Ê-phê-sô 5

1Iki, cóq cơt máh ti-cuôi táq veng Yang Arbang Pilŏ́ng, a-rớq a-cái a-con lư a-moih lư, 2a-lứng cóq tu-mống tớq callong ar-moih, mu chứng a-rớq Yang Choi Ta-mống khoiq a-moih top he dyơ mŏp cháq Án co top he a-rớq crơng nha mŏp sang a-lứng sáng thum lư mŏp dyôn Yang Arbang Pilŏ́ng.

3Ma callong bíq mu nơi, mu chứng cứp nốh tang-hang lớiq la ham crơng ngki êq taq-ntêr nnáng te top i-nha, a-rớq callong ngki la piaiq ada máh ti-cuôi tin, 4par-nai ntêr mmuaq, par-nai yúh, lớiq la par-nai lớiq tar-dyám — la máh nốh lớiq crái — ma lư tớq ngki par-nai si-ơn. 5Lư iki, cóq chom callong ndô ada ar-lớih idô cứp náq ti-cuôi bíq mu nơi, táq tang-hang, lớiq la ham crơng — ngki la ti-cuôi sang yang can-nŏ́h — lư ớq bôn chúng mun tớq cruông na Yang Choi Ta-mống nha Yang Arbang Pilŏ́ng. 6Êq dyôn nnáu pi-lốh i-nha na máh par-nai lớiq cơt callong, co te máh nốh ngki, callong ính táq na Yang Arbang Pilŏ́ng siar nga a-cái a-con lớiq cam-máng. 7Dyơ iki, i-nha êq cơt máh ti-cuôi chúng tưi a-lớng nha-án, 8co te nsuôi i-nha yôl tớq ngiau, ma ndô la callong ang tớq Yang. Cóq táq pôq a-rớq a-cái a-con na callong ang 9(co piêr cu-lái na callong ang át tớq cứp nốh ŏ, ti-nớng tu-pứng, nha callong piaiq), 10cóq si-suô mmo la nốh bui can-nính Yang. 11Êq táq nga máh ar-náq lớiq tar-náp na callong ngiau, ma cóq a-páh ar-náq ang ngki ŏ hơn, 12co lư la a-chiêt ndóng nưm taq-ntêr máh ar-náq nha-án táq clôp ngki. 13Ma cứp nốh bôn hôm ar-lớih ndóng bôn mpáh tớq callong ang, co cứp nốh bôn hôm ar-lớih la co callong ang. 14Co iki, bôn par-nai tông:

“Cóq yôr ayư, ơi ti-cuôi chóng bíq,

cóq yôr ta-yứng te callúng ti-cuôi cu-chet,

Yang Choi Ta-mống lư claq ang i-nha.”

15Iki, cóq mmứng ada car-siat te i-nha chón át tu-mống — êq a-rớq ti-cuôi a-chơ ma a-rớq ti-cuôi tu-báiq, 16ndóng táq ar-náq ŏ, co máh pang ndô la saq lư. 17Co iki, êq a-rớq ti-cuôi a-chơ, ma cóq chom mmo la can-nính na Yang. 18Êq bol siêu, co siêu ngki lư táq dyôn rúng. Ma, cóq dyôn táq sút na Ar-vai, 19tar-ôi ada tar-tuôq na cứh ayô, alhoiq cứh nha cứh ayô ar-vai nhéq te mít i-nha cứh a-lứng ayô Yang, 20mŏp par-nai si-ơn Yang Arbang Pilŏ́ng, la A-ám, tớq cứp nốh te cứp callong nhơ nốh Yang Choi Ta-mống Yê-su, Yang top he, 21cóq cam-máng tar-tuôq tớq callong dyám náp Yang Choi Ta-mống —

22Án cơt cam-pái, ca-yiêq án a-rớq Yang. 23Co ca-yiêq la plô cam-pái, mu chứng a-rớq Yang Choi Ta-mống la plô top tin — lư Án la Yang Choi Ta-mống na cháq. 24Ma, top tin cam-máng Yang Choi Ta-mống i-mo ngki cam-pái nha ca-yiêq án tớq cứp ar-náq lư iki. 25Án cơt ca-yiêq, cóq a-moih cam-pái án, mu chứng a-rớq Yang Choi Ta-mống khoiq a-moih top tin nha mŏp cháq án co top tin, 26dŏq Án têq dŏq mmar top ngki, vít ndóng táq dyôn práh te callong a-rau na dơq a-lứng te par-nai ŏ Yang, 27têq Án dông a-páh dyôn án táp mui top tin ang ưr, lớiq bôn a-áu lớiq la car-dyáp car-dyop, lớiq la bôn mui nốh mmo lớiq ŏ, ma dŏq top tin bôn práh ŏ a-lứng ớq ntúq tíq. 28Mu chứng a-rớq ngki ca-yiêq la cóq a-moih cam-pái án a-rớq a-moih cháq bôm. Án ca-yiêq a-moih cam-pái na án la a-moih cháq bôm. 29Co ớq nnáu a-ính cháq án bôm, ma chứm chiam a-lứng asa cháq bôm, mu chứng a-rớq Yang Choi Ta-mống táq dyôn top tin, 30co top he la máh phê te cháq Án. 31“Co te ngki, án ndon conh lư yáh a-ám a-i dyơ át mu nơi a-lớng cam-pái án, nha-án bar lư cơt mui sáiq.” 32Callong ca-tốq ndô lư sru lư — ma cư chón tông te Yang Choi Ta-mống a-lứng te top tin. 33Lư iki, i-nha ngki êq veng car-na ngki — chư mu náq — án ndon ca-yiêq cóq a-moih cam-pái án a-rớq cháq bôm, ma án cam-pái la cóq dyám náp ca-yiêq án.