Kulvi Outer Seraji Bible
बधान 21
एही हत्या ज़ेतो थोघ निं लागे
मोसा बोलअ इज़राईली लै इहअ, “ज़ुंण देश थारै परमेशर बिधाता तम्हां लै दैणअ, ज़ै तेऊ देशै किधी तम्हां का ल्हास पल़ी दी शुझिए अर कोही का थोघ नांईं होए कि सह कुंणी मारअ, तेता लै भाल़ै तैहा नगरीए पांच़ अर सैणैं इहअ कि ज़िधी सह ल्हास आसा पल़ी दी, तैहा ज़ैगा का सोभी का नेल़ कुंण नगरी आसा। ज़ुंण नगरी सोभी का नेल़ होए, तेखअ छ़ांटै तैहा नगरीए सैणैं डागे हेल़्ही का एक छ़ुहाण ज़हा करै किछ़ै काम निं होए कराऊअ द। तेखअ डेओऐ तैहा नगरीए तिंयां पांच़, सैणैं अर लेबी मांझ़ा का प्रोहत तैहा छ़ुहाणा संघा निंईं तैहा ज़ैगा नेल़ ज़िधी बारा भिन्नैं पाणींए गाड बगदी रहा। पर तैहा सऊंई ज़ैगा निं कधि बऊअ-बचऊअ आथी। ज़ांऊं तिंयां तेऊ खागै पुजी जाए, तिधी पाऐ तिंयां सैणैं तैहा छ़ुहाणा काटी।
“प्रोहत लोल़ी तिधी संघा हुऐ, किल्हैकि थारै परमेशर बिधाता आसा तिंयां आपणैं खास दास बणाऐं दै ताकि तिंयां तेऊए पबित्र ज़ैगा च़ाकरी करे, तेऊए नाओंऐं लोगा लै बर्गत दैए अर लोगे मकदमैंओ फैंसलअ करे, सह च़ाऐ तिन्नां सेटा ज़ैदाते झ़गल़ैओ मकदमअ एछे या कूट-मार हणैंओ मकदमअ होए।
“नगरीए सैणैं डाहै तैहा ल्हासा नेल़ काटी दी तैहा छ़ुहाणा प्रैंदै हाथ संघा बोलै इहअ, ‘अह हत्या निं हाम्हां मांझ़ै कोही किई अर इहअ बी निं हाम्हां का थोघ आथी कि अह हत्या कुंणी किई। पर ए म्हारै परमेशर बिधाता, ज़ुंण अह नर्दोश मणछे हत्या हुई, एता लै आसा म्हारी ताखा एही अरज़, तूह मन्न हाम्हां बाखा एऊ बल़ीदाना अर हाम्हां इज़राईली कर माफ। हाम्हैं आसा तेरी आपणीं परज़ा अर हाम्हैं आसा तंऐं ई बच़ाऊऐ दै। ज़ीबाण, एऊ पापो दोश निं हाम्हां लोल़ी लागअ।’
“ज़ै तम्हैं इहअ करे, तै हेरनी बिधाता तम्हां इज़राईली लै माफी छ़ाडी।
जुधा दी ज़ै कुंण बेटल़ी कैद होए किई दी
“ज़ेभै बी थारअ परमेशर बिधाता जुधा दी ज़ीत दैए अर तम्हैं तिन्नां दुशमणा कैद करी आणे, ज़ै तिन्नां कैदी मांझ़ै एही बेटल़ी बी कैद होए ज़ुंण हेरनी बेघै बधिया होए अर तम्हां मांझ़ै लोभणूंअ होए कुंण तैहा संघै बैहा करना लै। तैहा आणै सोभी का आजी आपणैं घअरा लै। तेखअ लोल़ी तैहा आपणअ मूंड पठी छाम्बअ, आपणैं न्हश काटै अर आपणैं देशे रबाज़े साबै बान्हैं दै झिकल़ै पोर्ही खोल्ही लोल़ी तैहा इज़राईलीए रिती-रबाज़े साबै झिकल़ै बान्हैं। तेखअ दैऐ तैहा एकी भिन्नैं तैणीं आपणैं ईजा-बाबा लै शोग करनै अर तेभा बाद सका सह मणछ तैहा संघै बैह करी।
“तेखअ ज़ै सह बादा का नांईं गम्मे, तूह सका तैहा छ़ाडी दैई, तेखअ सह बेटल़ी ज़िधा लै डेऊणअ च़ाहे तैहा दैऐ डेऊणैं। पर तैहा संघै एतरअ रही-बस्सी करै निं सह मणछ तैहा गलामा ज़ेही कहा का ढब्बै मोल लई बेच़ी सकदअ अर नां तैहा बेटल़ी तेऊए आपणीं गलाम बणाणें ज़ाज़त आथी।
ज़ेठैओ हक
“ज़ै तम्हां मांझ़ै कुंणी दूई बेटल़ी होए आणी दी अर सह झ़ूरा होए कहा एकी लै खास्सअ अर सह हणीं तेऊए पैरी अर दुजी होए कपैरी। तेखअ ज़ै तिन्नां दुही बेटल़ीए शोहरू होए, ज़ेठै हणैंओ हक भेटणअ तेऊ ई शोहरू ज़ुंण पैहलै आसा हुअ द। सह च़ाऐ पैरी बेटल़ी का होए या कपैरी बेटल़ी का होए हुअ द। बादा का ज़ांऊं सह आपणैं सोभी शोहरू लै सारी ज़ैदात बांडी दैए, तेऊ लागणअ आपणैं ज़ेठै शोहरू लै दुगणअ हेस्सअ दैणअ ज़ुंण तेऊओ हक आसा।
नशूंण शोहरू
“ज़ै कहा ईजा-बाबो इहअ द्रोही अर नशूंण शोहरू होए कि सह निं आपणैं ईजा-बाबै गल्ला भिई-भिई नैरी समझ़ाऊई करै बी शुणदअ। तै निंयैं तेऊ शोहरू तेऊए ईज-बाब नगरीए प्रऊल़ी आजू नगरीए सैणैं सेटा संघा पाऐ तिधी पांच़ी। तेखअ खोज़ै तेऊ शोहरूए ईज-बाब तिन्नां सैणैं का एही गल्ला, ‘म्हारअ अह शोहरू हुअ हठू अर नशूंण, अह निस्सअ म्हारी एक बी शूणीं, अह हुअ द्रोही अर धैल़ हआ अह शूर-शराबा झुटदअ लागअ द।’
“तेखअ पाऐ नगरीए सोभ मर्ध तेऊ शोहरू पात्थरो ढो दैई मारी। ज़ांऊं होर इज़राईली इना गल्ला शुणें कि केही सज़ा भेटी, तै रहणीं तिन्नां बी डअर। इहअ करै हणीं तम्हां जैंदरा का एही बूराई खतम।
ज़ुल्म करनै आल़ै मणछे ल्हास
“ज़ै कहा दोशी लै मौते सज़ा होए दैनी दी, अर तेऊए ल्हास कहा बूटे डाल़ै च़ुंढदी होए डाही दी, तैहा ल्हासा निं राची तेही ई डाल़ै च़ुंढदी दैई रहणैं, तेता डाहै तम्हैं तैहा ई धैल़ी दाबी, किल्हैकि ज़ुल्म करनै आल़ै मणछे ल्हासा करै एछा तैहा ज़ैगा लै बिधातो फिटक। ताकि तैहा ज़ैगा छ़ोत नां लागे, ज़ुंण ज़ैगा थारै परमेशर बिधाता तम्हां लै आसा लाई दी दैई।”1
Source notes (1)
- Cross-reference गल. 3:13
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.