा दैणीं मुंह तिन्नां लै सज़ा। ऐबै जाणीं तिन्नां छ़ेक्कै दाहे झोशा उझ़ुई ज़ांऊं तिंयां अश्शूर देशे राज़ै तिन्नें बूरी दशा करनी।
“एप्रैमी लोगै आसा बेदी बणाईं दी ज़ेथ पाप दूर करना लै पाप बल़ीदान करे, पर तिंयां बेदी हुई एही ज़ैगा ज़ेथ लोग होर बी खास्सअ पाप करा। मंऐं खोज़अ खास्सी शिक्षा दैई मेरी परज़ा का मेरअ बधान, पर तिन्नैं समझ़ी तिंयां गल्ला पराई। तिंयां करा मुल्है बल़ीदान अर तेता का शिखा बी खाआ। पर हुंह बिधाता निं तिन्नें बल़ीदाना करै खुश हंदअ। ऐबै करनै मुंह तिन्नें पाप आद संघा दैणीं मुंह तेता पिछ़ू तिन्नां लै सज़ा। तिन्नां लागणअ मिसर देशा लै बापस डेऊणअ।
“मेरी इज़राईली परज़ा बणाऐं ज़ैगै-ज़ैगै मैहल, पर हुंह बिस्सरअ तिन्नैं पठी ज़ुंणीं तिंयां बणाऐं। यहूदा मुल्खे परज़ा बणाईं कई गहल़ा आल़ी नगरी, पर मुंह छ़ाडणीं आग अर तैहा करनै तिन्नें तिंयां नगरी अर मैहल पठी बरैबाद।”
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.