दानिएल 6

दानिएल जुहल़ी दी सिहा जैंदरी

1कई साला बाद बांडअ माहा राज़ै दारा आपणअ राज़ एक शौ बिह मुल्खा दी अर तिन्‍नां सोभी मुल्खा प्रैंदै राज़ करदै डाहै आपणैं राज़पाल। 2इना एक शौ बिह मुल्खा लै डाहै राज़ै चअन बज़ीर कि तिंयां एक शौ बिह राज़पाले सरकारी कामों धैन खैल डाहे। इना चिई मांझ़ै त एक दानिएल बी। 3दानिएलो काम-काज़ त होरी राज़पाल अर बज़ीरा का खास्सअ बधिया। तेखअ बणाअं राज़ै दारा सह सोभी कार-करिंदै प्रैंदै प्रधान बज़ीर कि सह तेऊए राज़ो सारअ काम-काज़ सभाल़े।

4होर कार-करिंदै अर अफसर हआ तै दानिएले सरकारी कामां लै गलती लोल़ै लागै दै, पर तिंयां निं तेऊ लै धख ज़ेही गलती करनैओ दोश बी लाई सकै। किल्हैकि सह त शुचअ-पाक्‍कअ अर मानदार। सह करा त हर काम ज़िहअ बोलअ ठीक तिहअ ई। 5खिरी लागै सोभ कार-करिंदै आप्पू मांझ़ै गल्‍ला करदै, “हाम्हैं निं दानिएले सरकारी कामां लै किछ़ गलती काढी सकदै। ऐबै हुई हाम्हां तेऊ लै किज़ै एही गलती लाणीं कि ज़ुंण एऊए परमेशरो बधान मनणे बारै होए।”

6तिंयां डेऊऐ सोभै ज़ण्हैं राज़ै दारा सेटा लै संघा बोलअ इहअ, “माहा राज़अ, तेरी लोल़ी लाम्मी अमर हुई! 7माहा राज़अ, सोभ कार-करिंदै, सैणैं, बज़ीर अर हर मुल्खे राज़पाले आसा ताल्है एही सलाह कि तूह कर इहअ हुकम ज़ारी ज़ुंण तिहा धैल़ी तैणीं ताह सुआई कहा होरी देअआ सेटा अरज़ करे, सह पाणअ सिहे जुहल़ी दी। 8माहा राज़अ, तूह कर हुकम ज़ारी, एता डाह तूह मादी अर फारसी बधाना दी आपणैं दसकत करी लिखी। इहअ करै हणअ अह बधान सदा लै अर तेखअ निं तेता कोह बदल़ी अर रद्द करी सकदअ।”

9राज़ै दारा किअ सह हुकम आपणैं दसकत करी ज़ारी।

10इना गल्‍ले बारै हेरअ कुंणी दानिएला का खोज़ी कि राज़ै किअ नऊंअ हुकम ज़ारी अर तेथ हेरै राज़ै दारा दसकत करी। सह डेऊअ तेखअ आपणैं घअरा लै। तेऊए घअरे प्रैंधल़ी पांडे ताक्‍की ती एरुशलेम नगरी बाखा। सह करा त कबल्‍लअ धैल़ी चिई बारी परमेशरा सेटा अरज़ अर तेऊओ शूकर। तधू बी किअ तेऊ तिहअ ई।

11होर कार-करिंदै अर राज़पाल ज़ुंणीं एक्‍कअ त किअ द, तिन्‍नैं भाल़अ कि दानिएल आसा आपणैं परमेशरा सेटा अरज़ करदअ लागअ द। 12तिंयां डेऊऐ माहा राज़ै दारा सेटा एते बारै खोज़दै फिरी संघा बोलअ, “तूह कर आद कि तंऐं आसा नऊंअ बधान बणाअं द कि ज़ुंण तिहा धैल़ी तैणीं ताह सुआई कहा होरी देअआ सेटा अरज़ करे, सह पाणअ सिहे जुहल़ी दी।” राज़ै बोलअ, “हाँ, अह हुकम आसा मादी अर फारसी बधाना दी मंऐं आपणैं दसकत करी लिखी डाहअ द अर एता निं ऐबै कोह बदल़ी अर रद्द करी सकदअ।”

13तेखअ बोलअ तिन्‍नैं कार-करिंदै राज़ै दारा लै, “माहा राज़अ, सह दानिएल ज़ुंण यहूदा मुल्खा का कैद करी आणै दै मणछा मांझ़ै आसा, ज़ुंण तंऐं आपणैं दसकत करी हुकम ज़ारी किअ, सह निं तेता मंदअ ई आथी! सह करा अज़ी बी आपणैं परमेशरा सेटा धैल़ी चिई बारी कबल्‍लअ अरज़।” 14राज़अ दारा हुअ इना गल्‍ला शूणीं खास्सअ दुखी। सह लागअ सोठदअ कि दानिएल त तेऊ किहअ करै बच़ाऊंणअ।

15तिन्‍नैं सोभी कार-करिंदै किअ भिई एक्‍कअ संघा डेऊऐ उडै राज़ै सेटा लै फिरी। तिन्‍नैं बोलअ, “माहा राज़अ, ऐहा गल्‍ला डाहै आद कि ज़ुंण बधान मादी अर फारसी बधाना दी लिखी हेरअ डाही, तेता निं कोह बदल़ी सकदअ। तेऊ निं राज़अ आप्पू बी रद्द करी सकदअ।”

