Kulvi Outer Seraji Bible
2 इतिहास 28
यहूदा दी राज़अ अहाज
(2 राज़ै 16:1-4)
ज़धू अहाज राज़अ बणअ, तधू ती तेऊए अमर बिहा साले, तेऊ किअ एरुशलेम नगरी का यहूदा दी सोल़ा साला तैणीं राज़। तेऊ निं आपणैं दाद-बाब दाबेदा ज़िहअ भलअ किअ, पर तेऊ किअ तेता का उंबल़अ ज़ेता का बिधाता नफरत करा। तेऊ ढाकी इज़राईले कई राज़ै ज़ेही बात। तेऊ बणाईं पूज़णा लै बाल देअए मुहुर्ती! तेऊ किऐ हिनोम खागै बाल देअआ लै हूम अर बल़ीदान। होर ता होर, तेऊ किअ आपणअ सक्कअ शोहरू बी होरी देअए गान-स्ताना दी हूम बल़ीदान! तेऊ मनै तिन्नां लोगे च़िल़्हखरै रबाज़ ज़ुंण लोग बिधाता तेऊ देशै इज़राईली पुजणैं का आजी दूर काढै तै। अहाज राज़ै किऐ उछ़टी धारा प्रैंदै देहुरै, ज़ोता अर कई बडै-बडै बूटा गोधै बल़ीदान अर धूप ज़ाल़ी पूज़ा।
इज़राईल अर अराम देशो जुध
(2 राज़ै 16:5)
तैही दैनअ परमेशर बिधाता राज़ै आहाज़ा अराम देशे राज़ै का जुध हारनै, संघा निंयं सह अर खास्सै इज़राईली कैद करी दमिश्क नगरी लै। इज़राईली सैना का बी हारअ अहाज अर तेऊए पाई खास्सी सैना मारी। इज़राईल मुल्खे राज़ै रेमले शोहरू पेका मारै यहूदी सैना मांझ़ै एक लाख बिह हज़ार सज़ाण जोधै ज़ुंण जुधा लै मशूर आसा तै! किल्हैकि तिंयां हुऐ तै आपणैं दादा-बाबे परमेशर बिधाता का दूर। इज़राईली सैना मांझ़ै त एप्रैम गोत्रा का एक ज़िक्री नाओं जोधअ, तेऊ पाअ अहाज राज़ैओ शोहरू मासेया मारी, राज़ दरबारो सैणअ अज्रीकाम बी पाअ मारी अर एलकाना ज़ुंण राज़ैओ प्रधान बज़ीर थिअ, सह बी पाअ मारी। यहूदी थिऐ इज़राईलीए आपणैं ई भाई-बंध पर तज़ी निंयैं इज़राईली सैना दूई लाख यहूदी बेटल़ी अर शोहरू-माठै कैद करी अर तिन्नां संघै निंईं खास्सी ज़ैदात लुटी आपणीं राज़धानी सामरी नगरी लै।
ओदेद गूर
इज़राईल मुल्खै थिअ ओदेद नाओं बिधातो एक गूर। सह रहा त सामरी नगरी। यहूदी मांझ़ै खास्सै कैदी संघा लई ती इज़राईली सैना बापस एछदी लागी दी, तेऊ गूरा भेटै तिंयां नगरी बागै अर तेऊ बोलअ तिन्नां लै, “थारै दादा-बाबे परमेशर बिधाता ती यहूदी लै खास्सी रोश्शै आई दी, तैही हारै तम्हां का तिंयां जुध। पर तम्हैं निखल़ै तिन्नां का बी आजू! तम्हैं ज़िहै नर्दैई हई तिंयां काटै-फणाटै, सह बी हेरअ स्वर्गै बिधाता भाल़ी। तम्हैं उझ़ुऐ ऐबै यहूदा अर एरुशलेम नगरीए मर्ध-बेटल़ी गलाम बणाऊंदै! तम्हैं इहअ बी ज़ाणा कि एतो लागणअ तम्हां आपणैं परमेशर बिधाता का दोश? ज़ै तम्हां मेरी सलाह शुणनी, तै करा इहअ कि इना सोभी कैदी दैआ घअरा लै बापस डेऊणैं। ईंयां आसा थारै ई भाई-बंध। नांईं ता तम्हैं हणैं बिधाते रोश्शा करै बरैबाद।”
