Edwɛndolɛ 84:11

Tease Nyamenle ne ye Aako ne anwo Edwɛndolɛ

1O Ɛlɔne Nyamenle, nea kɛ mesi mɔɔ mekulo wɔ tɛnlabelɛ kɛnlɛma ne bie a!

2Nea kɛ me ɛkɛla ɛlɛdi nyane, na ɔ nwo ɛlɛdɔ wɔ tɛnlabelɛ ne bie a! Me nwo nane nee me ɛkɛla muala to edwɛne anyelielɛ nu maa Tease Nyamenle ne. 3Kɛsanloma bɔbɔ lɛ bɛ nloma sane, yɛɛ Nyamenleakatiba mɔ lɛ bɛ adunli. Noko akee wɔ azukponle ne anwo foa ko yɛɛ bɛsie bɛ mra ngyikyi ne mɔ a, O Ɛlɔne bɛ Awulae, me belemgbunli nee me Nyamenle. 4Nyilalɛ ɛha bɛdabɛ mɔɔ bɛtɛnla wɔ Aako ne anu; na dahuu bɛto edwɛne bɛye wɔ ayɛlɛ la.

5Nyilalɛ ɛha bɛdabɛ mɔɔ bɛ anwosesebɛ vi wɔ lɔ; na dahuu adenle kpolomgbolo ne mɔɔ bɛfa zo bɛkɔ Zayɔn la anwo ɛhulolɛ wɔ bɛ ahonle nu la. 6Mekɛ mɔɔ bɛlua Ɛzunlɛ nee Nyane Bɔnza ne anu la, bɛmaa ɛkɛ ne kakyi nzulebula ɛleka; na nyilalɛ ezule tɔ, gua azɛlɛ ne azo. 7Bɛvi anwosesebɛ nu bɛkɔ anwosesebɛ nu; na ɔnrɛhyɛ biala, bɛbavinde wɔ Nyamenle ne mɔɔ vi nyamenle nu mɔɔ wɔ Zayɔn la anyunlu.

8O Awulae Nyamenle Bedevinli, tie me nzɛlɛlɛ; yɛ ɛnzolɛ maa me, O Gyekɔbo Nyamenle! 9O Nana Nyamenle, yɛ Wowadeɛ, ɔ nee yɛ Sinzavolɛ, yila yɛ belemgbunli ne, belemgbunli ne mɔɔ ɛdawɔ wɔva nwole wɔkpokpa ye la!

10Ɔluakɛ kenle ko bɔbɔ mɔɔ yɛkɛli ye wɔ wɔ Aako ne anu la, sɔ yɛ nye tɛla apenle apenle mɔɔ yɛkɛli ye wɔ ɛleka bie la. Ɔle kpalɛ kɛ menwɔzinza me Nyamenle Sua ne anlenkɛ ne, tɛla kɛ menwɔdɛnla amumuyɛvoma aako nu la. 11Awulae Nana Nyamenle le ye Sinzavolɛ, ɔ nee ye Anyunlunyia Belemgbunli. Ɔwola ye atiakunlukɛnlɛma ne nee ye enililɛ ne ɔgua ye menli nwo zo; ɔmmaa debie kpalɛ biala ɛngyia ye menli mɔɔ lua tenlene adenle zo la ɛlɛ.

12O Ɛlɔne bɛ Awulae, nyilalɛ ɛha bɛdabɛ mɔɔ bɛfa bɛ rɛle bɛwula wɔ nu la!