Zabuuriiwwan 48

Xiyoon Tulluu Allaaha

Weedduu. Zabuurii Ilmaan Qooraahi.

1Magaalaa Allaah keenyaa keessatti,

tulluu isaa qulqulluu irrattis, Rabbii Allaahan guddaa dha;

waan hundaa olittis galanni isaaf mala.

2Tulluun Xiyoon gara kaabaatti argama;

dheerina isaatiinis ni bareeda.

Innis gammachuu addunyaa hundaa ti;

magaalaa Mooticha Guddaatis.

3Allaahan daʼannoo ishee keessa jira;

inni daʼannoo ishee taʼuu isaa argisiiseera.

4Mootonni humna walitti daratanii

tokkummaadhaan itti qajeelan.

5Isaanis ishee arganii dinqifatan;

sodaataniis baqatan.

6Achittis akkuma muddama dubartii ciniinsifattuutti,

hollannaan isaan qabate.

7Atis bubbee baʼa biiftuutiin

dooniiwwan Tarshiish caccabsite.

8Akkuma dhageenye sana,

magaalaa Rabbii Allaah Waan Hunda Dandaʼuu keessatti,

magaalaa Allaah keenyaa keessatti, akkasuma argineerra;

Allaahan bara baraan jabeessee ishee dhaaba.

9Yaa Allaah, nu mana qulqullummaa kee keessatti,

jaalala kee kan hin geeddaramne sana irra deddeebinee yaadna.

10Yaa Allaah, galanni kee akkuma maqaa keetii

handaara lafaa gaʼa;

harki kee mirgaas qajeelummaan guutameera.

11Sababii murtii keetiitiif,

Tulluun Xiyoon haa gammaddu;

intallan Yihuudaas haa ililchan.

12Xiyoon irra naannaʼaa; naannoo ishee irras adeemaa;

gamoowwan ishees lakkaaʼaa.

13Dhaloota itti aanutti akka himtaniif,

dallaa eegumsa ishee sirriitti hubadhaa;

galma ishees ilaalaa.

14Allaahan kun bara baraa hamma bara baraatti Allaah keenyaatii;

inni hamma dhumaatti illee nu qajeelcha.