Edwɛndolɛ 20

Nzɛlɛlɛ mɔɔ bɛyɛ bɛmaa Ngoanedievolɛ Belemgbunli ne la

1Nana Nyamenle ɛdie wɔ wɔ wɔ ɛmianlɛ mekɛ nu! Gyekɔbo Nyamenle ne ɛbɔ ɛ nwo bane! 2Ɔmaa wɔ moalɛ ɔvi ye Asɔne Sua Nwuanzanwuanza ne anu, na ɔvi Zayɔn azo ɔrawula wɔ anwosesebɛ. 3Ɔmaa ɔ nye ɛzɔ wɔ azubɔndeɛ kpokpoti; ɔmaa ɔ kunlu ɛdwo wɔ ahyɛlɛndeɛ muala anwo. 4Ɔmaa ɛ sa ɛha wɔ ɛbizalɛndeɛ ne mɔ, na ɔmaa wɔ nzuzulɛ muala ɛli munli. 5Maa yɛli fɛlɛko kpole wɔ wɔ ngoanelielɛ nu, na yɛzi yɛ konimlilɛ avɛlɛnra ne mɔ wɔ wɔ duma nu, O Nana Nyamenle. Awulae ɛmaa wɔ ɛbizalɛndeɛ muala ɛyɛ ɛkɛ. 6Akee menwu ye wienyi kɛ, Nana Nyamenle fa konimlilɛ tumi kpole wula ye akɛlɛ nu. Ɔtie ɔ ne ɔfi ye anwuma maanle nwuanzanwuanza ne anu; na ɔmaa ɔdi konim kpole wɔ ye tumi nu. 7Menli ne bie mɔ fa bɛ agyapandeɛ tu bɛ nwo; yɛɛ bie mɔ noko fa bɛ mbazira; na yɛmɛ yɛfa yɛ rɛle yɛwula yɛ Awulae Nana Nyamenle tumi nu. 8Menli ɛhye mɔ bakpulokpula bɛade bɛagua aze; na yɛmɛ yɛbadwazo yɛagyinla kpundii.

9Maa belemgbunli ne ɛli konim, O Nana Nyamenle; yɛsu yɛfɛlɛ wɔ a tie yɛ.