Kulvi Outer Seraji Bible
1 पतरास 1
अदर
हुंह पतरास ज़ुंण प्रभू ईशू मसीहो शधाणूं आसा, हुंह लिखा ऐहा च़िठी मसीहा दी विश्वास करनै आल़ै तिन्नां परदेसी लै ज़ुंण पुंतुस, गलात, कप्पदुकिआ, एशिया अर बिथूनिया मुल्खे कई नगरी दी छिंघुई आसा बस्सै दै।
बाब परमेशरै छ़ांटै आप्पै तम्हैं पैहलै ई अर पबित्र आत्मां किऐ तम्हैं पबित्र। तम्हैं किऐ परमेशरै ईशू मसीहे लोहू दी शुचै अर तेऊए साबै ज़िन्दगी ज़िऊंणां लै ज़ुदै।
हुंह करा परमेशरा का एही अरज़ कि परमेशरा का लोल़ी तम्हां लै खास्सी झींण अर शांती भेटी।
एक ज़िऊंदी आशा
म्हारै प्रभू ईशू मसीहे बाब अर परमेशरो करा शूकर। अह आसा तेऊए महान झींण कि म्हारअ हुअ नऊंअ ज़ल्म। किल्हैकि तेऊ किअ प्रभू ईशू मसीहा मरी करै ज़िऊंदअ। ऐबै ज़िऊआ हाम्हैं म्हारी ज़िन्दगी पूरी आशा डाही। हाम्हैं आसा न्हैल़ै लागै दै कि हाम्हां सह ज़ैदात भेटे ज़ुंण परमेशरै हाम्हां लै आसा डाही दी। तेता निं कोहै बरैबाद करी सकदअ। नां कुंण तेता खोई सकदअ। तिंयां निं कधि पराणैं हणैं अर तेते शोभा रहणीं सदा। परमेशरै आसा तिंयां च़िज़ा स्वर्गै तम्हां लै डाही दी। परमेशर करा आपणीं महान शगती करै थारी हेर-सभाल़ किल्हैकि तम्हैं करा ईशू दी विश्वास। तेऊ डाहणैं आजू बी तम्हैं खिरीए तैहा धैल़ी तैणीं बच़ाऊई ज़ेभै मसीहा फिरी एछणअ। तेभै लागणअ तम्हां का थोघ कि परमेशरै हेरै तम्हैं पाप अर मौता का पठी बच़ाऊई।
इना सोभी गल्ले बारै लागा तम्हां खुश हणअ च़ाऐ एभै थोल़ी घल़ी कई रंगे तकलिफी तम्हां दुखी किल्है निं करे। इना दुखो मकसद हआ कि थारअ विश्वास परमेशरा दी पाक्कअ शुझिए। थारअ ईशू मसीहा दी विश्वास आसा सुन्नैं का बी खास्सअ किम्मती। ज़ुंण बरैबाद बी सका हई तेऊ सुन्नैं बी परखा अर आगी करै करा तेऊ शुचै, ज़ै थारअ विश्वास परखणैं अर दुखा दी पाक्कअ रहे, एता करै भेटणीं तम्हां तैहा धैल़ी खास्सी खुशी, प्रतप्प अर अदर ज़ेभै ईशू मसीहा सारै संसारै प्रगट हणअ।1
तम्हैं निं ईशू कधि आथी भाल़अ द, पर तज़ी बी डाहा तम्हैं तेऊ संघै झ़ूरी। तम्हैं निं सह एभै बी भाल़अ पर तम्हैं करा तेऊ दी विश्वास। एतो नतिज़अ आसा इहअ कि तम्हैं आसा बडै खुश कि हाम्हां का निं इना गल्ला खोज़णा लै बैण ई आथी कि तम्हैं किहै खुश आसा। तम्हैं आसा एते तैणीं खुश कि परमेशरै लाऐ तम्हैं पापे सज़ा भुगतणै का बच़ाऊई। थारै मसीहा ईशू दी विश्वास करनैओ मकसद आसा अह ई।
कई गूरै एऊ उद्धारे बारै खोज़अ द
एऊ ई उद्धारे बारै च़ाहा तै परमेशरे गूर होर बी खास्सअ थोघ लाणअ। तिन्नैं बोलअ एते बारै कि परमेशरा तम्हां संघै केही झींण करी दैणअ तम्हां लै उद्धार, ज़ेता जोगी तम्हैं नांईं आथी तै। तिन्नैं किई एते ज़बाबा लोल़णा लै खास्सी कोशिश। मसीहे आत्मां ती तिन्नां दी अर सह खोज़ा ती तिन्नां का कि मसीहा किहअ दुख ज़िरनअ अर तेखअ तेऊओ किहअ महान प्रतप्प हणअ। तिन्नैं लाअ एतो बी राम्बल़अ थोघ कि मसीहा कुंण हणअ अर सह केभै हणअ।2
परमेशरै खोज़अ तिन्नां गूरा का कि तेऊओ समाद नांईं त तिन्नां लै आथी पर अह आसा तम्हां लै। अह समाद आसा ईशू मसीहे बारै खुशीओ समाद ज़सरै बारै तम्हैं ऐबै शूणअ। परमेशरै छ़ाडी स्वर्गा का आपणीं पबित्र आत्मां कि सह लोगे खुशीए समादा तम्हां का खोज़णा लै मज़त करे। ईंयां गल्ला आसा एतरी महान कि स्वर्ग दूत बी हआ इना गल्ला हंदी भाल़णें ताका दी रहै दै।
