Faarfannaa 101

Bulchiinsa Qajeelaa

Faarfannaa Daawit.

1Ani jaalala keetii fi murtii kee qajeelaa sanaaf nan faarfadha;

Yaa Waaqayyo ani siif nan faarfadha.

2Ani jireenya hirʼina hin qabne jiraachuuf of nan eeggadha;

ati yoom gara koo dhufta?

Ani garaa qulqulluudhaan,

mana koo nan jiraadha.

3Ani ija koo dura,

waan hamaa hin kaaʼu.

Hojii jalʼootaa nan jibba;

nattis hin qabatu.

4Namoonni yaada micciiramaa qaban narraa haa fagaatan;

ani jalʼina wajjin tokkummaa hin qabaadhu.

5Nama dhoksaan ollaa isaa hamatu kam iyyuu,

ani afaan nan qabachiisa;

nama tuffiin nama ilaaluu fi kan garaa of tuulu qabuuf,

ani obsa hin qabaadhu.

6Akka isaan na wajjin jiraataniif,

iji koo amanamoota biyyattii irra jiraatti;

namni karaa qajeelaa irra deemu, inni na tajaajila.

7Namni nama gowwoomsu tokko iyyuu

mana koo keessa hin jiraatu;

namni soba dubbatu tokko iyyuu

fuula koo dura hin dhaabatu.

8Ani jalʼoota biyyattii hunda,

ganama ganama nan barbadeessa;

warra waan hamaa hojjetan

magaalaa Waaqayyoo keessaa nan balleessa.