Kulvi Outer Seraji Bible
2 इतिहास 17
यहूदा मुल्खै बणअ जहोशापात राज़अ
राज़ै आसाह मरनै का बाद बणअ आजू तेऊओ शोहरू जहोशापात यहूदा मुल्खो राज़अ। तेऊ बढेरी इज़राईलीए मकाबलै लै आपणीं सैना खास्सी। यहूदा मुल्खे सोभी गहल़ा आल़ी नगरी अर एप्रैम मुल्खै ज़हा-ज़हा नगरी तेऊए बाब आसाह कबज़अ किअ थिअ, तिन्नां सोभी नगरी डाही तेऊ आपणीं सैना मांझ़ै ज़ुदी-ज़ुदी पल़टणा। बिधाता दैनी जहोशापाता लै बर्गत किल्हैकि सह रहअ आपणैं दाद-बाब राज़ै दाबेदा ज़िहअ बिधाता लै शुचअ-पाक्कअ अर सह निं बाल देअआ पूज़दअ डेऊअ। तेऊ किई आपणैं दादा-बाबे परमेशरे च़ाकरी अर तेऊ किअ ज़िहअ बिधाता बोलअ तिहअ ई अर तेऊ निं इज़राईल मुल्खे होरी राज़ै ज़िहै च़िल़्हखरै काम किऐ। बिधाता किअ यहूदा मुल्ख जहोशापाते बशै। सोभ लोग करा तै तेऊ सेटा भैंट आणी। इहअ करै हुअ सह खास्सअ सेठ अर सोभ करा तै तेऊओ अदर। सह रहअ बिधाता लै पठी शुचअ-पाक्कअ। उझै धारा मुहुर्ती पूज़ा करने गान-स्तान किऐ तेऊ आपणैं देशा का खतम अर तिंयां ज़ैगा बी किई तेऊ यहूदा मुल्खा का खतम ज़ेथ अशेरा देबीए पूज़ा करा तै।
जहोशापातै छ़ाडै आपणैं राज़ा दी चिऊथी साला आपणैं कार-करिंदै मांझ़ै पांज़ ज़ण्हैं यहूदा मुल्खे हर नगरी बिधाते बधाना सखाऊंदै। तिंयां पांज़ ज़ण्हैं तै बेनहेल, ओबेदियो, जकर्या, नतनेल अर मिका। तिन्नां संघै छ़ाडै लेबी मांझ़ा का नौ ज़ण्हैं अर प्रोहता मांझ़ा का दूई ज़ण्हैं। लेबी थिऐ शमयाह, नतानिया, जबदीया, असाहेल, शेमीरामोत, जोनातान, अदोनियाह, तोबियाह अर तोबियाह। तिन्नां संघै दूई प्रोहत थिऐ एलीशामा अर जेहोराम। तिन्नैं निंईं बिधाते बधाने कताब आप्पू संघै, तेखअ डेऊऐ यहूदा मुल्खै सोभी नगरी लोगा लै शिक्षा दैंदै।
जहोशापातो बल
बिधाता दैनअ जहोशापाता लै इहअ बल कि यहूदा मुल्खै ओरी-पोरीए देशा पल़ी यहूदीए एही डअर कि तिन्नें निं जहोशापाता संघै जुध छ़ेल़णै हिम्मत ई पल़दी ती। पलिश्ती मांझ़ै दैनी कई जहोशापाता लै च़ंदी अर कई च़िज़ा भैंट अर अरब देशा का बी दैनी कई लोगै सात हज़ार सात शौ गाभू अर सात हज़ार सात शौ बाकरे हेल़्ही भैंट। राज़अ जहोशापात रहअ बढदअ अर बलबान हंदअ लागी। सह रहअ सारै यहूदा मुल्खै नगरी फेर गहल़ा-कोटा च़िणदअ लागी अर तेथ डाहै तेऊ भढार भरी।
एरुशलेम नगरी हआ तै तेऊ सज़ाण शूरबीर अर जोधै डाहै दै। तिन्नां शूरबीरे दल तै यहूदा अर बिन्यामीन गोत्रा का तिन्नें टोलीए साबै ईंयां:
यहूदे दलो दलपति त अदना अर तेऊ का थिई चअन लाख सैना। दुजअ दलपति थिअ जहोहनान, तेऊ का थिई दूई लाख अश्शी हज़ार सैना सभाल़ी दी।
चिऊथअ दलपति थिअ ज़िक्रीओ शोहरू अमास्या अर तेऊ का थिई दूई लाख सैना। अमास्या त बिधाते च़ाकरी करना लै आप्पू अर्पण हुअ द। बिन्यामीन गोत्रे एकी टोली का थिअ एल्यादा, सह थिअ खास्सअ शूरबीर जोधअ। तेऊ का थिऐ दूई लाख ढाल़ अर कबाणा आल़ी सज़ाण सैना। तेऊ संघै दुजअ दलपति थिअ जोजबाद, तेऊ का थिई एक लाख अश्शी हज़ार सपाहीए सैना ज़ुंण जुध बिद्ये ज़ाण-प्रबीण थिऐ। ईंयां सपाही करा तै राज़धानी एरुशलेम राज़ै सेटा च़ाकरी। ईंयां थिऐ तेता का लाऊआ ज़ुंण राज़ै जहोशापातै यहूदा मुल्खै होरी गहल़ा आल़ी नगरी तै डाहै दै।
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.