Ombo Traduction
Luk 17
Yesu omboekya aliko la nkɛɛ njambi la nsokola
(Mat 18.6-7; 18.21-22; Mlk 9.42)
Pa, Yesu aasimeli baeki bande nte: «Besao be mbila banto o njambi bekondo memeyaka too. Kinaki, ŋandi ele ongo aela beko waanto. Kotoyala bɔlɔti ele ongo onto alɛmame libwɛ linɛnɛ o nkingo la aokame e wango, kuliko ndako nkɔɛya ɔmɔɔ asamba banɛ basali o njambi».
«Ayeka nyo! Iya aotwa labɛ akɔkɛɛlake bobe, laka ndako lilako. La aimeyake, oosokolele. La iya akɔkɛɛlake obe mala esambaele o wiina ɔmɔɔ, la aandake kaɛɛ nɔmba oosokolele mala esambaele, sokolela ndako».
Yesu omboekya banto aliko la Lokani
Pa ango Bakɛndi* baosimeli Bɔkɔta nte: «Haa Bɔkɔta, otokokeya lokani». Ndako ŋango akɔ nte: «Iya lokani lanyo lotoyala inchɛ wɛɛnte yuuma ya aladali, ɔtɔɔsɔna nsimela bɔnɛ bote nte wiiphikole la ochu mbwiyoka e wango, la bako botokooka nyo».
Bolemo ba bokambi
Yesu ɔlɔndi lonkinɛ nte: «Bonto ɔmɔɔ asamba nyo aɔsɔna njala la bokambi ande ataochaela ebeli aɔ mbookombelela bokonja bande. Onɛ bokambi autolake weebeli, onde, Bɔkɔta ande aɔsɔna mboosimela nte ayale la, manja ndɛ? Jɛ! Aɔsɔna mboosimela nte: ‹Onambele obi lilɛ, pa weengole esenda aliko ompakolele lilɛ. Ɔkɔngɔ labɛ akondɔlɛ la nywa›. Onde, atakanya nyo nte Bɔkɔta aongo bokambi aɔsɔna mboosakoya aliko ombo kokya lalikuli biosimeli wɛɛ? Jɛ! Lanyo ŋango akɔ too. Eleko ɛkɛɛnyo ele Kanamombe* ombokolaka nyo nkɛɛ, yala nyo atalɔndɛ nte: ‹Iso tolende bakambi bale koo faida too. Tombo kɛɛ bolemo bɔnɛ basana iso nkɛɛ›».
Yesu ombwikya baso nsuli joomu
Yesu aiki ndako ɛ lɔkɛndɔ nchwa ɛ Yɛlusalɛma, aeteli weelelo be wooni ba Samaliya la ba Galilaya. Aingeli ndako ɔɔsɛngɛ bɔmɔɔ, baso nsuli joomu baandi nsaŋani lande. Baemali1 bɔɔ lande, la manja mbokoma nte: «Haa Weekisi, Yesu, ɔtɔɛnɛlɛ ŋandi»!
Eleko ɛbaɛni Yesu aasimeli nte: «Chwaka nyo lokoiyɛnya nyo ele Baeta atei2*». Aiki bako batachu engo baiki baloko e mboka, baiki.
Ango ɔmɔɔ asamba bako aɛni nte ombwika, autoli ɔkɔngɔ atakucha Kanamombe* la jooi linɛnɛ. Aiyoki anyɔi otamboka la bekolo be Yesu, la elongi ende eiye nende ɛ lɔmɔtu, aosakoisa. Ongo onto aiki nde Musamaliya*. Ango Yesu alɔndi nte: «Onde, mbɔ baso nsuli joomu ko baikisami! Bango bankinɛ libwa bale ende? Koo mɛnamwa onkinɛ asamba bako autoli nkucha Kanamombe*, ila too ɔnɛ ole ataika Muyuda»? Pa aɔsimeli ɔnɛ Musamaliya nte: «Emala, wiichwele la bii. Lokani labɛ lombo kuikya».
