Kulvi Outer Seraji Bible
एस्तेर 6
राज़ै किअ मुर्दकाईओ अदर
तधू बैल़ी निं राज़ै नींज ई पल़ी, तेऊ शदाऊई इतिहासे कताब संघा बझ़ैल़ी तेऊ सह पहल़णैं। ज़ांऊं राज़े दासै सह भाग पहल़अ कि राज़ेए दूई गुंझी बिगताना अर तेरेश ज़ुंण राज़ेए दरवाण थिऐ, तिन्नैं किई ती राज़ै क्षयर्ष मारने सांठ-गांठ अर तिन्नों सह भेद खोल्हअ त मुर्दकाई। राज़ै पुछ़अ तेता लै, “मुर्दकाईए एऊ कामां लै हाम्हैं तेऊ लै किज़ै नांम आसा दैनी दी।”
राज़ेए तेऊ दासै दैनअ ज़बाब, “एते बदल़ै निं तेऊ लै किछ़ बी आथी किअ द।”
राज़ै पुछ़अ, “एभै कार-करिंदै मांझ़ै कुंण मैहलै आसा?”
तेतरी गअ प्रधान मंत्री हमान मैहला भितरी ताटी पुजी, सह आअ त राज़ै सेटा इना गल्ला करदअ कि मुर्दकाई लै दैणीं तेथ फांसी ज़ुंण चेच तेऊ बणाईं त डाहअ द। राज़ेए तेऊ दासै दैनअ ज़बाब, “बागा बाखा ताटी आसा हमान खल़्हुअ द।”
राज़ै बोलअ, “ओर्ही शाद एऊ भितरा लै।”
हमान आअ भितरा लै अर राज़ै हेरअ नढैऊऐ तेऊ लै इहअ बोली, “हुंह च़ाहा एकी मणछो खास्सअ अदर करनअ, तेऊ मणछा लै हुंह किज़ै करूं कि तेऊओ खास्सअ अदर होए?”
हमानै सोठअ, “राज़अ च़ाहा मेरअ अदर करनअ, मुखा सुआई होर कुंण सका हई? ज़ाथी निं कोहै।”
तेऊ दैनअ राज़ै लै ज़बाब, “ज़सरअ तूह खास्सअ अदर करनअ च़ाहा, तेऊ मणछा लै आणअ राज़ैओ च़ोल़अ ज़ुंण तूह आप्पू बान्हां, राज़ैओ मुगट अर एक घोल़अ ज़ेथ तूह आप्पू शुंआर हआ।” तेखअ बझ़ैल़णअ सह च़ोल़अ तेरै सोभी का बडै बज़ीरा का बन्हैऊंणैं अर तेऊ घोल़ै प्रैंदै बशैल़ी नगरीए च़फै दी हांढ-फेर दैणैं। घोल़ै आजू-आजू हणअ सह बज़ीर ज़ोरै-ज़ोरै इहअ बोल्दअ लागअ द, “भाल़ा, भाल़ा, ज़सरअ राज़अ अदर करा, सह हआ इहअ!”
राज़ै बोलअ हमाना लै, “ऐबै डेऊ झ़ट-च़ारै संघा आण राज़ैओ सुआब अर घोल़अ एभी, तेता करै लाअ मंऐं यहूदी मुर्दकाईओ अदर करी। ज़िहअ-ज़िहअ तंऐं बोलअ तेता मांझ़ै निं एक गल्ल बी बिस्सरी आथी। ताह भेटणअ मुर्दकाई मैहले प्रऊल़ी बागै बेठअ द।”
हमानै आणअ राज़ैओ सुआब अर घोल़अ संघा बन्हैऊंअ राज़ैओ च़ोल़अ मुर्दकाई का संघा बशैल़अ सह राज़ेए घोल़ै प्रैंदै, हमान लागअ घोल़ै आजू-आजू ज़ोरै-ज़ोरै इहअ बोल्दी नगरीए च़फै दी हांढ-फेर दैंदअ, “भाल़ा, भाल़ा, ज़सरअ राज़अ अदर करा, सह हआ इहअ!”
तेता बाद डेऊअ मुर्दकाई राज़ेए मैहले प्रऊल़ी सेटा लै बापस फिरी अर हमान डेऊअ शर्मिंदअ हई झ़टपटै उटै मुंडै आपणैं घअरा लै। घअरै पुजी खोज़ी हमानै तिंयां गल्ला आपणीं लाल़ी अर आपणैं साथी का पठी कि इहअ-इहअ हुअ! तेखअ बोलअ तेऊए लाल़ी जेरेश अर तेऊए समझ़कार साथी इहअ, “तूह च़ाहा त मुर्दकाई खतम करनअ! सह आसा यहूदी, अर तूह निं तेऊओ मकाबलअ करी सकदअ, पर तूह हणअ तेऊ करै ज़रूर पठी बरैबाद।”
हमान पाअ मारी
तिंयां थिऐ गल्ला करदै ई लागै दै, राज़ेए गुंझी गऐ हमाना शाददै पुजी, संघा निंयं सह तेभी राणीं एस्तेरे बणाऐं दै भोज़ा खांदअ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.