Edwɛndolɛ 137

Bɛdabɛ mɔɔ bɛvale bɛ bɛhɔle Amanvoa wɔ Babelɔn la bɛ Edwɛne

1O wɔ Babelɔn azule ne mɔ anwo, yɛdɛnlanle aze; ɛkɛ ne yɛɛ yɛzunle wɔ mekɛ mɔɔ yɛhakyele Zayɔn la a. 2Wɔ mbaka mbaka ne mɔ mɔɔ bikye ɛkɛ ne la azo, yɛɛ yɛvale yɛ sanwunle ne mɔ, nee yɛ ahenle ne mɔ yɛhendɛhendanle a. 3Ɛkɛ yɛɛ menli mɔɔ vale yɛ kɛ ahanra la hanle kɛ yɛdo edwɛne a; menli ne mɔɔ hilele yɛ ateetee la zele yɛ kɛ yɛlielie bɛ nye. Bɛzele yɛ kɛ: “Bɛdo Zayɔn edwɛne ne mɔ anu ko bɛmaa yɛdie!” 4Kɛ ɔkɛyɛ mɔɔ yɛkɛdo Nana Nyamenle edwɛne wɔ maanle gyɛne zo ɛ? 5O Gyɛlusalɛm, saa me rɛle fi wɔ a, mmamaa mekola mebɔ getae bieko! Maa me sa fema ne ɛnwenwe! 6Maa me tafinlima ɛzɔ ɛbeta wɔ me nloa anu, saa meangakye wɔ a; saa meammaa wɔmɔ Gyɛlusalɛm zo anwuma wɔ me anyelielɛ muala anu a!

7O Nana Nyamenle, kakye deɛ mɔɔ Yidɔmma yɛle, wɔ mekɛ mɔɔ Babelɔn azogya homonle Gyɛlusalɛm anwo zo la. Kakye kɛ bɛzile bɛtinlinle zo bɛhanle kɛ, “Bɛdwulu ye bɛgua aze bɔkɔɔ!” la. 8O Babelɔn bɛlɛra, bɛbazɛkye wɔ bɔkɔɔ. Nyilalɛ ɛha sonla ne mɔɔ sɛkye wɔ, kɛmɔ ɛdawɔ noko wɔzɛkye yɛ la. 9Nyilalɛ ɛha sonla ne mɔɔ kuohua ɛ mra ne mɔ anloa, na ɔfa bɛ ti ɔkpulokpula awolɛ la!