Manda ya ekeleka e Kanamombe*
(Mat 24.23-28; 24.37-41)
Pa Bafalisayo* baumboli Yesu nte: «Ekeleka e Kanamombe* keanda eleko nke»? Yesu abauchisa nte: «Ekeleka e Kanamombe* pheketaande wɛɛnte ekambwa etaenamwa. Banto phaalɔndaki nte: ‹Ena nyo n'kɛɛnɛ ele anɛ›! Aɔ ‹Nkengo ele ango›! Oka nyo! Engo ekeleka kelende tayali asamba nyo».
Pa, Yesu asimeli baeki* bande nte: «Wiina laanda eleko elanga nyo mɛna lemi Bɔna a Onto koonga luina lɔmɔɔ, kinaki phɔmɛnaki nyo. La banto bakondo kosimela nyo nte: ‹Lenda, olende ango›! Aɔ ‹Lenda, olende anɛ!› Kinaki nyo kokɛkɛlake nyo nchwa engo. Aliko luina lemi Bɔna a Onto mbutolaki, mɛnamwaki wɛɛnte ibalibali yɛɛnamwaka e loola omɛnya wooni lalikuli. Kinaki otamboka ba ingo lalikuli, kasana m'mɛni toakola ike, la nkilama la banto ba biina ba lɛlɔ. Bolengo baiki kako o biina bɛ Nɔwa, ŋango nde bayala kako e utolaki lemi Bɔna a Onto. Aliko bingo biina, banto ba memeisa ndɛ la nywa, nsɔnga la nsɔngwa, nende eleko engo Nɔwa aingeli e Safina. Pa mpela keandi nsila banto lalikuli3. Kakondo yala ŋango akɔ wɛɛnte baiki kako weeleko ɛ Lɔti. Banto ba memeisa ndɛ la nywa, nsomba la nsombya, mona biuma la mpika mbulu. Kinaki luina longo lapasi Lɔti ɛ Sɔdɔmɔ, Kanamombe akwɛisa iya wɛɛnte mbula yaabwɛ mima e loola. Ingo iya ya sili banto lalikuli4. Ŋango nde bayala kako luina longo lemi Bɔna a Onto mbutolaki.
«Luina longo, ongo ayala eliko e lulu atakitelake lonkinɛ mbɔsa bikambwa bende otema. Lonkinɛ ŋango akɔ, ongo ayala weebeli ende atautolake lonkinɛ ɔɔsɛngɛ. Kanya nyo beobae waaja a Lɔti5. Bonto lalikuli alanga nkakola luiko lande, akondo lolimeya. Kinaki bonto lalikuli alolimeya, akondo luikyaka. Mbokosimela nyo: Luina longo, banto ba phee bakondo yala batalale kaama kamɔɔ, ɔmɔɔ akondo ɔsamaka la ɔnkinɛ akondo chikalaka». Bainto baphee bakondo yalaka bataphome kaama kamɔɔ; ɔmɔɔ akondo ɔsamaka la ɔnkinɛ akondo chikalaka. [Bampame baphee bakondo yalaka weebeli kaama kamɔɔ, ɔmɔɔ akondo ɔsamaka la ɔnkinɛ akondo chikalaka].
Ango baeki* bande bawuumboli nte: «Bɔkɔta, besao bɛnɛ bekɛɛmaki ende»? Abauchisa nte: «Ale bojo ka kasaŋanaka Bieke».
Source notes (5)
- Footnote Ningitana la bolengo ba Isaliya ya Musa* iyalaka yatalɔndɛ, bonto ole la nsuli phatosana nsukama sukɛlɛ laanto bankinɛ. Ɔsɔmɛ Walawi 13. 46.
- Footnote Ɔsɔmɛ Walawi 2. 3.
- Footnote Ɔsɔmɛ Otango 6. 5-22; 7. 1-23.
- Footnote Ɔ sɔmɛ Otango 18. 20-33; 19. 1-25.
- Footnote Ɔsɔmɛ Otango 19. 26.
Ombo Traduction. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.