Rome 10

1Ta ishuntso, ta kumutsi wozintte ta amudhizannan Xooz woosizanna Isra7eele attode fana. 2Un Xoozis mishinttane yezin, turii eratitsappa mishinttosanno ta markkidhane. 3Un Xoozze xillotits ogito eranxii ixxii, fa omma xillotitsi kaallidap attin Xoozze xillotitsi koyikaaya. 4Asi ubba ammanora xillode fana Kiristtoosa higge folida.

Atotitsi ubbuntsis

5Asi higge naagii ekkize xillotitsibaz Muse xaafittera, «Higge naagize oonin yinna higgito naagii de7o yezane»1yagayda. 6Yezin ammanora ekkize xillotitsbaz ga7inttidanna hyanno: «Ne wozintte, ‹Oonii salo kessade?› yaga7ippe; yinna Kiristtoosa wodhissades. 7Woy, ‹Sulle sa7a oomo wodhdhode oode?› ga7ippe; yinna Kiristtoosa boozappa kessodes.2 8Yezin yaga7i xaafinttida: ‹Qaala ne kale; ne doontte ne wozintte yene› Nuunii yinttis ohize ammano qaaltta hyanno.

9«Yesuusa Laatstsii» ga7i ne doontte markkidhiko Xoozii eza hyayqoppa dentsidanno ne wozintte ammaniko, ne attoda. 10Asi fa wozintte ammanii xillane; fa doontte markkidhii attane. 11Geeshi maxaafite, «Eza ammanze oonin yeellidhoos»3yagayda. 12Fettii Xoozze ubbunts Laatstsii maaqqide gisho Ayhuduntsana maaqqin Ayhude maaqqoosse asuntsi gidda dummatitsi baaya. E fana xeegize ubbuntsis fa anjjito gaantsi inggane. 13«Laatstse suntsito xeegize oonin attoda.»4

14Yeezin, un ammanosara wayzi eza xeegodes dandda7e? Un E baz si7ikaayzara wayzi eza ammanodes dandda7e? Mahi unttis qaala ohize asi baayzin, wayzi eza si7odes dandda7e? 15Kiitinttide asi baayzin, qaala wayzi ohinttodes dandda7e? Geeshi Maxaafite, «Ufays Wonggele ohize asuntsi tohita wayzi lo77o yessa!» yaga7i xaafinttida.5

16Yezin Isayaasa, «Laatstso, nu markkatitsito oode ammanido?» yaga7idanni fana, ubbuntsi Wonggele ammanikaaya.6 17Yinnii gisho, ammano sissappa ye7ine; si7izannan Kiristtoosa qaalappa ye7ine.

18Maaqqo yezin, Isra7eele asuntsi qaala si7ikaaya ga7ene? Ade si7ida. Geeshi Maxaafite,

«Un ootsita sa7a ubba sinttida,

un qaaltta sa7a gaxa yellida»7yagayda. 19Yezin Isra7eele asuntsi erikaaya ga7ene? Muse zaga,

«Taanii yinttana leqinttide asuntsara qiirissada;

mahi eeya asuntsara yinttana qiirissada»8yagayda.

20Mahi Isayaasa,

«Tana koykaayze asuntsis benttida;

tana oocikaayze asuntsis qonccida» 9

yaga7i zhashtikaayzara ohida.

21Yezin Isra7eele baz ohittera,

«Ubba qamma kiitinttoosse asuntsisin

tana ixxize asuntsis ta kushito miccida»10yagayda.