Biblica® Open Odia Contemporary Bible
ମାର୍କ 2
ପକ୍ଷାଘାତଗ୍ରସ୍ତ ଲୋକ ସୁସ୍ଥ ହେଲା
କିଛିଦିନ ଉତ୍ତାରେ ଯୀଶୁ ଯେତେବେଳେ ପୁନର୍ବାର କଫର୍ନାହୁମକୁ ଗଲେ, ସେ ଘରକୁ ଆସିଛନ୍ତି ବୋଲି ଲୋକେ ଶୁଣିବାକୁ ପାଇଲେ। ସେମାନେ ଏତେ ବେଶି ସଂଖ୍ୟାରେ ଏକତ୍ର ହେଲେ ଯେ, ଦ୍ୱାର ତଥା ତାହା ପାଖରେ ଟିକିଏ ବି ଜାଗା ରହିଲା ନାହିଁ। ସେ ସେମାନଙ୍କ ନିକଟରେ ବାକ୍ୟ ପ୍ରଚାର କଲେ ସେତେବେଳେ କେତେକ ଲୋକ ଜଣେ ପକ୍ଷାଘାତ ରୋଗୀକୁ ଚାରି ଜଣଙ୍କ ଦ୍ଵାରା ବହନ କରାଇ ଯୀଶୁଙ୍କ ନିକଟକୁ ଆଣିଲେ କିନ୍ତୁ ଲୋକଗହଳି ହେତୁ ସେମାନେ ତାକୁ ଯୀଶୁଙ୍କ ନିକଟକୁ ନେଇପାରିଲେ ନାହିଁ, ତେଣୁ ସେମାନେ ଯୀଶୁଙ୍କ ମୁଣ୍ଡ ଉପର ଛାତରେ ଗୋଟିଏ କଣା କରି ପକ୍ଷାଘାତ ରୋଗୀ ଶୋଇଥିବା ବିଛଣାସହ ତଳକୁ ଖସାଇ ଦେଲେ। ଯୀଶୁ ସେମାନଙ୍କ ବିଶ୍ୱାସ ଦେଖି ସେହି ପକ୍ଷାଘାତ ରୋଗୀକୁ କହିଲେ, “ପୁଅ, ତୁମର ପାପସବୁ କ୍ଷମା ହେଲା।”
ସେଠାରେ କେତେଜଣ ଶାସ୍ତ୍ରଜ୍ଞ ବସିଥିଲେ, ସେମାନେ ମନେ ମନେ କହିଲେ, “ଏ ଲୋକ କାହିଁକି ଏପରି କହୁଛି? ଏ ଲୋକ ଈଶ୍ୱରନିନ୍ଦା କରୁଛି! କେବଳ ଈଶ୍ୱରଙ୍କ ଛଡ଼ା ଆଉ କିଏ ପାପକ୍ଷମା କରିପାରେ?”
ଯୀଶୁ ସେହିକ୍ଷଣି ସେମାନଙ୍କ ମନର ଭାବନା ନିଜ ଆତ୍ମାରେ ଜାଣିପାରି ସେମାନଙ୍କୁ କହିଲେ, “ତୁମ୍ଭେମାନେ କାହିଁକି ଏ ବିଷୟରେ ମନେ ମନେ ଯୁକ୍ତି କରୁଛ? କଣ ସହଜ, ‘ପକ୍ଷାଘାତ ରୋଗୀକୁ ତୋର ପାପସବୁ କ୍ଷମା ହେଲା’ ବୋଲି କହିବା, ନା ‘ତୋର ବିଛଣା ଧରି ଚାଲ’ ବୋଲି କହିବା? ତୁମ୍ଭେମାନେ ଜାଣିବ ଯେ, ଏହି ପୃଥିବୀରେ ପାପକ୍ଷମା କରିବାକୁ ମନୁଷ୍ୟପୁତ୍ରଙ୍କର କ୍ଷମତା ଅଛି,” ଏହାପରେ ସେ ପକ୍ଷାଘାତ ରୋଗୀକୁ କହିଲେ, “ମୁଁ ତୁମକୁ କହୁଛି ଉଠ, ତୁମର ବିଛଣା ନେଇ ଘରକୁ ଯାଅ।” ଏଥିରେ ସେହି ଲୋକ ଉଠିଲା ଓ ତାହାର ବିଛଣା ଧରି ସମସ୍ତଙ୍କ ଦୃଷ୍ଟିଗୋଚରରେ ଚାଲିଗଲା! ସମସ୍ତେ ଚମତ୍କୃତ ହେଲେ ଏବଂ ଈଶ୍ୱରଙ୍କ ପ୍ରଶଂସା କରି କହିଲେ, “ଆମେ କେବେ ଏପରି ଦେଖି ନ ଥିଲୁ।”
