Kulvi Outer Seraji Bible
2 इतिहास 24
यहूदा मुल्खै राज़अ जोआश
(2 राज़ै 12:1-16)
ज़धू जोआश राज़अ बणअ, तधू त सह साता सालो। तेऊ किअ एरुशलेम नगरी का च़ाल़्ही साला तैणीं राज़। तेऊए ईजा नाअं त सिबीया अर सह थिई बेर्शेबा का। जहोयादा प्रोहते ज़िऊंदी ज़िता किऐ जोआशै तिहै ई भलै काम ज़िहअ बिधाता च़ाहा त कि सह करे। जहोयादा प्रोहतै दैनी जोआशा लै दूई बेटल़ी आणी अर तिन्नां का हुऐ तेऊए खास्सै शोहरू अर शोहरी।
ज़ांऊं जोआशा राज़ै बणी थोल़अ बगत बित्तअ, तेऊ सोठअ बिधाते भबना मराम्मत करना लै। तेऊ शादै लेबी अर प्रोहत संघा किअ तिन्नां लै इहअ हुकम, “तम्हैं डेओआ यहूदा मुल्खै सोभी नगरी संघा करा इज़राईली का हर साल बिधाते भबने मराम्मत करना लै ढब्बै कठा। एऊ कामां लआ तम्हैं सोभी का आजी करी।” पर लेबी हुई खास्सी साला कि तिन्नैं निं सह काम किअ। तेखअ शादै राज़ै जोआशै जहोयादा माहा प्रोहत अर यहूदी सैणैं संघा बोलअ तिन्नां लै, “तम्हैं किल्है निं लेबी, यहूदा अर एरुशलेम नगरीए लोगा का ढब्बै कठा करदै छ़ाडै, ज़ेता लै बिधाते दास मोसा इज़राईली लै सूल आसा बणाअं द कि बिधाते खिम्भे च़ाकरी लै करै सोभ लोग च़ंदअ दैई?
“ऐबै आसा बिधातो भबन मराम्मत करना लै हुअ द, किल्हैकि तैहा कदुष्ट अताल्या अर तेसे साथी-संघी किअ भबन बरैबाद! बिधाते पबित्र चाण भांडै तोही निंयैं तिन्नैं बाल देअए पूज़ा-गाज़ा लै।”
राज़ै जोआशै किअ हुकम कि एक काठो सदूक बणाआं संघा डाहा तेऊ बिधाते भबने प्रऊल़ी आजू कि लोग तेथ च़ंदअ पाए। तेखअ दैनअ यहूदा अर एरुशलेम सोभी लोगा लै समाद कि बिधाता लै दैऐ सोभ च़ंदअ, ज़िहअ इज़राईली मांझ़ै परमेशरे दास मोसा मिसर देशा का एछदी रेगीस्तानै च़ंदअ कठा करी सूल बणाअं त। ऐहा गल्ला लै हुऐ सोभ लोग अर तिन्नें सैणैं राज्ज़ी अर तिन्नैं आणै सोभी ढब्बै संघा रहै सदूका दी ढब्बै पांदै लागी अर सदूक हुअ भरी। ज़ांऊं हर धैल़ै सदूक ढब्बै करै भर्हिया त, लेबी निंयां तै तेऊ राज़े कार-करिंदै सेटा लै। तेखअ काढा तै राज़ैओ काईथ अर माहा प्रोहते कार-करिंदै सदूका का ढब्बै पोर्ही संघा डाहा तै तेता भिई बिधाता भबना आजू तिधी। इहअ करै झाल़ै तिन्नैं खास्सै ढब्बै।
राज़अ जोआश अर जहोयादा प्रोहत दैआ तै तिन्नां ढब्बै तिन्नां मणछा का सभाल़ी ज़हा का बिधाते भबने मराम्मत करने ज़िम्मैंबारी हआ ती। तिन्नैं दैनी तिन्नां ढब्बै करै काठे कारीगीरे मज़दूरी, पात्थरे कारीगीर अर भित्ती च़िणनै आल़ै मिस्त्री अर पल़ैमूए मज़दूरी। ज़ुंण बिधाते भबने मराम्मत करने कामां तै लागै दै, तिन्नैं किई खास्सी मैन्थ अर तिन्नैं दैनअ बिधातो भबन तिहअ पाक्कअ बणाईं ज़िहअ सह पैहलै थिअ। ज़ांऊं बिधाते भबने मराम्मत करी मुक्कै, तेता का ज़ुंण सुन्नैं, च़ंदीए ढब्बै बच़ै तिंयां दैनै तिन्नैं राज़ै जोआशा अर जहोयादा प्रोहता का सभाल़ी। तेता करै बणाऐं तिन्नैं बिधाते भबना लै सुन्नैं-च़ंदीए कऊली अर होर भांडै।
जहोयादा प्रोहते सूल