16तेखअ दैनअ राज़ै दारा हुकम कि दानिएला करा कैद। सपाही आणअ दानिएल ढाकी संघा शोटअ सिहे जुहल़ी दी। राज़ै बोलअ तेऊ लै, “तूह करा शुचअ-पाक्‍कअ रही आपणैं परमेशरे च़ाकरी, मेरी आसा एही अरज़ कि तेऊ परमेशरै लोल़ी तूह बच़ाऊअ।”

17जुहल़ीए मोहरै डाही तिन्‍नैं बडी टोल्ह बदल़ी अर सह टोल्ह डाही शांघल़ी करै सील करी। प्रैंदै लाई राज़ै आपणीं मुंदल़ी करै मोहर। होरी कार-करिंदै बी लाई तेथ आपणीं-आपणीं मुंदल़ी करै मोहर। ताकि कुंण दानिएला तैहा जुहल़ी का बागै निं काढे। 18तेखअ डेऊअ राज़अ दारा आपणैं मैहला लै फिरी। तेऊ निं बैल़ी रोटी बी खाई। आप्पू सेटा गाणैं-बज़ाणैं आल़ै लै बी किअ तेऊ एछणा लै नांह। तेऊ निं सारी राची नींज पल़ी।

19भैणीं दोत्ती गअ राज़अ उझ़ुई संघा ठुर्हअ तैहा सिहे जुहल़ी सेटा लै ज़िधी दानिएल त पाई डाहअ द। 20जुहल़ी नेल़ पुजी लाई राज़ै बडै दुखी दिलै दानिएला लै हाक्‍का, “दानिएल, ए दानिएल, तूह करा त शुचअ-पाक्‍कअ रही आपणैं परमेशरे च़ाकरी! तूह तेऊ इना सिहा का बच़ाऊअ बी?”

21दानिएलै दैनअ ज़बाब, “माहा राज़अ, तेरी लोल़ी लाम्मी अमर हुई! 22मेरै परमेशरा का आसा थोघ कि हुंह आसा नर्दोश, तेऊ छ़ाडअ मुंह सेटा लै आपणअ एक स्वर्ग दूत, तेऊ डाहै सिहे दांद किल्‍ली अर इहअ करै निं ईंयां सिह मेरी किछ़ हान्‍नी करी सकै। माहा राज़अ, मंऐं निं ताल्है बी इहअ किछ़ किअ कि ज़ेता करै तेरी हान्‍नी हुई होए।”1

23तेखअ हुअ जुहल़ी भितरा का दानिएला गल्‍ला करदअ शूणीं राज़अ दारा खुश अर तेऊ किअ हुकम कि दानिएला काढा जुहल़ी सिहा जैंदरा का बागै। सपाही काढअ दानिएल जुहल़ी का बागै अर तेऊए घेरी निं किधी पेहुश बी आथी त लागअ द। किल्हैकि दानिएल रहा त आपणैं परमेशरे आसरै अर परमेशरै निं तेऊए किछ़ हान्‍नी दैनी हणैं। 24तेखअ किअ राज़ै आपणैं सपाही लै हुकम कि तिन्‍नां कार-करिंदै आणा शादी ज़ुंणी दानिएला संघै ज़ीद डाही तेऊ लै अह दोश लाअ त। राज़ै बझ़ैल़ै तिंयां सोभै तिन्‍नें बेटल़ी-माठै संघी तैहा ई सिहे जुहल़ी दी पाणै। ज़ेतरी तिंयां जुहल़ी भितरी शोटै, भुखै सिह पल़ै तिन्‍नां लै चुटी अर तिंयां खाऐ तिन्‍नें हाडकै संघी पठ।

25एता बाद दैनअ माहा राज़ै दारा संसारे सोभी देश, ज़ाती अर सोभी भाषा-बोली बोल़णैं आल़ै लै समाद,

“तम्हैं लोल़ी राज्ज़ी-राम्बल़ै रहै अर सदा खुश रहै!

26ज़हा-ज़हा देशै मेरअ राज़ आसा,

तिन्‍नां सोभी लै आसा मेरअ हुकम कि

सोभ लोग करै तेऊ परमेशरो अदर ज़सरी च़ाकरी दानिएल करा।

सोभ रहै तेऊ परमेशरे डरा हेठै! किल्हैकि

सह ई आसा ज़िऊंदअ परमेशर अर

जुगै-जुगै तैणीं आसा सह ई।

तेऊओ राज़ निं कधि खतम हणअ अर सह आसा

सोभी प्रैंदै सदा लै राज़अ।2

27खरी का बच़ाऊआ सह ई अर

ज़िन्दगी बी सका सह ई बच़ाऊई।

सह करा सरगै अर धरती दी महान अर नुआहरै च़मत्कार।

तेऊ ई परमेशरै बच़ाऊअ दानिएल बलबान सिहा का।”

28इहअ करै बिति फारसी माहा राज़ै दारा अर तेऊ बाद माहा राज़ै कुस्रूए राज़ा दी दानिएल ज़िन्दगी राज्ज़ी-मौज़ी।