ଯୀଶୁ ପୁନର୍ବାର ହ୍ରଦକୂଳକୁ ଗଲେ ଲୋକମାନେ ବହୁସଂଖ୍ୟାରେ ତାହାଙ୍କ ନିକଟକୁ ଆସିବାରୁ ସେ ସେମାନଙ୍କୁ ଶିକ୍ଷାଦେବାକୁ ଲାଗିଲେ। ସେ ଯାଉଁ ଯାଉଁ ଆଲ୍ଫିୟସ୍ଙ୍କ ପୁତ୍ର ଲେବୀଙ୍କୁ କରଆଦାୟ ସ୍ଥାନରେ ବସିଥିବାର ଦେଖିଲେ ଯୀଶୁ ତାଙ୍କୁ କହିଲେ, “ମୋର ଅନୁଗମନ କର।” ଲେବୀ ଉଠି ତାଙ୍କର ଅନୁଗମନ କଲେ।
ଯୀଶୁ ଲେବୀଙ୍କ ଗୃହରେ ଭୋଜନରେ ବସିଥିଲାବେଳେ ଅନେକ କରଆଦାୟକାରୀ ଓ ପାପୀଷ୍ଠ ଲୋକ ମଧ୍ୟ ଯୀଶୁ ଓ ତାଙ୍କ ଶିଷ୍ୟମାନଙ୍କ ସହିତ ଭୋଜନ କରୁଥିଲେ, କାରଣ ଅନେକେ ତାଙ୍କର ଅନୁଗାମୀ ଥିଲେ। କିନ୍ତୁ ଫାରୂଶୀ ଦଳର କେତେକ ଶାସ୍ତ୍ରଜ୍ଞ ଯୀଶୁଙ୍କୁ ପାପୀଷ୍ଠ ଲୋକ ଓ କର ଆଦାୟକାରୀମାନଙ୍କ ସହିତ ଭୋଜନ କରୁଥିବା ଦେଖି ତାଙ୍କ ଶିଷ୍ୟମାନଙ୍କୁ ପଚାରିଲେ, “ସେ କାହିଁକି କରଆଦାୟକାରୀ ଓ ପାପୀଷ୍ଠ ଲୋକଙ୍କ ସହିତ ଭୋଜନ କରନ୍ତି?”
ଏ କଥା ଶୁଣି ଯୀଶୁ ସେମାନଙ୍କୁ ଉତ୍ତର ଦେଲେ, “ସୁସ୍ଥ ଲୋକମାନଙ୍କର ଚିକିତ୍ସକଠାରେ ପ୍ରୟୋଜନ ନ ଥାଏ, ମାତ୍ର ଅସୁସ୍ଥ ଲୋକମାନଙ୍କର ପ୍ରୟୋଜନ ଥାଏ। ମୁଁ ଧାର୍ମିକ ଲୋକଙ୍କୁ ଆହ୍ଵାନ କରିବାକୁ ଆସି ନାହିଁ, ମାତ୍ର ପାପୀ ଲୋକଙ୍କୁ ଆହ୍ଵାନ କରିବାକୁ ଆସିଅଛି।”
ଉପବାସ ସମ୍ବନ୍ଧରେ
ଯୋହନଙ୍କ ଶିଷ୍ୟମାନେ ଓ ଫାରୂଶୀମାନେ ଉପବାସ କରୁଥିଲେ କେତେକ ଲୋକ ଆସି ଯୀଶୁଙ୍କୁ ପଚାରିଲେ, “ଯୋହନଙ୍କର ଓ ଫାରୂଶୀମାନଙ୍କର ଶିଷ୍ୟମାନେ ଉପବାସ କରୁଛନ୍ତି, କିନ୍ତୁ ଆପଣଙ୍କ ଶିଷ୍ୟମାନେ କାହିଁକି କରୁନାହାନ୍ତି?”
