Zabuuriiwwan 54

Allaahatti Abbaa Murtii Qajeelaatti Iyyachuu

Dura buʼaa faarfattootaatiif. Miʼa ribuutiin. Maskiilii Daawud. Yeroo warri Ziif Saaʼol bira dhaqanii, “Daawud nu gidduu dhokatee jira” jedhanitti faarfatame.

1Yaa Allaah, maqaa keetiin na fayyisi;

humna keetiinis naa murteessi.

2Yaa Allaah, duʼaa koo naa dhagaʼi,

dubbii afaan kootiis dhaggeeffadhu.

3Keessumoonni natti kaʼaniiruutii;

warri garaa namaa hin laafne lubbuu koo galaafachuu barbaadu;

Isaanis warra Allaahaf ulfina hin kenninee dha.

4Kunoo, Allaahan gargaaraa koo ti;

Gooftaan jiraachisaa lubbuu koo ti.

5Hamminni warra maqaa na balleessanii isaanumatti haa deebiʼu;

atis amanamummaa keetiin isaan balleessi.

6Ani fedhii kootiin aarsaa siif dhiʼeessa;

yaa Rabbii Allaah, ani maqaa kee nan galateeffadha;

inni gaariidhaatii.

7Inni dhiphina koo hundumaa keessaa na baaseeraatii;

iji koos ol aantummaadhaan diinota koo of jalatti ilaaleera.