Kulvi Outer Seraji Bible
होशे 6
लोगा करनअ पछ़ताअ करनैओ दखाअ
लोगा बोल़णअ इहअ, “होलो! बिधाते च़ाकरी करदै च़ाल्ला बापस। अह आसा सह ई ज़ुंणीं हाम्हैं धेल़ै-च़िरै! ऐबै नरोगै बी करनै हाम्हैं तेऊ ई, ईंयां ज़खम पाऐ हाम्हां लै तेऊ ई अर एथ मल्हम बी लाणअ तेऊ ई। तेऊ करनै हाम्हैं छ़ेक्कै ताज़ै-नरोगै, चिऊथै धैल़ै करनै तेऊ हाम्हैं भिई ज़िऊंदै। तेखअ सका हाम्हैं तेऊ संघै रही। हाम्हां हुई बिधाते बारै थोघ करना लै मैन्थ करनी कि सह कुंण आसा। सह हणअ हाम्हां लै दोत्ती सुरज़ा ज़िहअ ज़रूर प्रगट। सह एछणअ हाम्हां प्रैंदै भराल़ै बरशणैं आल़ै सरगे पाणीं ज़िहअ ज़ेता करै धरनीं साल-फसला लै राम्बल़ी बाच पल़ा।”
पर बिधाता बोला इहअ, “एप्रैम अर यहूदा मुल्खे लोगो, मुंह गई तम्हां लै किज़ै करूं? थारअ मुल्है झ़ूरनअ लुक्का दोत्ती धूँईं ज़िहअ झ़ट च़ारै! सह मुक्का दोत्ती ओशा ज़िहअ हेरा-हेरी! तैही रहअ आपणैं गूरा बाती तम्हां लै इहअ समाद दैंदअ लागी कि मुंह करनअ थारअ नसाफ अर तम्हैं लाऐ मंऐं खतम करी। मेरअ नसाफ एछणअ दोत्ती धुप्पै ज़िहअ। हुंह निं थारै डागै-चैणैंओ बल़ीदान च़ाहंदअ, हुंह च़ाहा इहअ कि तम्हैं तत्त दिला का मुल्है झ़ूरे। थारै हूम बल़ीदाना का खास्सअ च़ाहा हुंह इहअ कि तम्हैं मुंह परमेशरे बारै समझ़ डाहे।1
“पर तम्हैं चोल़ी मेरी करार आदमा ज़ेही। तम्हैं निं मेरी च़ाकरी करना लै शुचै-पाक्कै रहै। तम्हैं गलाद नगरी बस्सै दै लोग आसा हत्या करनै आल़ै कदुष्ट। तम्हैं प्रोहत आसा डाकूओ छ़ुंढ ज़ुंण लुक्की करै होरी लुटणें ताका हआ बेठै दै। शकेम नगरी डेऊणे बाता करा तम्हैं लोगे हत्या। ज़ुंण तम्हैं ज़ुल्म करा, सह आसा माहा पाप। मुखा शुझुअ कि इज़राईल देश आसा बेघै च़िल़्हखरै कामां करदअ लागदअ। एप्रैम आसा कंज़री बेटल़ी ज़िहअ ज़ुंण होरी मर्धा लै आपणीं देही बेच़ा। हाँ, इज़राईली लोग हुऐ पठ छ़ोतलै।
“यहूदे लोगो, तम्हां लै बी दैणीं मुंह इज़राईली ज़ेही सज़ा, तेता लै आसा मंऐं धैल़ी काढी डाही दी। पर हुंह च़ाहा मेरी परज़ा बापस आणनअ।
Source notes (1)
- Cross-reference मोत्त. 9:13; 12:7
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.