Kulvi Outer Seraji Bible
2 इतिहास 35
राज़ै जोशिया मनाऊंअ ऊवार्णैओ थैर
(2 राज़ै 23:21-23)
राज़ै जोशिया मनाऊंअ बिधाते अदर करना लै राज़धानी एरुशलेम ऊवार्णैओ थैर, च़ौदा च़ैत्रै किअ तिन्नैं रिठ काटी ऊवार्णअ। राज़ै जोशिया दैनै प्रोहता का तिन्नें काम सभाल़ी कि कहा किज़ै-किज़ै करनअ संघा दैनअ तिन्नां लै हैअ कि तम्हैं रहा बिधाते भबनै आपणीं-आपणीं च़ाकरी करदै लागी। ज़ुंण लेबी बिधाते भबनै च़ाकरी करा तै अर ज़ुंण इज़राईली मणछा लै बधाने शिक्षा दैआ तै, तेऊ किअ तिन्नों झाल़अ संघा बोलअ तिन्नां लै इहअ, “बिधाते पबित्र करारे मणशू डाहा दाबेदे शोहरू राज़ै सुलैमानै बणाऐं दै भबनै। ऐबै निं तम्हां एता ज़ैगै-ज़ैगै रगाऊंणे ज़रुरत आथी। ऐबै करनी तम्हैं इधी का आपणैं परमेशर बिधाता अर तेऊए परज़े च़ाकरी। तम्हैं करा बिधाते भबनै आपणीं-आपणीं टोलीए साबै ज़ुदअ-ज़ुदअ काम ज़ेही ज़िम्मैंबारी तम्हां लै इज़राईले राज़ै दाबेद अर तेऊए शोहरू सुलैमानै आसा सभाल़ी दी। तम्हैं लेबी बांढिआ आप्पू मांझ़ै ज़ुदै-ज़ुदै छ़ुंढा दी, संघा करै इज़राईलीए तिन्नां-तिन्नां टोली का भैंट लई आऐ दै लोगे मज़त ज़हा-ज़हा टोलीए ज़िम्मैंबारी तम्हां का ज़ुदी-ज़ुदी आसा सभाल़ी दी। ज़ेभै लोग तम्हां सेटा ऊवार्णअ आणे, तेऊ काटै तम्हैं। तम्हैं करा बधाने साबै आपणीं शुधी संघा करा आपणैं इज़राईली भाई-बंधे मज़त कि तिंयां तेऊ साबै ऊवार्णैओ थैर मनाओए ज़िहअ बिधाता आपणैं गूर मोसा का खोज़ी बोली आसा डाहअ द।”
राज़ै जोशिया दैनै लोगा लै आपणीं भेडा-बाकरीए हेल़्ही का तिह हज़ार होछ़ै गाभू अर छ़ेल्हू, चअन हज़ार बल्द कि लोग ऊवार्णे थैरा लै बल़ीदान करे। राज़े कार-करिंदै बी दैनै दिला का लेबी, प्रोहत अर लोगा लै चैणैं कि तिंयां बल़ीदान करे। बिधाते भबनै कार-करिंदै मांझ़ै माहा प्रोहत हिलकिया, जकर्या अर जेहीएलै दैनै प्रोहता लै दूई हज़ार छ़ह शौ होछ़ै गाभू अर छ़ेल्हू अर चअन शौ बल्द कि ऊवार्णे थैरा लै काटे। कननया अर तेऊए दूई भाई शमयाह अर नतनेल, हशाबिया, जेइल, जोजबाद ज़ुंण लेबी मांझ़ै सैणैं थिऐ, तिन्नैं सोभी दैनै पांज़ हज़ार होछ़ै गाभू अर छ़ेल्हू अर पांज़ शौ बल्द होरी लेबी लै कि तिंयां ऊवार्णे थैरा लै बल़ीदान करे।
ज़ांऊं ऊवार्णे थैरा लै सारी तैरी करी मुक्कै, लेबी अर प्रोहत खल़्हुऐ आपणीं-आपणीं ज़ैगा ज़ुंण काम तिन्नां लै राज़ै सभाल़अ त। ज़ांऊं ऊवार्णे गाभू, छ़ेल्हू काटै, लेबी काढी तिन्नें खाला पोर्ही अर प्रोहतै छ़ल़िकअ बल़ीदान किऐ दै तिन्नां पशूओ लोहू बेदी दी। बिधाता लै हूम बल़ीदान करने पशू तै तिन्नैं हेल़्ही का ज़ुदै डाहै दै, तिंयां दैनै तिन्नैं सोभी लोगा लै तिन्नें टोलीए साबै बांडी ताकि तिंयां तिन्नां पशू बधाने कताबा दी मोसा गूरै खोज़ी दी बिधीए साबै बिधाता लै हूम करे। तिन्नैं भुज़ी ऊवार्णे आगी दी ज़ेही बधाना दी तेते बिधी थिई खोज़ी दी, अर ज़ुंण शिखा ज़ुदी पबित्र दी डाही दी, तिंयां सटेऊई हांडै अर बतिल्लै अर बल़ाही दी। तेखअ दैनी झ़ट-पटै तिंयां शिखा लोगा लै बांडी। सारी धैल़ा रहै प्रोहत बल़ीदान करदै अर बल़ीदान किऐ दै पशूए च़र्बी बेदी दी हूम करदै लागी। ज़ांऊं सोभै बल़ीदान करी मुक्कै। तेखअ बणाईं लेबी ऊवार्णे शिखा आप्पू लै बी अर तिन्नां प्रोहता लै ज़ुंण हारणे आद-लुआद थिऐ।
