Kulvi Outer Seraji Bible
बधान 12
कनान देशै राज़ करना लै बधान
मोसा बोलअ इज़राईली लै, “इज़राईलीओ, ऐबै शूणां तम्हैं बिधातो बधान अर बिधी ज़ेते साबै तम्हां तेऊ देशै सारी ज़िन्दगी ज़िऊंणीं। ज़हा बिधाते च़ाकरी थारै दाद-बाब करा तै, तेऊ लाऐ तम्हैं ऐबै तैहा ज़ैगे मालक बणाईं। पर ज़ुंण ज़ाती तेऊ देशै आसा बस्सी दी, तिंयां करा होरी देअआ-देबीए पूज़ा। ज़ांऊं तम्हैं तिन्नां का जुध ज़िती करै तैहा ज़ैगा आप्पू लै गिम्मी हेरे, तम्हैं करै तिन्नें पूज़ा-गाज़ा करने ज़ैगा पठी खतम। ज़िधी बी तिन्नें देअए पूज़ा करने बेदी शुझिए, तिन्नां पाऐ ढोल़ी, तिन्नें पात्थरे ओडै ज़ेता तिंयां पूज़ा, तेता बी पाऐ फाल़ी, तिन्नां डौंडा बी पाऐ तम्हैं आगी जैंदरी दहई ज़िधी तिंयां अशेरा देबीए पूज़ा करा। तिन्नैं बणाईं दी मुहुर्ती फाल़ी करै ठोर-ठोर। तिन्नों करै नाअं-नशाण ई खतम कि तेऊ देशै कधू इहअ बी थिअ होए।1 तम्हैं निं तेऊ साबै आपणैं परमेशर बिधाता पूज़दै लागी, ज़ेही तिंयां आपणैं देअ-देबते पूज़ा करा।
“ऐबै जाणैं तम्हैं छ़ेक्कै जरदण नदी पार टपी अर तम्हां संघै हणअ बिधाता आप्पै अर तेखअ जाणैं तम्हैं आपणैं दुशमणा का ज़िती। संघा बस्सणै तम्हैं तैहा रज़दी-पज़दी ज़ैगा निहंचै ज़ुंण बिधाता तम्हां लै आसा दैई हेरी दी। पर ज़ेभै तम्हैं तिधी बस्सी जाए, तिधी हणअ थारअ रहणअ-बस्सणअ होरी साबै। तम्हैं निं हेरे आपणीं मरज़ी दी कज़िधल़ी बल़ीदान करदै लागी! पर ज़िधी बी तम्हां इज़राईली जैंदरी बिधाता आप्पू लै खास ज़ैगा छ़ांटे, तम्हैं डेओऐ तिधा लै संघा करै आपणैं परमेशर बिधाते च़ाकरी। आपणैं बल़ीदान अर भैंटा बी पजैल़ै तिधी, च़ाऐ सह बिधाता खुश करना लै हूम बल़ी होए, च़ाऐ तम्हैं मानत या आपणीं खुशी दी बिधाता लै बांधअ होए डाहअ द। आपणीं पज़ैआ मांझ़ै नाज़, दाखो रस, तेल अर आपणीं कमाईओ दसुअ निसब बी पजैल़ै तिधी। आपणैं डागै-चैणें हेल़्ही का पैहलै सोए बाछ़ू, गाभू, छ़ेल्हू बी आणै तम्हैं तैहा खास ज़ैगा लै। तम्हैं खाऐ थारै टबर अर नोकर-च़ाकरा संघी थारी भैंट अर बल़ीदानो शकन तिधी बिधाते तैहा पबित्र ज़ैगा। संघा मनाऊंऐं तिधी बिधाता लै थैर। किल्हैकि बिधाता किऐ तम्हैं थारै सोभी कामां लै सफल। एतो बी डाहै धैन कि लेबी गोत्रा लै निं ज़िम्मीं-ज़ैगा किछ़ै हेस्सअ आथी दैनअ द, तम्हैं करै ज़रूर तिन्नां मांझ़ै बी आप्पू संघै साज़ै-बेज़ै मनाऊंणा लै शादी।2
“केभै सका तम्हैं बल़ीदाना का लाऊआ आपणैं घअरै शिखा खाणां लै रिठ-बाकरै काटी। ज़ै बिधाता तम्हां लै एही बर्गत दैनी होए कि तम्हां का हुऐ खास्सै डागै-चैणैं, तै सका तम्हैं तिन्नां मांझ़ै तिधी आपणैं घअरै आप्पू शिखा खाणां लै काटी ज़िधी तम्हैं रहा। ज़ै तम्हैं हरन अर घोर्हल़ो शकार करे, तेते शिखा बी सका तम्हैं खाई। एही शिखा सका तिंयां मणछ बी खाई ज़ुंण छ़ोतलै अर बिधाते स्तोती लै शुचै नांईं बी होए। पर तम्हैं डाहै धैन हेरे तम्हैं निं कोही बी पशूओ लोहू खाई! तेता दैऐ पठी धरनीं पोर्ही पोछणै।
