Kulvi Outer Seraji Bible
आमोस 1
अह समाद दैनअ बिधाता आमोस नाओंए फुआला का ज़ुंण यहूदा मुल्खे तकोआ नगरीओ आसा त। ईंयां गल्ला खोज़ी बिधाता तेऊ का धैनै-सुपनै ज़ाज़री हणैं का दूई साला आजी। 2तेऊ ज़मानै त यहूदा मुल्खै उज़ियाह राज़अ अर इज़राईल मुल्खै थिअ जोआशो शोहरू जरोबाम राज़अ। आमोस फुआलै खोज़अ इहअ:
“बिधाता लाई सियोन धारा का क्रुंगा,
एरुशलेम नगरी का आसा तेऊए बोल गुल़ूबिज़ल़ू ज़िहै लागै दै शुणदै।
फुआला बणें घैहणीं शुक्की!
कर्मेल धारा लागअ द घाह झल़ुशुअ पठी।”3
इज़राईला नेल़ सिरीया लै बिधातो नसाफ
बिधाता बोला इहअ, “दमिश्क नगरीए लोगै किऐ भिई-भिई खास्सै पाप, ऐबै लाई मंऐं तेता पिछ़ू तिन्नां लै सज़ा दैई। तिंयां आसा गलादे लोगा लै खास्सै नर्दैई हुऐ दै। तिंयां दरल़ै तिन्नैं लोहे ददाल़ा करै। ज़ुंण मैहल हज़ाएल राज़ै आसा बणाऐं दै, तेथ चैल़णीं मुंह आग। बेन्हदाद राज़ै बणाऐं दै गहल़-कोट करनै मुंह आगी करै दहई खतम। दमिश्क नगरीए प्रऊल़ी पाणीं मुंह चोल़ी। अवान खागै बस्सै दै लोग करनै मुंह खतम। बेथ-एदेन नगरीओ राज़अ बी करनअ मुंह खतम। अराम देशे लोग निंणै कीर मुल्खे लोगा कैद करी।” ईंयां गल्ला बोली बिधाता।
पलिश्ती लै बिधातो नसाफ
बिधाता बोला इहअ, “गाज़ा नगरीए लोगै किऐ भिई-भिई खास्सै पाप, ऐबै लाई मंऐं तेता पिछ़ू तिन्नां लै सज़ा दैई। तिन्नैं ढाकी मेरी परज़ा अर तिंयां निंयैं तिन्नैं तिन्नें घअरा का दूर। तिन्नैं बेच़ै तिंयां एदोम देशे लोगा का। तैही चैल़णीं मुंह गाज़ा नगरीए दुआली दी आग अर तिन्नें गहल़-कोट करनै मुंह आगी करै दहई खतम। अशदोद नगरीओ राज़अ करनअ मुंह खतम अर अशकलोन नगरीओ राज़अ बी करनअ मुंह खतम। अक्रोन नगरी बस्सै दै लोगा लै दैणीं मुंह सज़ा। पलिश्ती मांझ़ै ज़ुंण बच़ै दै आसा, तिंयां मरनै सोभै।” अह गल्ल बोली मेरै मालक बिधाता।
सूर नगरी लै बिधातो नसाफ
बिधाता बोला इहअ, “सूर नगरीए लोगै किऐ भिई-भिई खास्सै पाप, ऐबै लाई मंऐं तेता पिछ़ू तिन्नां लै सज़ा दैई। तिन्नां पाई मेरी परज़ा एदोम देशे गलामी दी। ज़ुंण तिन्नैं मेरी परज़ा संघै साथ अर करार किई ती, तिंयां निं तेता लै शुचै-पाक्कै रहै।6 तैही चैल़णीं मुंह सूर नगरीए दुआली दी आग, तिन्नें गहल़-कोट करनै मुंह आगी करै दहई खतम।”
एदोम देशा लै बिधातो नसाफ
बिधाता बोला इहअ, “एदोम देशे लोगै किऐ भिई-भिई खास्सै पाप, ऐबै लाई मंऐं तेता पिछ़ू तिन्नां लै सज़ा दैई। तिंयां पल़ै आपणैं ई भाई-बंध इज़राईली लै तलबारा पाई पिछ़ू, तिन्नां लै निं तिन्नैं धख झींण बी किई! तिंयां रहै कबल्लै रोश्शै लाल हई अर कबल्लै मेरी परज़ा मारदै लागी।7 तैही चैल़णीं मुंह तेमान नगरी दी आग अर बोज़रा नगरीए गहल़-कोट करनै मुंह आगी करै दहई खतम।”
अमोन नगरी लै बिधातो नसाफ
बिधाता बोला इहअ, “अमोन नगरीए लोगै किऐ भिई-भिई खास्सै पाप, ऐबै लाई मंऐं तेता पिछ़ू तिन्नां लै सज़ा दैई। अमनोनी छ़ेल़अ त आपणीं सिअं बढेरना लै गलाद मुल्खै बस्सै दै लोगा संघै जुध। तिन्नैं डाही ती तिधी सुंदी बेटल़ी तोही धेल़ी च़िरी! तैही चैल़णीं मुंह रबाह नगरीए दुआली दी आग अर तेते गहल़-कोट करनै मुंह आगी करै दहई खतम। तेऊ जुधे धैल़ी हणीं एही लैल़ा-पकारा ज़ेही बडी ढिश-बागर एछा। तिन्नों राज़अ अर तिन्नें कार-करिंदै डेऊणैं गलामी दी।” ईंयां गल्ला बोली बिधाता।
Source notes (8)
- Cross-reference 2 राज़. 15:1-7; 2 इति. 26:1-23
- Cross-reference 2 राज़. 14:23-29
- Cross-reference जोए. 3:16
- Cross-reference ईशा. 17:1-3; जेर. 49:23-27; जक. 9:1
- Cross-reference ईशा. 14:29-31; जेर. 47:1-7; एज. 25:15-17; जोए. 3:4-8; सप. 2:4-7; जक. 9:5-7
- Cross-reference ईशा. 23:1-18; एज. 26:1—28:19; जोए. 3:4-8; जक. 9:1-4; मोत्त. 11:21,22; लूक. 10:13,14
- Cross-reference ईशा. 34:5-17; 63:1-6; जेर. 49:7-22; एज. 25:12-14; 35:1-15; ओब. 1:1-4; मिक. 1:2-5
- Cross-reference जेर. 49:1-6; एज. 21:28-32; 25:1-7; सप. 2:8-11
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.