ଯୀଶୁ ଉତ୍ତର ଦେଲେ, “ବର ସଙ୍ଗରେ ଥିବା ପର୍ଯ୍ୟନ୍ତ ବରଯାତ୍ରୀମାନେ କଅଣ ଉପବାସ କରିପାରନ୍ତି? ବର ସେମାନଙ୍କ ସଙ୍ଗେ ଥିବାଯାଏ ସେମାନେ ଉପବାସ କରିପାରନ୍ତି ନାହିଁ। ମାତ୍ର ସମୟ ଆସିବ, ଯେତେବେଳେ ବର ସେମାନଙ୍କ ନିକଟରୁ ନିଆଯିବେ, ସେହିଦିନ ସେମାନେ ଉପବାସ କରିବେ।
“ପୁରୁଣା ଲୁଗାରେ କେହି ନୂଆ ଲୁଗାର ତାଳି ପକାଏ ନାହିଁ। ସେ ତାହା କଲେ ନୂଆ ଲୁଗାର ତାଳି ପୁରୁଣା ଲୁଗାକୁ ଟାଣି ଛିଣ୍ଡାଇ ଦିଏ ଓ କଣାକୁ ବଡ଼ କରିଦିଏ। ଆହୁରି ମଧ୍ୟ, ପୁରୁଣା ଦ୍ରାକ୍ଷାରସ କୁମ୍ପାରେ କେହି ନୂଆ ଦ୍ରାକ୍ଷାରସ ରଖେ ନାହିଁ। ସେ ତାହା କଲେ, କୁମ୍ପାକୁ ମଦ ଫଟାଇଦିଏ, ମଦ ଓ କୁମ୍ପା, ଉଭୟେ ନଷ୍ଟ ହୋଇଯାଏ। ତେଣୁ ନୂଆ ଦ୍ରାକ୍ଷାରସ ନୂଆ କୁମ୍ପାରେ ରଖାଯାଏ।”
ଖ୍ରୀଷ୍ଟ ବିଶ୍ରାମବାରର କର୍ତ୍ତା
ଏକଦା ଶାବତବାରରେ ଯୀଶୁ ଶସ୍ୟକ୍ଷେତ୍ର ମଧ୍ୟରେ ଯାଉଥିଲେ ଓ ଶିଷ୍ୟମାନେ ଯାଉଁ ଯାଉଁ ଶସ୍ୟର ଶିଂଷା ଛିଣ୍ଡାଇବାକୁ ଲାଗିଲେ ଏଥିରେ ଫାରୂଶୀମାନେ ଯୀଶୁଙ୍କୁ କହିଲେ, “ଦେଖନ୍ତୁ, ଶାବତବାରରେ ଯାହା କରିବା ବିଧିସଙ୍ଗତ ନୁହେଁ, ସେମାନେ କାହିଁକି ତାହା କରୁଛନ୍ତି?”
ସେ ଉତ୍ତର ଦେଲେ, “ଦାଉଦ ଓ ତାଙ୍କ ସହଚରମାନେ ଅଭାବରେ ଥିଲାବେଳେ କ୍ଷୁଧିତ ହୋଇ କଅଣ କରିଥିଲେ, ତାହା କଅଣ ତୁମ୍ଭେମାନେ କେବେ ପଢ଼ି ନାହଁ? ମହାଯାଜକ ଅବିୟାଥରଙ୍କ ଅମଳରେ ଦାଉଦ ଈଶ୍ୱରଙ୍କ ମନ୍ଦିରରେ ପ୍ରବେଶ କରି ଯେଉଁ ଦର୍ଶନୀୟ ରୋଟୀ କେବଳ ଯାଜକମାନଙ୍କ ଭୋଜନ କରିବା ବିଧିସଙ୍ଗତ, ତାହା ଭୋଜନ କରିଥିଲେ ପୁଣି, ସେ ତାଙ୍କର ସହଚରମାନଙ୍କୁ ମଧ୍ୟ ଦେଇଥିଲେ।”
ତା ପରେ ସେ ସେମାନଙ୍କୁ କହିଲେ, “ଶାବତବାର ମନୁଷ୍ୟ ନିମନ୍ତେ ହୋଇଅଛି, ମନୁଷ୍ୟ ଶାବତବାର ନିମନ୍ତେ ନୁହେଁ। ଅତଏବ ମନୁଷ୍ୟପୁତ୍ର ଶାବତବାରର ମଧ୍ୟ ପ୍ରଭୁ ଅଟନ୍ତି।”
Biblica® Open Odia Contemporary Bible. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.