“बिधाता आसा इहअ बोलअ द कि तेऊ दैणीं बादा का इज़राईली लै होर बी खास्सी ज़ैगा। तिहअ करै हणीं तेऊ देशे सिअं दूर-दूर तैणीं अर तम्हां मांझ़ै निं तेतरै दूरा का हर बगत बिधाते पबित्र ज़ैगा शिखा खांदै पुजी सकदै। पर बिधाता दैणीं तम्हां लै एही बर्गत कि थारै हणीं खास्सै डागै-चैणें हेल़्ही, तेखअ ज़ै थारअ ज़िऊ शिखा खाणां लै बोले, तम्हैं सका तिन्नां मांझ़ा का आपणैं घअरै काटी संघा खाऐ रज्ज़ी शिखा। अह हणअ तिहअ ई ज़िहअ हरन अर घोर्हल़ो शकार करी तेते शिखा खाणीं। इना शिखा बी सका तिंयां मणछ बी खाई ज़ुंण छ़ोतलै अर बिधाते स्तोती लै शुचै नांईं बी होए।
“पर तेतो लोहू निं खाई! किल्हैकि लोहू दी हआ तेऊ पशूए ज़िन्दगी, शिखा खाणैं का आजी दैऐ तेता पठी धरनीं पोर्ही पोछणै।3 ज़ै तम्हैं एऊ बधाना इहअ ई मने, तै हणअ बिधाता तम्हां लै राज्ज़ी अर तेखअ हणअ थारअ अर आजू थारी आद-लुआदो भलअ ई भलअ।
“पर बिधाता लै ज़ेतरै बी बल़ीदान आसा, तिन्नां पजैल़ै बिधाते तैहा खास ज़ैगा ज़ुंण तेऊ आप्पै आसा छ़ांटी दी। च़ाऐ सह बिधाता खुश करना लै हूम बल़ी होए, या मानत। हूम बल़ीओ मास्स करै ज़रूर बेदी दी पठी बिधाता लै हूम। होर बल़ीदान ज़ेते शिखा तम्हैं खाई सका तिन्नां करै तेऊ साबै, पर तेतो लोहू लऐ बेदी हेठै च़ऊ पाऊआ दी पोछी।
“ज़ुंण बिधाते बधान अर बिधी मंऐं तम्हां का खोज़ै, इना मनणा लै रहै शुचै-पाक्कै, एता करै हणअ थारअ अर आजू थारी आद-लुआदो सदा भलअ। किल्हैकि तम्हैं किअ सह इहअ काम ज़ेता करै बिधाता राज्ज़ी हआ।
मुहुर्तीए पूज़ा निं करी
“इज़राईलीओ, तम्हैं ज़ेभै तेऊ देशा लै डेऊई तेथ बस्सी दी तिन्नां ज़ाती संघै जुध छ़ेल़े, बिधाता करनै तिंयां तम्हां सेटा का खतम, अर तैहा ज़ैगा गिम्मी बस्सणै तम्हैं तिधी। पर तम्हैं डाहै आपणअ खैल हेरे, तम्हैं निं तेखअ तेऊ देशै तिन्नें रिती-रबाज़ा मंदै लागी, सह हणीं तम्हां लै फाही। तम्हैं एही गल्ला लोल़ै-भाल़ै निं लागी, कि तिंयां तिन्नें देअ-देबीए पूज़ा केही करा तै, हाम्हां बी करनअ आपणैं बिधाता लै तेऊ साबै। इहअ करदै निं तम्हैं लागी हेरे! बिधाता करा तेता लै नफरत ज़ेऊ साबै तिंयां लोग आपणैं देअ-देबी पूज़ा, होर ता होर तिंयां करा आपणैं शोहरू-शोहरी बी आपणैं देअआ लै बल़ीदान!
“बिधाते ज़ेतरै बधान अर बिधी मंऐं तम्हां का खोज़ै तेता मनणैओ डाहै हर बगत खैल, नां तेथ किज़ै ज़ोल़ी अर नां तेता का किज़ै छ़ाडी।”4
Source notes (4)
- Cross-reference बधा. 7:5
- Cross-reference मूल. 9:4; लेब. 7:26,27; 17:10-14; 19:26; बधा. 15:23
- Cross-reference लेब. 17:10-14
- Cross-reference बधा. 4:2; प्रका. 22:18-19
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.