Edwɛndolɛ 19

Nana Nyamenle mɔɔ bɔle sonla dasanli nee Ewiade la

1Anwuma da Nana Nyamenle anyunlunyia bedevinli ne ali; anwomanyunlu kile ɔ sa anloa nwanwane gyima ne. 2Alehyenlɛ di ye anyunlunyia ne nee ɔ sa anloa gyima ne anwo daselɛ; yɛɛ aledwolɛ noko kile ye deɛnwunlɛ kuloonwu ne. 3Bɛndendɛ, yɛɛ bɛnyɛ alɛra biala, awie ɛnde bɛ nloa anu edwɛkɛ. 4Noko akee bɛ ne pɛ nu maanle ti nee maanle bo; bɛ edwɛkɛ dwu aleɛabo ɛleka biala. Nyamenle ɛyɛ tɛnlabelɛ wɔ anwomanyunlu ɛmaa sɛnzɛne ne. 5Aleɛ kye a ɔfinde kɛ atɔfolɛ kunli, mɔɔ wɔ anyelielɛ nu la. Ɔtudu ɔ gyakɛ kɛ anwosesebɛvolɛ mɔɔ ɛlɛsu wɔ ɛnriandile nu la. 6Ɔbɔ ɔ bo sɛnzɛnduduleɛ, na ɔpɛ nu ɔkɔ sɛnzɛndɔleɛ. Na abɔdeɛ biala ɛnle ɛkɛ ne mɔɔ ye mgbukpuka ne ɛnga ye a.

7Nana Nyamenle mɛla di munli, ɔmaa anwosesebɛ; Awulae mɛla ne mɔ le fɔɔnwo, ɔkakyi koasea ɔyɛ ye nrɛlɛbɛvolɛ. 8Nana Nyamenle mɛla ne mɔ di munli bɔkɔɔ, na bɛdabɛ mɔɔ bɛdi zolɛ la nyia anwodɔlɛ. Awulae mɛla ne mɔ le nɔhalɛ bɔkɔɔ, ndelebɛbo wɔ nu maa awie biala. 9Nana Nyamenle ɛzonlenlɛ le kpalɛ; ye ɛzonlenlɛ ɛnrɛbɔ aze ɛlɛ. Awulae ndɛnebualɛ tɛnrɛ bɔkɔɔ, nzisi ɛnle nuhua ɛlɛ. 10Bɛsonle bolɛ bɛtɛla ezukoa nvutuke; dɔdɔ bɔbɔ ɛndo bɛ fɛlɛko. 11Bɛle ngakyelɛ bɛmaa aleɛabo amra. Bɛdabɛ mɔɔ bɛdi zo la nyia nwole ahatualɛ kpalɛ.

12Mɔɔ pɛ azia la ɛnze kɛ ɔ nzi ɛlɛkyea; yemɔti Awulae, pepɛ die me, na ye me fi nvonleɛ mɔɔ veɛvea me la amuala anu! 13Bɔ me nwo bane fi anyefuu ɛtaneyɛlɛ nwo; mmamaa bɛdi me nwo zo konim; amaa meali munli, na eza meaho meadɔ zo wɔ ɛtaneyɛlɛ nu.

14Maa me nzɛlɛlɛ mɔɔ meva medo ɛ nyunlu, ɔ nee mɔɔ melɛdwenledwenle nwolɛ wɔ me ahonle nu la ɛzɔ ɛ nye, O Nana Nyamenle, me Bodane nee me Dievolɛ!