Edwɛndolɛ 136:1

Ayɛlɛyelɛ nee Moyɛlɛ mɔɔ bɛfa bɛmaa Gyihova la

1O bɛva moyɛlɛ bɛmaa Nana Nyamenle, ɔluakɛ ɔ ti akunlu le kpalɛ; ye ɛhulolɛ nwanwane ne le damɛnlangoate!

2O bɛva moyɛlɛ bɛmaa Nana Nyamenle ne mɔɔ bo nyamenle biala anwo zo la; ɔluakɛ ye ɛhulolɛ nwanwane ne le damɛnlangoate! 3O bɛva moyɛlɛ bɛmaa Awulae mɔɔ bo awulae mɔ kpokpoti anwo zo la; ɔluakɛ ye ɛhulolɛ nwanwane ne nee ye atiakunlukpalɛ ne le damɛnlangoate! 4Ɔ ngomekye ala yɛɛ ɔyɛ nwanwane ninyɛne mgbole mgbole a; ɔluakɛ ye ɛhulolɛ nwanwane ne le damɛnlangoate! 5Ɔlua ɔdaye ye nrɛlɛbɛ nee ye adwenle zo a ɔbɔle anwomanyunlu ninyɛne kpokpoti a; ɔluakɛ ye ɛhulolɛ nwanwane ne le damɛnlangoate! 6Ɔdaye yɛɛ ɔbɔle azɛlɛ ɔhendanle azule zo a; ɔluakɛ ye ɛhulolɛ nwanwane ne le damɛnlangoate! 7Ɔdaye a ɔbɔle anwuma kɛnlaneɛ mgbole ne mɔ a; ɔluakɛ ye ɛhulolɛ nwanwane ne le damɛnlangoate! 8Ɔbɔle ewia ne kɛ ɔnlea alehyenlɛ ne anwo zo; ɔluakɛ ye ɛhulolɛ nwanwane ne le damɛnlangoate! 9Ɔbɔle siane nee nwɔlɛra kɛ bɛnlea aledwolɛ nwo zo; ɔluakɛ ye ɛhulolɛ nwanwane ne le damɛnlangoate! 10Ɔbɔle Yigyibitima bɛ belamunli mralɛ kpokpoti abo zo bɔkɔɔ; ɔluakɛ ye ɛhulolɛ nwanwane ne le damɛnlangoate!

11Na ɔyele Yizilayɛ ɔvile akɛlɛyɛlɛ bo; ɔluakɛ ye ɛhulolɛ nwanwane ne le damɛnlangoate! 12Wɔ tumi kpole nu ala, ɔdendenle ɔ sa ɛnlomboɛ ne; ɔluakɛ ye ɛhulolɛ nwanwane ne le damɛnlangoate! 13Ɔkpakyele Nyevile Kɔkɔlɛ ne anu nwiɔ; ɔluakɛ ye ɛhulolɛ nwanwane ne le damɛnlangoate! 14Na ɔmaanle Yizilayɛma vale nuhua mɔɔ esiane biala ansianle bɛ a; ɔluakɛ ye ɛhulolɛ nwanwane ne le damɛnlangoate! 15Na ɔnlomanle Faro ɔ nee ye konle ɛlɔne ne kpokpoti wɔ Nyevile Kɔkɔlɛ ne abo gbodogbodo; ɔluakɛ ye ɛhulolɛ nwanwane ne le damɛnlangoate!

16Ɔlile ye menli ne mɔ anyunlu ɔ nee bɛ pɛle fiemgbole ne; ɔluakɛ ye ɛhulolɛ nwanwane ne le damɛnlangoate! 17Ɔhunle arelemgbunli katakyie kpokpoti; ɔluakɛ ye ɛhulolɛ nwanwane ne le damɛnlangoate! 18Ɔdinle arelemgbunli anyunlunyiama kɛ ɛnwea; ɔluakɛ ye ɛhulolɛ nwanwane ne le damɛnlangoate! 19Saehɔn, mɔɔ le Amɔlema bɛ belemgbunli ne; ɔluakɛ ye ɛhulolɛ nwanwane ne le damɛnlangoate! 20Ɔ nee Ɔɔg, Beeshyan belemgbunli ne; ɔluakɛ ye ɛhulolɛ nwanwane ne le damɛnlangoate! 21Ɔvale bɛ azɛlɛ ne mɔ amuala kɛ agyapadeɛ la; ɔluakɛ ye ɛhulolɛ nwanwane ne le damɛnlangoate! 22Agyapadeɛ mɔɔ ɔvale ɔmaanle ye sonvolɛ Yizilayɛ la; ɔluakɛ ye ɛhulolɛ nwanwane ne le damɛnlangoate!

23Ɔhakyele yɛ wɔ melɛ mɔɔ kpɔvolɛma lile yɛ nwo zo konim la; ɔluakɛ ye ɛhulolɛ nwanwane ne le damɛnlangoate! 24Na ɔyele yɛ ɔvile kpɔvolɛma asa anu; ɔluakɛ ye ɛhulolɛ nwanwane ne le damɛnlangoate!

25Ɔmaa abɔdeɛ biala mɔɔ de ngoane nu la aleɛ; ɔluakɛ ye ɛhulolɛ nwanwane ne le damɛnlangoate! 26O bɛva moyɛlɛ bɛmaa Nana Nyamenle mɔɔ wɔ Anwuma Maanle ne anu la, ɔluakɛ ye ɛhulolɛ nwanwane ne le damɛnlangoate!