Zabuuriiwwan 58

Abbaa Murtii Kan Abbootii Murtii Biyya Lafaa

Dura buʼaa faarfattootaatiif. Yeedaloo “Hin balleessin” jedhuun faarfatame. Zabuurii Daawudi. Miiktaamii.

1Yaa bulchitoota, isin dhugumaan waan qajeelaa dubbattanii?

Nama gidduuttis murtii qajeelaa kennitanii?

2Akkas miti; isin garaa keessan keessatti hammina yaaddu;

harki keessanis lafa irratti goolii kaasa.

3Namoonni hamoon dhalootumaa kaasanii karaa irraa jalʼatu;

gadameessa haadha isaaniitii jalqabaniis karaa irraa goranii soba dubbatu.

4Hadhaan isaanii akkuma hadhaa bofaa ti;

isaan akkuma buutii duudaa gurra isaa cuqqaalatee

5sagalee nama isa raatessuu yookaan nama waan ittiin isa raatessu

hojjetu tokkoo dhagaʼuu diduu ti.

6Yaa Allaah ati ilkaan isaanii afaan isaanii keessatti caccabsi;

qarriffaa leencotaas daaki, yaa Rabbii Allaah!

7Isaan akkuma bishaan dhangalaʼee baduutti haa badan;

yeroo iddaa futtaasanitti xiyyi isaanii haa doomu.

8Akkuma ciilalluu yommuu deemu baquutti,

akkuma daaʼima utuu yeroon hin gaʼin dhalatuuttis aduu hin argin.

9Utuu okkoteen keessan ibidda qoraattiitiin hin hoʼin,

jiidhaas taʼu gogaan isaanii haxaaʼamanii balleeffamu.

10Namni qajeelaan yommuu haaloo baʼuu kana argutti ni gammada;

miilla isaas dhiiga namoota hamootiin ni dhiqata.

11Yommus namoonni akkana ni jedhu;

“Dhugumaan nama qajeelaadhaaf badhaasni jira;

dhugumaan Allaahan lafa irratti murtii kennu jira.”