लेबी मांझ़ै त राज़ै दाबेदै असाप टोलीए लुआदा का गाज़ै-बाज़ै आल़ै, पहरीओ काम सभाल़अ द, तिंयां थिऐ असाप, हमान अर जदूतून ज़ुंण राज़ैओ गूर थिअ। इनो काम त इहअ कि ईंयां निं आपणीं ज़ैगा का ओर्ही-पोर्ही डेऊई ई सकदै तै। इना लै दैनी होरी लेबी ऊवार्णे शिखा बणाईं। तधू मनाऊंअ बिधाते अदर करना लै ऊवार्णैओ थैर संघा किऐ बल़ीदान बेदी दी हूम ज़िहअ राज़ै जोशिया हुकम त किअ द।
इज़राईली मांझ़ै ज़ुंण लोग ऊवार्णे थैरा लै थिऐ आऐ दै, तिन्नैं मनाऊंअ तैहा धैल़ी ऊवार्णैओ थैर अर तेखअ मनाऊंअ साता धैल़ी तैणीं आखरी रोटीओ थैर। ऊवार्णे थैरा लै थिऐ एरुशलेम नगरीए सोभ लोग, सारै यहूदा अर उतरा बाखा इज़राईल मुल्खा का लोग आऐ दै। राज़अ जोशिया, प्रोहत अर लेबी बी थिऐ सोभै। बिधाते गूर शमूएले ज़मानै ओर्ही तधू तैणीं निं ऊवार्णे थैरे एचल़ी बडी जाचा कधि हुई ती नां तधा का आजी कुंणी राज़ै ऊवार्णैओ थैर इहअ बडअ मनाऊंअ त। अह मशूर ऊवार्णैओ थैर मनाऊंअ राज़ै जोशिया आपणैं राज़ा दी ठार्हुई साला।
राज़ै जोशियो राज़ मुक्कअ
(2 राज़ै 23:28-30)
राज़अ जोशिया मुक्कअ बिधाते भबना लै इना एतरै कामां करी। थोल़अ बगत बितअ कि मिसर देशो राज़अ नेकू छ़ेल़अ फरात दरैऊआ नेल़ कर्कमीश नगरी दी जुध। राज़अ जोशिया डेऊअ तेऊए मकाबलै करदअ। पर राज़ै नेकू छ़ाडै दूत संघा दैनअ जोशिया लै इहअ समाद, “मेरअ अह जुध निं ताह यहूदा मुल्खे राज़ै संघै आथी! नां हुंह ताह संघै मकाबलै करदअ आथी आअ द।” पर मुल्है बोलअ बिधाता कि हुंह आपणैं दुशमणा मारदअ ज़ेतरअ हई सके तेतरअ छ़ेक्कै चुटी पल़े। बिधाता आसा मुंह बाखा, तूह निं मुंह रोक्कदअ लागै नांईं ताह हेरे तेऊ करनअ तूह पठी बरैबाद। पर जोशिया ती डाही हेरी दी कि नेकू संघै लणअ मकाबलअ करी। तेऊ निं तैहा गल्ला दी धैन दैनअ ज़ुंण गल्ल बिधाता राज़ै नेकू बाती बोली ती। राज़ै जोशिया डेऊअ मगिदो सऊंऐं मुल्खै भेश बदल़ी नेकू संघै मकाबलै करदअ।
तेऊ जुधा लै लागी जोशिया राज़ै कुदरती मिसर देशे सैना मांझ़ै एकी सपाहीए कतीरै। जोशिया किअ आपणैं दासा लै हुकम, “हुंह हुअ खास्सअ ज़खमी, तूह निंऊं मुंह इधा का दूर।” तिन्नैं काढअ सह तेऊए रथा का पोर्ही संघा बशैल़अ तिधी नेल़ दुजै रथा प्रैंदै संघा पजैल़अ राज़धानी एरुशलेम अर तिधी हुई तेऊए मौत। तेखअ डाहअ सह तिन्नैं राज़ै दाबणे मल्थाना दी दाबी। सारै यहूदा मुल्ख अर एरुशलेम नगरीए परज़ा किअ जोशिया राज़ै लै शोग।
बिधाते गूर जेरमयाह आसा जोशिया राज़े अदर करना लै तेऊ मरने गिह गांठी दी। तधा बाद बणअ अह रबाज़ कि ज़ेभै बी इज़राईली राज़ै जोशिया मरने आदगारी लै शोग करा तै, तेभै बोला तै सोभ मर्ध अर बेटल़ी तैहा गिहा। अह गिह भेटा लामणे कताबा दी।
जोशिया राज़ै ज़ुंण बी काम किऐ, सह बिधाता लै किहअ शुचअ-पाक्कअ रहअ अर सह बधाना किहअ तत्त-दिला का मना त, तेऊओ अह इतिहास आसा शुरू का खिरी तैणीं इज़राईल अर यहूदा मुल्खे राज़े कताबा दी लिखी डाहअ द।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.