होशे 3

होशे अर विश्वास घाती बेटल़ी

1बिधाता बोलअ मुल्है, “तूह डेऊ भिई आपणीं बेटल़ी सेटा लै, संघा झ़ूर तैहा लै खास्सअ ज़ुंण आपणैं लोभी संघै आसा कंज़रैई करदी लागी दी। तूह झ़ूरै तैहा लै तिहअ ई ज़िहअ हुंह अज़ी बी इज़राईली परज़ा लै झ़ूरा। एही ता आसा तिंयां मुंह बिधाता छ़ाडी होरी देअआ पूज़दै लागै दै अर तिंयां झ़ूरा मुहुर्ती सेटा छ़ाडी दी दाखे टिक्‍की लै, पर तज़ी बी झ़ूरा हुंह बिधाता तिन्‍नां।”

2तेखअ लई मंऐं सह बेटल़ी पंद्रा च़ंदीए फाल़ी1 अर डेढ कुंटल़ ज़ौ दैई मोलै। 3मंऐं डाहअ तैहा लै बोली, “ऐबै रहै तूह इधी मुंह संघै खास्सै धैल़ै मेरै घअरै। ऐबै निं कंज़रैई करी नां होरी मर्धा संघै सुत्ती आथी। मुंह बी निं खास्सै धैल़ै तैणीं ताह संघै सुत्तणअ आथी। 4इहै ई रहणैं इज़राईली बी खास्सै धैल़ै तैणीं बाझ़ी राज़ै अर नां तिन्‍नां प्रैंदै कुंण सैणअ हणअ। तिन्‍नां धैल़ै निं तिन्‍नां बल़ीदान करनअ, नां तिन्‍नां का पूज़णा लै डौंड हणैं नां च़ोल़ै अर नां तिन्‍नां का मुहुर्ती हणीं। 5ज़ांऊं ईंयां धैल़ै निभणैं, तेखअ फिरनैं इज़राईली भिई बिधाता बाखा लै ज़ुंण तिन्‍नों परमेशर आसा। तेखअ करनी तिन्‍नां आपणैं तेऊ राज़ेए च़ाकरी ज़ुंण राज़ै दाबेदे आद-लुआदा का हणअ। तेखअ रहणअ तिन्‍नां बिधाते डरा हेठै अर तिन्‍नां भेटणीं तेऊ का बर्गत।”