1 पतरास

1 पतरास

पतरासै लिखी दी पैहली च़िठी

भेत

लिखणैं आल़अ: पतरास

पहल़णैं आल़ै: एशिया मुल्खै उतर दिशा बाखा रहणैं आल़ै विश्वासी

सन: 62-65

पतरासे पैहली च़िठी लिखी ती तिन्‍नां मसीहा विश्वासीए नाओंऐं, ज़हा लै इधी “परमेशरे छ़ांटै दै लोग” आसा बोलअ द, ज़ुंण पूरै एशिया मुल्खे उतर दिशा बाखा मुल्खै छिंघुई तै बस्सै दै। ऐहा च़िठीओ खास मकसद आसा आपणैं तिन्‍नां पहल़णैं आल़ै लै जोश दैणअ, ज़ुंण आपणैं विश्वास करनै पिछ़ू दाह-दुख ज़िरदै थिऐ लागै दै। लिखणैं आल़अ करा इहअ आपणैं पहल़णैं आल़ै लै ईशू मसीहे खुशीए समादे आद फरेऊई करै, किल्हैकि ईशूए मौत, मरी करै भिई ज़िऊंदै हणअ अर फिरी एछणेंओ बाहिदअ दैआ तिन्‍नां लै आशा। एऊ साबै तै तिन्‍नां आपणैं दुख मनणै अर इहअ विश्वास करी ज़िरी कि अह आसा तिन्‍नें विश्वासे सत्ते परख, अर इहअ कि तेतो भाग भेटणअ “मसीहे प्रगट हणें धैल़ी।”

दाह-दुखे बगती हैअ विश्वास दैणैं संघा-संघा करा लिखणैं आल़अ एही अरज़ बी कि तेऊए पहल़णैं आल़ै लोग इहै लोगा ज़ेही काटे ज़ुंण मसीहे परज़ा आसा।

पतरास खोज़ा कबिता ज़ेही भाषा लिखी पहल़णैं आल़ै का इहअ कि मसीहा किज़ै किअ:

“हुंह बोला इहअ तै कि मसीहा भुगतअ दुख अर सह मूंअ म्हारै पापा पिछ़ू। सह मूंअ एकी बारी अर तेऊ निं भिई मरने ज़रुरत आथी। सह थिअ धर्मीं मणछ अर सह मूंअ हाम्हां पापी मणछा लै एते तैणीं कि सह हाम्हां परमेशरा नेल़ आणी सके। तिन्‍नैं पाई तेऊए देही मारी पर सह किअ पबित्र आत्में शगती करै ज़िऊंदअ।”

(3:18)

कताबे बांड

भेत 1:1,2

परमेशरे उद्धारे आद फरेऊंणी 1:3-12

पबित्र ज़िन्दगी लै शिक्षा 1:13—2:10

दुखे बगती मसीही विश्वासीए ज़िम्मैंबारी 2:11—4:19

विश्वासीए मानदारी अर च़ाकरी 5:1-11

नचोल़ 5:12-14