Edwɛndolɛ 83

Edwɛndolɛ mɔɔ fale Yizilayɛ ye kpɔvolɛma anwo la

1O Nana Nyamenle, mmayɛ koonwu! Keha ɛ nwo, mmayɛ dii, O Nana Nyamenle!

2Nea! Wɔ kpɔvolɛma ne mɔ ɛlɛtu fonyia; bɛdabɛ mɔɔ bɛkyi wɔ la ɛmemaa bɛ ti zo. 3Bɛlɛyɛ awozinli nu ngyehyɛleɛ bɛatia wɔ menli; bɛlɛfa akpame bɛatia menli mɔɔ ɛdawɔ ɛsinza bɛ la. 4Bɛka kɛ: “Bɛrɛla bɛmaa yɛminli bɛ bo zo kɛ maanle bie mɔɔ bɛtɛtɛnlanle zolɛ ɛlɛ la. Mmamaa bɛkakye Yizilayɛ duma bɔbɔ kenlebie maanle nu ɛlɛ!” 5Bɛbɔ nu bɛfa akpame ko; na bɛyɛ ngyehyɛleɛ bɛtia wɔ: 6Yidɔmma ɔ nee Yehyemeeyɛlema abo zo amra, Mowabema ɔ nee Hagelaema abo zo amra; 7Gebalema, Amɔnoma nee Amalɛkema amra, Filisitiama ɔ nee bɛdabɛ mɔɔ bɛvi Taya la. 8Aseleama noko ɛhɔboka bɛ nwo; bɛmɛ a bɛle Lɔɔto abo zo amra anwosesebɛvoma ne mɔ a.

9Yɛ bɛ kpasakpasa kɛmɔ ɛyɛle Medianema ne mɔ ɔ nee Sesɛla nee Gyeeben wɔ Azule Kaehyɔn anloa la. 10Ɛbɔle bɛ bo zo wɔ Ɛndɔ; na ɛmaanle bɛ avunli ne mɔ kpɔlɔle guale azɛlɛ ne mɔ azo. 11Yɛ bɛ titilima ne mɔ kɛmɔ ɛyɛle Ɔlɛbe nee Ziibi la; komo bɛ aholiagya ne mɔ anwo zo kɛmɔ homonle Ziba nee Zalemɛna anwo zo la; 12bɛmɛ mɔɔ bɛhanle kɛ: “Bɛmaa yɛhɔva Nana Nyamenle menli ne mɔ tɛnlabelɛ yɛyɛ yɛ deɛ la.”

13Bɔ bɛ kponde kɛ munlutu, O Nana Nyamenle; maa bɛyɛ kɛ abɛlɛ ndɛkɛ mɔɔ anwoma ɛlɛbɔ kponde la. 14Kɛmɔ senle sɔ gɔhyee yela kpɔkɛmile, na ɔtɛlɛ ɔkɔyela awoka ne mɔ la, 15zɔhane ala a maa wɔ ɛya ne ɛdu bɛ ako, na maa wɔ ahumu totohyia ne ɛha bɛ ɛgua a. 16Maa anyiemgba ɛha bɛ, O Nana Nyamenle, amaa bɛakpondɛ wɔ duma ne abo zo. 17Maa nyiane nee ɛzulolɛ mɔɔ ɔnlɛ awieleɛ la ɛha bɛ; maa bɛ bo zo ɛminli bɔkɔɔ wɔ anyunluguase nu. 18Maa bɛnwu ye kɛ ɛ ngomekye, mɔɔ wɔ duma a le Awulae la, yɛɛ ɛle Nyamenle Tumivolɛ mɔɔ bo ewiade amuala anwo zo a.