Zabuuriiwwan 27

Ija Jabina Nama Allaaha

Zabuurii Daawud.

1Rabbii Allaahan ibsaa kootii fi fayyina koo ti;

ani eenyunan sodaadha?

Rabbii Allaahan daʼoo jireenya kootii ti;

eenyutu na sodaachisa?

2Namoonni hamoon yommuu

foon koo nyaachuudhaaf natti dhufan,

diinonni koo fi amajaajonni koo

yommuu na miidhuuf natti kaʼan, gufatanii kufu.

3Yoo duulli na marse illee,

garaan koo hin sodaatu;

yoo waraanni natti baname illee

ani hin raafamu.

4Ani waan tokko Rabbii Allaah duratti duʼaa nan godhadha;

waan kanas nan barbaada:

Kunis bara jireenya kootii guutuu

mana Rabbii Allaah keessa jiraachuu,

miidhagina Rabbii Allaah ilaaluu fi mana qulqullummaa isaa

keessatti isa duʼaa gochuu dha.

5Inni guyyaa rakkinaa

iddoo ofii jiraatu na kaaʼataatii;

daʼoo dunkaana isaa jala na dhoksa;

kattaa gubbaattis ol na baasa.

6Yommus diinota na marsanii olitti

mataan koo ol jedha;

dunkaana isaa keessatti illee ililleedhaan aarsaa nan dhiʼeessa;

Rabbii Allaahaf nan faarfadha; nan weeddisas.

7Rabbii Allaah, yommuu ani si waammadhu, sagalee koo dhagaʼi;

naaf araarami; deebiis naaf kenni.

8Yommuu ati, “Fuula koo barbaadaa!” jettetti,

garaan koo, “Rabbii Allaah, ani fuula kee nan barbaada” siin jedha.

9Fuula kee na duraa hin dhoksin;

aartee tajaajilaa kee of irraa hin deebisin;

ati gargaaraa koo taateerta.

Yaa Allaah, Fayyisaa ko,

na hin gatin; na hin dhiisinis.

10Yoo abbaan kootii fi haati koo na dhiisan illee,

Rabbii Allaahan na simata.

11Rabbii Allaah, karaa kee na barsiisi;

sababii ani diinota baayʼee qabuuf

daandii qajeelaa irra na buusi.

12Fedhii diinota kootiitti dabarsitee na hin kennin;

dhuga baatonni sobduun narratti kaʼaniiruutii;

isaanis hafuura jalʼinaa baafatu.

13Anis biyya jiraattotaa keessatti

gaarummaa Rabbii Allaah akkan argu

amma iyyuu nan amana.

14Rabbii Allaah eeggadhu;

cimi; jabaadhus;

Rabbii Allaah eeggadhu.