पबित्र ज़िन्दगी ज़िऊंणेंओ निऊंद्रअ
तैही करा आपणैं मन्नां काबू करी परमेशरे साबै हर कामां करना लै तैर एही आशा डाही करै कि परमेशरा करनअ तम्हां लै भलअ ई भलअ कि तेऊ दैणअ तम्हां लै आपणैं जशा दी उद्धार ज़ेभै मसीहा ईशू स्वर्गा का फिरी एछणअ। परमेशरे मना हर गल्ला शोभलै लान्हैं ज़िहै ज़ुंण आपणैं बाबे हर गल्ला मना। तिन्नां कदुष्ट कामां निं ऐबै करा ज़ेता तम्हैं परमेशरो सत्त थोघ लागणै का आजी च़ाहा तै करनी। पर ऐबै लोल़ी तम्हैं सोभी साबै पबित्र रहै ज़ुंण बी तम्हैं करा। किल्हैकि ज़ुंणी परमेशरै तम्हैं छ़ांटै दै आसा, सह आसा पबित्र। किल्हैकि पबित्र शास्त्रा दी आसा लिखअ द,3
“पबित्र हआ, किल्हैकि हुंह आसा पबित्र।”
ज़ेभै तम्हैं अरज़ करा, तेभै बोला तम्हैं परमेशरा लै आपणअ बाब। पर ऐहा गल्ला डाहा आद कि सह निं कोही लै भेदभाब करदअ। सह करा हरेकी मणछो नसाफ तिन्नें कामां भाल़ी। तै ज़ेभै तैणीं तम्हैं ऐहा पृथूई दी परदेसी ज़िहै आसा, तम्हां लागा कबल्ली परमेशरो अदर करी ज़िन्दगी ज़िऊंणीं।4
तम्हां का लोल़ी थोघ हुअ कि परमेशरै तम्हैं बृथा बभारा का किहअ करै बच़ाऊऐ, ज़ुंण तम्हैं आपणैं दादा-बाबा का आसा शिखल़अ द। तेऊ निं तम्हैं सुन्नैं अर च़ंदी ज़ेही बरैबाद हणैं आल़ी ज़ैदाता करै बच़ाऊऐ। पर परमेशरै बच़ाऊऐ तम्हैं मसीहे किम्मती लोहू करै ज़ुंण म्हारै पापा लै बल़ीदान हुअ। तेऊए मौत ती हाम्हां लै सिध्द अर शुचअ बल़ीदान ज़िहअ यहूदी सिध्द मिम्मूं करा तै बल़ीदान ज़ेथ कोई दाग अर दोश नां होए।5
एऊ संसारा बणाणैं का आजी ई त परमेशरै आजू लै डाहअ द सोठी कि ईशू मसीहा हणअ पापा का बच़ाऊंणै आल़अ। पर सह हुअ ऐबै इना खिरीए धैल़ै एऊ संसारै थारी मज़त करना लै प्रगट।
ज़ुंण ईशू मसीहा म्हारी तैणीं किअ, तेता करै करा तम्हैं ऐबै परमेशरो विश्वास। थारी आशा अर भरोस्सअ आसा ऐबै परमेशरा दी। किल्हैकि तेऊ किअ मसीहा मरी करै भिई ज़िऊंदअ अर तेऊ लै दैनअ खास्सअ अदर।
ज़ांऊं तम्हैं परमेशरो सत्त मनअ, तम्हैं हेरै शुचै बणाईं। ऐबै लागा तम्हां आपणैं संघी विश्वासी संघै कबल्ली दिला-मन्नां का झ़ूरी करनी।
तम्हां लागा एकी-दुजै संघै झ़ूरी करनी ई करनी, किल्हैकि तम्हां आसा परमेशरा का नऊंईं ज़िन्दगी भेटी दी। तम्हां निं अह ज़िन्दगी किज़ू एही च़िज़ा करै आथी भेटी ज़ुंण बरैबाद हणीं, पर अह आसा तेता करै भेटी दी ज़ुंण सदा लै हणीं। हाम्हां आसा नऊंईं ज़िन्दगी परमेशरे ज़िऊंदै अर सदा रहणैं आल़ै बैणा करै भेटी दी। ज़िहअ परमेशर पबित्र शास्त्रा दी बोला,
“मणछ आसा घाहा ज़िहअ
अर एते सारी शोभा आसा घाहे फूला ज़ेही,
घाहा शुक्का अर फूल बी अल़ा धरनीं।
पर प्रभूओ बैण रहणअ जुगै-जुगै इहअ ई बणी।”
अह आसा खुशीए समादो बैण ज़ुंण तम्हां का आसा खोज़अ द।6
Source notes (6)
- Cross-reference याक. 1:12; आयू. 23:10; भज. 66:10; ईशा. 48:10
- Cross-reference 2 पत. 1:21; लूक. 24:25-27; ईशा. 52:13-14
- Cross-reference लेब. 11:44; 19:2; 20:7
- Cross-reference 2 इति. 19:7; भज. 28:4; ईशा. 59:18; जेर. 3:19; 17:10
- Cross-reference गल. 1:4; भज. 49:7-8; ईशा. 52:3
- Cross-reference लूक. 16:17; जोह. 1:1; ईशा. 40:8
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.