Kulvi Outer Seraji Bible
एस्तेर 2
एस्तेर बणाईं माहा राणीं
बादा का ज़ांऊं क्षयर्ष राज़ैओ रोश्श फांभअ हुअ, सह लागअ तेखअ तेते बारै सोठदअ ज़ुंण राणीं बशती किअ अर तेता पिछ़ू ज़ुंण तेऊ हुकम ज़ारी किअ अर बधाना दी आजू लै लिखी डाहअ। तेखअ लागै राज़े खास सलाहकार इहअ बोल्दै, “माहा राज़अ, कुंआरी ज़ुआन-ज़ुआन शोहरी बझ़ैल़ लोल़णैं ज़ुंण हेरनी सोभी का बित्ती होए। एऊ कामां लै छ़ांट तूह कार-करिंदै मांझ़ै हर मुल्खा का ज़ुंण तिन्नां हेरनी शुणनी कुंआरी शोहरी राज़धानी शुआ गहल़ै पजैल़ी दैए। तिन्नां शोहरीए शुधी अर हार-शंगार करने ज़िम्मैंबारी दै हगाई गुंझी लै ज़हा का राज़ै आपणीं सोभी बेटल़ीओ अह काम सभाल़अ द आसा। तेखअ तिन्नां कुंआरी शोहरी मांझ़ै ज़ुंण बी ताह गम्मे, तैहा बणाऐं तूह राणीं बशतीए ज़ैगा माहा राणीं।”
क्षयर्ष राज़ै लागी सह सलाह बधिया अर तेऊ किअ तिहअ ई।
राज़धानी शुशन गहल़ै रहा त मुर्दकाई नाओं एक यहूदी मणछ तेऊए बाबा नाअं त याईर। सह थिअ बिन्यामीन गोत्रा का शिमीओ पोचअ अर किशो पल़पोचअ। ज़धू नबूकदनेसर राज़ै यहूदा मुल्खो राज़अ जकोनया अर खास्सै यहूदी राज़धानी एरुशलेम नगरी का कैद करी आप्पू संघै बाबेल देशा लै निंयैं, तिन्नां कैदी मांझ़ै थिअ मुर्दकाई बी। तेऊए ती एस्तेर नाओंए एक बैहण ज़ुंण तेऊए च़ाच़ूए शोहरी थिई, तेसो इब्रानी नाअं त हादास्सी, सह थिई हेरनी-भाल़णीं बेघै बित्ती अर कुंआरी शोहरी। तेसे ईज-बाब मरनै बाद ती सह मुर्दकाई आपणीं शोहरी ज़ेही धाची-पाल़ी दी।
ज़ांऊं क्षयर्ष राज़ै बित्ती-बित्ती कुंआरी शोहरी लोल़णैंओ हुकम ज़ारी किअ, हर ज़ैगा का पजैल़ी खास्सी कुंआरी शोहरी राज़धानी शुशन गहल़ै अर तिन्नां शोहरी मांझ़ै ती एस्तेर बी। सह बी सभाल़ी राज़े मैहलै हगाई गुंझी सेटा ज़हा का राज़े सोभै बेटल़ी ती सभाल़ी दी। हगाई गम्मी सोभी का खास्सी एस्तेर ई अर तेऊ निं बगत ज़ांऐं किअ अर तेऊ आणी तैहा लै हार-शंगार शुधी करने सोभ च़िज़ा, खास-खास खाण-पींण। तैहा संघै डाही छ़ांटी करै सात साथणीं अर सह अर तेसे साथणीं डाही मैहलै सोभी का बधिया ज़ैगा।
एस्तेरै निं कोही का खोज़अ आथी त कि सह आसा यहूदी! किल्हैकि मुर्दकाई ती सह समझ़ाऊई डाही दी कि इहअ निं कोही का खोज़ी कि सह आसा यहूदी। मुर्दकाई करा त धैल़ मैहलै आजू ताटी हेरअ-भाल़अ डेऊई कि एस्तेर केही आसा अर तैहा संघै किज़ै-किज़ै आसा लागअ द हंदअ।