जहोयादा प्रोहतै निं बिधाते भबनै हर धैल़ै हणैं आल़ै हूम अर बल़ीदानो सूल चोल़अ। खिरी ज़ांऊं जहोयादा खास्सअ प्रोढअ हुअ, तेखअ मूंअ सह एकी शौआ तिहा साले अमरा। सह डाहअ तिन्नैं दाबेदपूर नगरी राज़ै दाबणे ज़ैगा आदगारी लै दाबी कि तेऊ किअ परमेशर, बिधाते भबन अर सोभी इज़राईली लै भलअ।
ज़ांऊं जहोयादा प्रोहत मूंअ, यहूदा मुल्खे कार-करिंदै आऐ राज़ै जोआशा सेटा लै, तिन्नैं किई तेऊ संघै गल्ला कि तिन्नें सलाह मने। ज़िहअ तिंयां च़ाहा तै राज़ै किअ तिहअ ई। तेखअ पाई लोगै आपणैं दादा-बाबे परमेशर बिधाते भबनै पूज़ा-गाज़ा करने छ़ाड अर तिंयां लागै अशेरा देबीए मुहुर्तीए पूज़ा करदै। तिन्नें एऊ पापा करै पल़अ यहूदा मुल्ख अर एरुशलेम नगरी लै बिधातो कोप। बिधाता छ़ाडै तिन्नां लै चतैनगी दैंदै आपणैं गूर बी पर तिन्नैं किई तिन्नां गूरे गल्ला बी शूणीं नां शूणीं। तेखअ किई बिधाता जहोयादा प्रोहते शोहरू जकर्या दी एछी गल्ला। जकर्या खल़्हुअ लोगा सम्हनै उछ़टै दी संघा खोज़अ सोभी का इहअ कि बिधाता बोला, “मेरअ हुकम नांईं मनी तम्हैं किल्है लाई आप्पू लै बरैबादी आणी? तम्हैं छ़ाडअ हुंह अर ऐबै छ़ाडै मंऐं तम्हैं!” यहूदी सैणैं किअ आप्पू मांझ़ै जकर्या मारना लै एक्कअ अर राज़अ जोआश बी त तिन्नां संघै ज़ुल़अ द। राज़ै किअ हुकम अर संघा पाअ तिन्नैं सोभी सह बिधाते भबने खोल़ै पात्थरो ढो दैई मारी। राज़ै जोआशै निं सह गल्ल बी आद डाही कि जकर्यो बाब जहोयादा प्रोहत तेऊ लै किहअ शुचअ-पाक्कअ साथी आसा त! तेऊ बझ़ैल़अ जकर्या मारनै! मरदी-मरदी बोलअ जकर्या इहअ, “हे बिधाता, तूह भाल़ इनै मुल्है किज़ै किअ! एतो बदल़अ लऐ तूह इना सोभी का आप्पी!”
जोआशो राज़ हुअ खतम
ज़ांऊं नऊंअ संबत आअ, अरामी सैना छ़ेल़अ यहूदा मुल्खा संघै जुध। तिन्नैं पाऐ यहूदा अर एरुशलेम सोभ कार-करिंदै अर सैणैं मारी संघै निंईं खास्सी धन-माया लुटी दमिश्क नगरी आपणैं राज़ै सेटा। अरामी लोगे ती थोल़ी ज़ेही सैना आई दी, पर बिधाता दैनअ तिन्नां यहूदा मुल्खे बडी सैना का ज़ितणैं। किल्हैकि यहूदा मुल्खे परज़ा हुई ती आपणैं दादा-बाबे परमेशर बिधाता का दूर। इहअ करै भेटी राज़ै जोआशा तेऊए कर्मे सज़ा।
राज़ै जोआशे हत्या
राज़अ जोआश त तेऊ जुधा दी खास्सअ ज़खमी हुअ द, ज़ांऊं अरामी सैना यहूदा मुल्खा का फिरी डेऊई, राज़ै जोआशे दूई कार-करिंदै अमोन नगरीए बेटल़ी शमातो शोहरू जाबाद अर मोआबी बेटल़ी शमेरो शोहरू जोजबाद। तिन्नैं दुही किअ एक्कअ कि एऊ मारी लणअ हाम्हां जहोयादा प्रोहते शोहरू जकर्ये हत्या करनैओ बदल़अ। जोआश त आपणैं च़ैनैं जुधा दी पल़ै दै ज़खमा का बिज़रदअ लागअ द अर तिन्नैं पाअ सह मारी। जोआश डाहअ दाबेदपूर दाबी पर तिधी निं सह दाबअ ज़िधी राज़ै डाहा तै दाबी। सोभी राज़े इतिहासे कताबा दी आसा, जोआश राज़े शोहरूए बारै, ज़ुंण गूरै राज़ै जोआबा लै गल्ला प्रगट किई, जोआशै किहअ करै बणाअं बिधातो भबन मराम्मत करी भिई, इना सोभी गल्ले बारै लिखअ द। तेऊओ शोहरू अमास्या बणअ तेऊ बाद यहूदा मुल्खो राज़अ।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.