Kulvi Outer Seraji Bible
1 करिन्थी 16:14
Verse 14 is marked below, with the whole chapter around it. Read from the start
एरुशलेम नगरीए विश्वासी टोली लै दान
ऐबै दैंऊं हुंह थारै तिन्नां ढब्बै-धेल्ले बारै पुछ़ै दै सुआलो ज़बाब ज़ुंण एरुशलेम नगरीए पबित्र लोगा लै कठा किऐ तै, अर ज़िहअ हुकम मंऐं गलात मुल्खे टोली लै दैनअ त, तिहअ ई करा तम्हैं बी। हबते पैहलै धैल़ै करै तम्हैं सोभ मणछ-आपणीं कमाई भाल़ी धख-धख आप्पू सेटा डाही, ताकि ज़ेभै मुंह एछणअ तम्हां निं तेभै लोल़ी च़ंदअ कठा करनअ पल़अ।
ज़ेभै मुंह एछणअ, तेभै ज़हा शुचै-पाक्कै मणछा तम्हैं छ़ांटे तिंयां छ़ाडणैं ढब्बै-धेल्लै पजैल़ै एरुशलेम नगरी लै। मुंह दैणीं तिन्नां संघै एक च़िठी बी ज़ेता करै एरुशलेम नगरीए विश्वासी संघै तिन्नें बछ़ैण होए। ज़ै तम्हैं इहअ समझ़े कि मेरअ डेऊणअ बी आसा ठीक तै डेऊणअ हाम्हां संघा।
पल़सीओ रोम डेऊणेओ बच़ार
हुंह एछणअ मकिदुनिया बाती हई तम्हां सेटा लै, किल्हैकि मुंह डेऊणअ मकिदुनिया बाती। पर हई सका कि तम्हां ई सेटा बी रहूं, अर हिंऊंद काटूं तम्हां ई सेटा, तेखअ दैऐ मुंह पजैल़ी ज़ेथ बाखा लै मुंह डेऊणअ होए।
किल्हैकि हुंह निं ऐबै बाता-बाती तम्हां संघै सिधअ थोल़ी घल़ी मिलणअ च़ाहंदअ आथी, पर मुंह आसा आशा कि, ज़ै प्रभू च़ाहे ता, तै सका हुंह थोल़ै बगता लै तम्हां संघै रही, पर हुंह रहणअ पिन्तेकुस्त थैरा तैणीं इफिसुस नगरी दी, मुखा आसा इधी बधिया काम करनैओ मोक्कअ। एही ता आसा इधी खास्सै मणछ मेरै खलाफ।
ज़ै तिमोथी एछी जाए, तेऊओ करै बधिया सुआगत, किल्हैकि सह करा मुंह ई बराबर प्रभूओ काम। तम्हैं निं कोहै तेऊ होछ़ै समझ़ी आथी, पर राम्बल़ै करै दै तेऊ शांती संघै ओर्ही बाखा लै पजैल़ी, ताकि सह मुंह सेटा एछी सके, किल्हैकि मुंह हआ धैल़ तेऊ न्हैल़अ-भाल़अ लागअ द कि सह लोल़ी सोभी विश्वासी भाई संघै आअ।
विश्वासा दी मेरै भाई अपूलोसा का आसा मंऐं बडी अरज़ किई दी कि तम्हां सेटा लै लोल़ी होरी विश्वासी भाई संघै आअ। पर सह निं एभै डेऊणअ च़ाहंदअ, पर ज़ेभै तेऊ मोक्कअ भेटणअ, तेभै जाणअ सह एछी।
अदर अर खिरी हुकम दैणअ
बिहुदै रहा, विश्वासा दी रहा बणी, भलाई रहा करदै लागी, अर विश्वासा दी रहा पाक्कै।1 ज़ुंण बी काम तम्हैं करा तेऊ करा झ़ूरी संघै।
भाईओ, तम्हां का आसा स्तिफनुसै टबरो थोघ कि तिंयां आसा अखाया मुल्खै पैहलै ज़ुंण विश्वासा दी आऐ, अर तिंयां रहा पबित्र लोगे च़ाकरी लै तैर। एते तैणीं आसा तम्हां का मेरी अरज़ कि इहै लोगे रहा डरा हेठै, अर हर तिन्नां सोभी लोगे ज़ुंण एऊ कामां दी मैन्थ करा अर साझ़ आसा।
हुंह आसा स्तिफनुस अर फूरतूनातुस अर अखइकुसे एछणैं करै बडअ खुश, किल्हैकि तिंयां करा तै थारी मज़त पर मुल्है निं किई। तिन्नैं दैनअ मुल्है हैअ ज़िहअ तिन्नां तम्हां लै दैणअ ज़ेभै तिंयां तम्हां सेटा लै फिरी एछे।
पल़सीए सोभी लै राज्ज़ी-खुशी
एशिया रहणैं आल़ी टोलीए विश्वासी बाखा तम्हां लै सोभी लै राज्ज़ी-खुशी। अकबिला अर तेऊए लाल़ी प्रिस्किला अर तिन्नें पबित्र टोली ज़ुंण तिन्नें घअरै कठा हआ तिन्नां बाखा बी प्रभू ईशू दी तम्हां सोभी लै राज्ज़ी-खुशी। सोभी विश्वासी भाई बाखा बी आसा तम्हां सोभी लै राज्ज़ी-खुशी। पबित्र मल़्हैची दैई दैआ एकी-दुजै लै राज्ज़ी-खुशी।
हुंह पल़सी लिखा तम्हां सोभी लै आपणैं हाथै राज्ज़ी-खुशी। ज़ै कुंण प्रभू संघै झ़ूरी निं डाहे, तेऊ मणछा लागअ फिटक। म्हारअ प्रभू आसा एछणैं आल़अ।
प्रभू ईशूओ जश लोल़ी तम्हां लै हंदअ रहअ।
मेरी झ़ूरी आसा तम्हां सोभी लै ज़ुंण मसीहा ईशू संघै एक आसा। एवमस्तू।
Source notes (1)
- Cross-reference इफि. 6:10
Kulvi Outer Seraji Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.