Zabuuriiwwan 38

Duʼaa yeroo dhiphinaa

Zabuurii Daawud. Yaadannoodhaaf.

1Rabbii Allaah, aarii keetiin na hin ifatin

yookaan dheekkamsa keetiin na hin adabin.

2Xiyyooliin kee na waraananiiru;

harki kees akka malee natti ulfaateera.

3Sababii dheekkamsa keetiitiif dhagni koo fayyaa dhabeera;

sababii cubbuu kootiifis lafeen koo nagaa dhabeera.

4Cubbuun koo na liqimseeraatii;

akkuma baʼaa baatamuu hin dandaʼamne tokkoottis natti ulfaateera.

5Sababii gowwummaa kootiitiif,

madaan koo malaa naqate; ni ajaaʼes.

6Ani gad nan qabame; gadis nan cabe;

guyyaa guutuus gaddaan oola.

7Dugdi koo na bobaʼa;

dhagni koos fayyaa hin qabu.

8Ani laafeera; akka malees bututeera;

garaan koo dhiphatee ani aadaan jira.

9Yaa Gooftaa, hawwiin koo hundinuu fuula kee duratti beekamaa dha;

argansuun koo si duraa hin dhokatu.

10Lapheen koo ni dhaʼatti; jilbis na laafeera;

ifni ija kootiis badeera.

11Michoonni koo fi miiltoon koo sababii madaa kootiitiif narraa hiiqan;

firoonni koos narraa fagaatanii dhadhaabatu.

12Warri lubbuu koo galaafachuu barbaadan kiyyoo naa kaaʼaniiru;

warri na miidhuu barbaadanis waaʼee badiisa kootii dubbatu;

guyyaa guutuus hammina natti yaadu.

13Ani garuu akkuma duudaa dhagaʼuu hin dandeenyee,

akkuma arrab-didaa dubbachuu hin dandeenyeetii.

14Ani akka nama dhagaʼuu hin dandeenyee,

akkuma nama afaan isaa deebii kennuu hin dandeenyees taʼeera.

15Rabbii Allaah, ani sin eeggadha;

yaa Allaah Goofticha ko, ati deebii naa kennita.

16Ani, “Akka diinonni koo natti gammadan

yookaan akka isaan yeroo miilli koo mucucaatutti natti of jajan

hin eeyyamin” jedheeraatii.

17Ani kufuu gaʼeeraatii;

dhukkubbiin koos takkumaa na hin dhiifne.

18Ani balleessaa koo nan himadha;

sababii cubbuu kootiitiifis nan gadda.

19Warri akkasumaan diinota koo taʼan jajjaboo dha;

warri sababii malee na jibbanis hedduu dha.

20Warri qooda waan gaarii waan hamaa naa deebisan diinota koo ti;

ani waan gaarii duukaa nan buʼaatii.

21Rabbii Allaah, ati na hin gatin;

yaa Allaah ko, narraa hin fagaatin.

22Yaa Gooftaa, yaa fayyisaa ko,

na gargaaruudhaaf ariifadhu!