Zabuuriiwwan 61

Zabuurii Nama Boojiʼamee

Dura buʼaa faarfattootaatiif. Zabuurii Daawud kan miʼa ribuutiin faarfatame.

1Yaa Allaah, iyyata koo dhagaʼi;

duʼaa koos dhaggeeffadhu.

2Yeroo garaan koo citetti,

ani handaara lafaatii sin waammadha;

ati gara kattaa na caalaa ol dheeratuutti na geessi.

3Ati iddoo ani itti kooluu galuudhaatii;

fuula diina koo durattis gamoo jabaa dha.

4Ani bara baraan dunkaana kee keessa jiraachuu,

gaaddisa qoochoo keetii jalattis kooluu galuu nan hawwa.

5Yaa Allaah, ati wareega koo dhageesseertaatii;

dhaala warri maqaa kee sodaatan argatanis naa kenniteerta.

6Bara jireenya mootii, umurii isaa illee

dhalootaa gara dhalootaatti dheeressi.

7Innis fuula Allaaha duratti bara baraan haa moʼu;

akka jaalalli keetii fi amanamummaan kee isa eeganis godhi.

8Anis faarfannaa galataa maqaa keetiif nan faarfadha;

guyyuma guyyaanis wareega koo nan guuttadha.