Kitaaba Qulqulluu, Biblica® Hiikkaa Ammayyaa Banamaa Haaraa, Loqoda Dhiʼaa
Faarfannaa 126
Faarfannaa Warra Boojuudhaa Deebiʼanii
Faarfannaa ol baʼuu.
Yeroo Waaqayyo warra boojiʼamanii turan gara Xiyoonitti deebisetti,
nu akka warra abjuu abjootanii taane.
Afaan keenya kolfaan, arrabni keenya immoo
faarfannaa gammachuutiin guutame.
Kana irratti saboota gidduutti,
“Waaqayyo waan guddaa isaaniif godheera” jedhame.
Waaqayyo waan guddaa nuuf godhe;
nus ni gammanne.
Yaa Waaqayyo, akkuma lagoota Negeeb,
boojuu keenya nuu deebisi.
Warri imimmaaniin facaasan,
faarfannaa gammachuutiin ni haammatu.
Namni sanyii facaafamu baadhatee booʼaa gad baʼu,
bissii isaa baadhatee faarfannaa gammachuu faarfachaa deebiʼa.
Kitaaba Qulqulluu, Biblica® Hiikkaa Ammayyaa Banamaa Haaraa, Loqoda Dhiʼaa. Copyright © 2022 Biblica, Inc. Licensed under CC BY-SA 4.0. “Biblica” is trademark registered in the United States Patent and Trademark Office by Biblica, Inc. Source: eBible.org. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-10-25.