Edwɛndolɛ 39

Ahonle nu Nzɛlɛlɛ wɔ ɛbɛla ye sikalɛyɛlɛ nee nvasoɛ gyɛne nwo

1Menzele me nwo kɛ, “Mebanlea me nwo boɛ, ammaa me nloa andwe me angɔ ɛtane nu; mebado me nloa anlenkɛ nu, wɔ melɛ mɔɔ atiakunlutanevolɛma bikye me la.” 2Mendɔle mumule, menyɛle koonwu; menyɛle me nloa kpulu: Meanga edwɛkɛ wɔ mɔɔ le kpalɛ bɔbɔ la anwo! Noko akee me nyanenwunlɛ ne yɛle kpole. 3Me ahonle nyɛma dele wɔ me kunlu. Bɔbɔ mese menrɛdendɛ, noko akee ɛnee mesɔ me nwo a ɔnzɔ; na menzele kɛ: 4“Nana Nyamenle, maa menwu me awieleɛ! Maa menwu me ewule kenle! Saa menrɛnyia ngoane bieko a, maa menwu ye.” 5Wɔde me ngoane zo! Me ngoane tendenle ɛnyianlɛ ɛnle ɛ nye zo ɛhwee. Amgba noko sonla lua ye mgbane. 6Ɔle kɛ ɛlawolɛ la; ye akɔneabalilɛ muala le mgbane. Ɔkpondɛ agyapadeɛ ɔsie, noko akee ɔnze mɔɔ bara arali a. 7Ɛnee akee duzu bɔbɔ a memaa me nye ɛla ye ade a, O Awulae? Wɔmɔ a ɛle me anyelazo a.

8Pepɛ die me fi me ɛtane muala anu; mmamaa ahoasea si me amgbu, na bɛsele me.

9Meyɛ koonwu, mendɛ me nloa anu bieko; ɔluakɛ ɛdawɔ a wɔmaa menwu anwubɛnyunlu ɛhye a. 10Mmatea me bieko! Ekyii ne mɔɔ wɔva wɔdea me la bɔbɔ ɛbubu me agbɔkɛ nu bɔkɔɔ. 11Ɛnea sonla ye ɛtane nwo na wɔahwe ɔ nzo; yɛɛ ɛtwe mɔɔ ɔ nye die nwo la ɛfi ye nu, kɛmɔ ɛlɛtɛba di ɛdanlɛ sɛkye ye kɛnlɛma ala la. Nɔhalɛ nu, amgba sonla lua ye mgbane!

12Tie me nzɛlɛlɛ, O Nana Nyamenle, na yɛ ɛnzolɛ maa me ɛzunlɛ; Mmabu ɛ nye ɛgua me nwo zo. Mele wɔ ɛyɛvolɛ, mele sokoɛvolɛ wɔ azɛlɛ ye azo, kɛmɔ ɛnee egya mɔ de ye la.

13Nwu me anwunvɔne, O Awulae; maa menli me mekɛ ekyii kolaa na meavi ewiade ɛhye anu.