Edwɛndolɛ 38

Anlubɛnwonyianlɛ Edwɛndolɛ

1O Nana Nyamenle, mmatea me wɔ wɔ ɛyavalɛ mekɛ nu; anzɛɛ mmatwi me nyunlu wɔ mekɛ mɔɔ wɔ ahonle ɛvo anwuma la. 2Wɔ ɛda mbaka ne mɔ ɛbodɛboda me somaa; yɛɛ ɛ sa noko ɛhomo me nwo zo kpole kpalɛ. 3Ɔluakɛ wɔ ɛyavalɛ ne ɛmaa me nwo ɛbubu me; eza me ɛtane dɔɔnwo ne ɛbɔ me anwonyane. 4Me ɛtane somaa ne ɛme me; bɛyɛ adesoa kpole bɛmaa me. 5Me koaseayɛlɛ ɛmaa me nganlɛ ɛkpɔlɔ wɔ me nwo. 6Yebubu me yegua, medwazo a ɔnyɛ boɛ; me nye la monle nu alehyenlɛ muala. 7Me nwo ɛgolo me; medie adenle meawu. 8Me nwo ɛnyia, ɛvɛlɛ ɛbo me nza; me ɛbolɛ ɛlɛte, me anyelazo ɛwie.

9O Awulae, ɛdawɔ ɛze me ngyianlɛndeɛ muala; ɛze me huutwa huutwa muala abo. 10Me ahonle ɛye kpalikpali, yɛɛ me anwosesebɛ ɛwie; eza noko me nye ɛzi bɔkɔɔ. 11Ɔlua me nganlɛ ne mɔ ati, me kulovolɛma nee me gɔnwo mɔ ɛmbikye me; me mbusuafo bɔbɔ ɛnɛ ɛnwolo me.

12Me kpɔvolɛma ɛlɛfa me ɛhunlɛ nwo akpame; alehyenlɛ bulu nee ngɔnla, me ɛzekyelɛ nwo adwenle ala a bɛfa a. 13Noko akee mame mɔ, meduodua me nzo; meyɛ kɛ menze mɔɔ ɛlɛkɔ zo a. Meyɛ koonwu kɛ mumule la wɔ bɛ nyunlu. 14Meyɛ mumule; mende bie na meabua bie. 15O Nana Nyamenle, wɔmɔ a me rɛle wɔ wɔ nu a; bɛla ndɛndɛ, O Awulae, me Nyamenle, na balie me. 16Mmamaa me kpɔvolɛma di me azedɔlɛ nwo fɛlɛko; mmamaa bɛka bɛtu bɛ nwo kɛ bɛnyia bie bɛyɛ me.

17Dahuu mewɔ nyanelilɛ nu; akee me azedɔlɛ mekɛ ɛdwu. 18Menvea me ɛtane zo bieko; medi nyane wɔ me ahonle nu wɔ me nvonleɛ nwo. 19Me kpɔvolɛma ɛzo, bɛlɛ anwosesebɛ wɔ bɛ nu; bɛgyi ye kpundii dahuu; bɛkpɔ me ɛkpɔlɛ gyɛne ala. Noko akee metɛsele bɛ bu, metɛsele bɛ bɛ. 20Bɛdabɛ mɔɔ bɛfa ɛtane bɛtua kpalɛ kakɛ la le me kpɔvolɛma; ɔluakɛ mame medi kpalɛ nzi.

21Mmaye me rɛle ɛto me sa nu, O Nana Nyamenle; O me Nyamenle, mmagyakyi me ɛkɔ moa! 22Bɛla ndɛndɛ; ka ɛ nwo baboa me, O Awulae, me Ngoanedievolɛ.