एकी साला तैणीं रहअ तिन्नां शोहरीए शुधी हंदी लागी, छ़हा भिन्नैं तैणीं रहै तिन्नां गंधरस अर तेला करै छशदै लागी अर तेता आजू छ़हा भिन्नैं रहै तिन्नां दी कई खुशबूदार च़िज़ा मल़दै लागी। तेखअ निंईं तिन्नां मांझ़ै बारी-बारी एक-एक शोहरी क्षयर्ष राज़ै सेटा। ज़ांऊं तिन्नां शोहरी मांझ़ै कुंण मैहलै राज़ै सेटा डेओआ ती, तैहा लै दैआ तै ज़िहअ तेसो दिल बोलअ तिहअ बान्हणां लै। बैल़ी करा ती एक शोहरी राज़ै सेटा डेऊई अर दुजै धैल़ै दोत्ती दैआ तै तैहा शोहरी राज़े होरी डाही दी बेटल़ी रहणें ज़ैगा पजैल़ी। तिंयां बेटल़ी हआ ती शाशगाज गुंझी बज़ीरा का सभाल़ी दी। तेखअ निं सह शोहरी भिई राज़ै सेटा डेऊंदी आथी ती, हाँ ज़ै राज़ै सह गम्मे अर तेसो नाअं लई भिई शादे, तै डेओआ ती सह भिई राज़ै सेटा।
ऐबै आई ती एस्तेरे राज़ै सेटा डेऊणे बारी। एस्तेर थिई मुर्दकाईए च़ाच़ू अबिहेले शोहरी ज़ुंण मुर्दकाई आपणीं शोहरी मनी धाची ती। ज़ुंणी बी एस्तेर भाल़ी, तिन्नां लागा ती सह बधिया। ज़ांऊं एस्तेरे बारी आई तैहा किअ तिहअ ई हार शंगार ज़ुंण तैहा लै हगाई बोलअ कि तूह डेऊ एता बान्हीं। क्षयर्ष राज़ै ती राज़ करदी सातुई साल लागी दी अर तैहा साला पोशै पजैल़ी एस्तेर क्षयर्ष राज़े मैहलै। राज़ै गम्मी एस्तेर सोभी बेटल़ी का खास्सी, ज़ेतरी बी तेऊ सेटा लै कुंआरी शोहरी आणी, सह लोभणूंअ एस्तेरा लै तिन्नां सोभी का खास्सअ। तेऊ लाअ तेसे मुंडै मुगट संघा बणाईं सह राणीं बशतीए ज़ैगा माहा राणीं। तेखअ दैनी क्षयर्ष राज़ै आपणैं सोभी कार-करिंदै अर दरबारी लै एस्तेरे नाओंऐं बडी धाम। तैहा धैल़ी डाही सोभी मुल्खै कामां-काज़ा का छ़ुट्टी1 अर राज़ै किई सोभी लै कई किम्मती-किम्मती च़िज़ा भैंट।
मुर्दकाई बच़ाऊई राज़े ज़ान
ज़धू राज़ै लै कुंआरी शोहरी कठा किई, राज़ै त मुर्दकाई राज़ दरबारे प्रऊल़ी सेटा कामां डाहअ द। एस्तेरै निं अज़ी बी खोज़अ आथी त कि सह आसा यहूदी शोहरी किल्हैकि तैहा लै थिअ मुर्दकाई बोली डाहअ द कि इहअ निं खोज़ी अर सह बी मना ती ज़िहअ तेऊ बोलअ तिहअ ई, किल्हैकि सह थिई होछ़ी उझै तेऊ धाची-पाल़ी दी।
तिन्नां ई धैल़ै ज़धू मुर्दकाई राज़ दरबारे प्रऊल़ी सेटा कामां लागअ, राज़े दूई गुंझी थिऐ दरवाण बिगताना अर तेरेश। तिंयां थिऐ राज़ै का नराज़ अर तिंयां थिऐ क्षयर्ष राज़ै मारना लै ताखुऐ दै। मुर्दकाई का गअ इना गल्लो थोघ लागी अर तेऊ खोज़अ राणीं एस्तेरा का अर तैहा खोज़अ राज़ै का पठी गल्ला कि मुर्दकाई भाल़अ कि इहअ लाअ करी। ज़ांऊं इना गल्ले पुछ़-ज़ाच़ किई, तिंयां गल्ला निखल़ी तेही ई। राज़ै दैनी तिन्नां लै सज़ा अर तिंयां डाहै उछ़टै बूटे डाल़ै छ़ड़ाऊई। इना सोभी गल्ले बारै डाहअ राज़ै सम्हनै इतिहासे कताबा दी लिखी।
Source notes (1)
- Footnote छ़ुट्टी कारअ किअ माफ
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.