तेतरी गऐ तिधी एप्रैम गोत्रा का च़ार इज़राईली सैणैं एछी। तिंयां थिऐ जहोहनानो शोहरू अजर्याह, बरेक्याहो शोहरू मशीलमोत, शलूमो शोहरू जहिजकिया अर हदलाईओ शोहरू अमासा। तिन्नैं बी दैनअ ओदेद गूरो साथ कि इज़राईली सैना किअ अह काम गलत। तिन्नैं बोलअ इहअ, “इना कैदी निं सामरी नगरी भितरी आणी! एक गलती करी गऐ हाम्हैं पैहलै ई बिधाते दोशी हई! एता का आजू हणअ हेरे नर्थ, बिधाता गअ दा इज़राईली लै पैहलै ई कोप एछी, ऐबै निं पाप बढेरदै लागा।” इज़राईली सैना छ़ाडै तिंयां यहूदा का आणै दै कैदी इज़राईली सैणैं अर सोभी लोगा नदरी पोर्ही। तिन्नां का ज़ुंण लुटी आणअ त, सह बी दैनअ तिन्नां लै बापस। तिन्नैं इज़राईली च़ऊ सैणैं दैनै तिन्नां कैदी लै लुटै दै समाना मांझ़ै घेरी बान्हणां लै झिकल़ै, खूरा लै पोलल़ै बन्हैऊंईं। संघा खैऊई तिन्नां सोभी लै रोटी-पाणीं, ज़ुंण ज़खमी थिऐ, तिन्नें ज़खमा दी लाअ जैतूनो तेल। ज़सरै हांढुई निस्सअ त, तिंयां बशैल़ै गाधै प्रैंदै संघा पजैल़ै सोभ कैदी यहूदा मुल्खै खज़ूरे नगरी जेरिहो। संघा डेऊऐ उतरा बाखे इज़राईली राज़धानी सामरी लै फिरी।
अहाज राज़ै मांगी अश्शूर देशे राज़ै का मज़त
(2 राज़ै 16:7-9)
एदोमी छ़ेल़अ यहूदा मुल्खै पुर्बा बाखा जुध संघा निंयैं खास्सै यहूदी कैद करी। तेखअ दैनअ अहाज राज़ै अश्शूर देशे राज़ै तिगला-पेल़सरा लै समाद कि सह तेऊए मज़त करे। तिन्नां ई धैल़ै पल़ै पलिश्ती यहूदा मुल्खै दखणा बाखा चुटी। तिन्नैं किअ बेथ-शमेश, अजालोन, गदरोत, सोको, तिम्ना, गिमजो नगरी अर तिन्नां सोभी नगरी ओरी-पोरी सारै गराऊंऐं कबज़अ संघा बस्सै आप्पू तेथ। बिधाता दैनी इज़राईले राज़ै अहाजा पिछ़ू यहूदा मुल्खा लै एही आफ़त पल़णै किल्हैकि तेऊ किअ बिधाता लै विश्वास घात अर नां तेऊ यहूदा मुल्खे परज़ा पाप करनै का रोक्की। अश्शूर देशो राज़ै तिगला-पेल़सरै पाई अहाज राज़ै लै होर बी आफ़त मज़त करनी ता दूरे गल्ल। अहाज राज़ै काढअ बिधाते भबना अर राज़े मैहले भढारा, परज़ा प्रैंदै सैणें घअरा का सुन्नअ-च़ंदी संघा दैनअ अश्शूर देशे राज़ै लै भैंट। तज़ी बी निं तिगला-पेल़सरै तेऊए मज़त किई।
अहाज राज़े पाप
अहाज राज़ै लै रही आफ़ता प्रैंदै आफ़त पल़दी लागी पर सह रहअ तज़ी बी बिधाता लै होर बी खास्सअ पाप करदअ लागी। सह रहअ अरामी देशे दमिश्क नगरीए देअआ लै बल़ीदान करदअ लागी ज़ुंणीं सह हारअ त। अहाज सोठा त इहअ, “अरामी देशे देअऐ दैनअ तिन्नें राज़ै जुध ज़ितणा लै साथ। ज़ै हुंह तिन्नें देअआ लै पज़ाया दैए, तै हेरनअ तिन्नें देअआ मेरअ साथ बी दैई।” पर तेता करै हुई राज़ै अहाज अर सोभी इज़राईलीए बरैबादी ई। एतरअ ता हुअ, अहाज राज़ै किऐ बिधाते भबने चाण भांडै कठा संघा पाऐ चोल़ी-फाल़ी तेते ठोर-ठोर। तेऊ किई बिधाते भबने प्रऊल़ी बंद संघा बणाईं एरुशलेम ज़ैगै-ज़ैगै बेदी। यहूदा मुल्खै बणाऐं तेऊ सोभी नगरी अर गराऊंऐं पराऐ देबतै पूज़णा लै गान-स्तान। तेथ करा तै सोभ धूप ज़ाल़ी। इहअ करै ठैऊई तेऊ आपणैं दादा-बाबे परमेशर बिधाता लै रोश्शै।
अहाज राज़े राज़ा दी होर बी ज़िहै-ज़िहै काम हुऐ, तिंयां आसा शुरू का खिरी तैणीं यहूदा अर इज़राईल मुल्खे राज़े इतिहासे कताबा दी लिखै दै। ज़ांऊं राज़अ अहाज मूंअ, सह डाहअ एरुशलेम नगरी दाबी। पर इज़राईलीए राज़ै दाबणे मल्थाना दी निं सह दाबअ। तेऊ बाद बणअ तेऊओ शोहरू हिजकिया यहूदा मुल्खो राज़अ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.