Edwɛndolɛ 119:105

Mɛla Nwuanzanwuanza ne ye ayɛlɛyelɛ edwɛne mɔɔ bɛhɛlɛ la

1Nyilalɛ a le bɛdabɛ mɔɔ bɛ nyɛleɛ le tenlene, bɛdabɛ mɔɔ bɛdua Nana Nyamenle mɛla ne adenle zo bɛdi bɛ gyima wɔ bɛ ɛbɛlabɔlɛ nu la. 2Nyilalɛ a le bɛdabɛ mɔɔ bɛdi Awulae ngyehyɛlɛ ne mɔ anwo daselɛ, na bɛfa bɛ ahonle kpokpoti bɛkpondɛ ɔ nzi adenle la. 3Bɛnyɛ ɛtane biala; na emomu, bɛdua Awulae ye ndenle ne mɔ azo. 4Awulae, wɔmɔ wɔva wɔ mɛla ne mɔ wɔmaa yɛ, na wɔze yɛ kɛ yɛli zolɛ wɔ nɔhalɛ nu ala. 5O me kunlu anu a anrɛɛ me nyɛleɛ bayɛ tenlene wɔ Awulae mɛla ne azo ɛlilɛ nu. 6Saa meyɛ ɛnzolɛ memaa wɔ ngyehyɛlɛ ne mɔ a, yɛɛ akee me nyunlu nyiane ɛnrɛgua aze a.

7Mebava ahonle mɔɔ nuhua te la meaye wɔ ayɛlɛ, wɔ mekɛ mɔɔ menwɔzukoa wɔ tenlene ndɛnebualɛ ne mɔ la. 8Mebali wɔ mɛla ne mɔ azo! O, mmakpo me; mmamaa ɛ rɛle fi me bɔkɔɔ!

9Kɛ ɔkɛyɛ na kpavolɛ ahola amaa ye nyɛleɛ ayɛ nwuanzanwuanza ɛ! Kyesɛ ɔkenga wɔ edwɛkɛ ne, na ɔdi zolɛ. 10Mebɔ mɔdenle biala kɛ menwɔva me ahonle kpokpoti menwɔzonle wɔ; mmamaa meduolua nuhua mgbane mgbane, mɔɔ menli wɔ mɛla ne mɔ azo a. 11Me ahonle nu yɛɛ mefa wɔ edwɛkɛ ne mesie a, ammaa meanyɛ ɛtane meantia wɔ.

12O Nana Nyamenle, nyilalɛ ɛha wɔ; kilehile me wɔ mɛla ne mɔ. 13Me nloa yɛɛ mebava meabɔ ɛlawule, wɔ wɔ ngyehyɛlɛ muala mɔɔ vi ɛ nloa anu ɛra la anwo a. 14Me nye die kɛ menwɔdoa wɔ ngyehyɛlɛ ne mɔ abo zo, tɛla kɛmɔ me nye die agyapadeɛ nwo la. 15Mesie me adwenle koonwu medwenledwenle wɔ mɛla ne mɔ anwo; meneɛnlea wɔ ngilehile ne mɔ anu kpalɛ. 16Memaa me nye die wɔ wɔ mɛla ne mɔ anwo; me rɛle ɛnrɛvi wɔ edwɛkɛ ne ɛlɛ.

17Kile wɔ nyele ne wɔ mame, wɔ sonvolɛ ne anwo zo, amaa meadɛnla aze, na meali wɔ ngilehile ne mɔ azo. 18Buke me nye, amaa meanwu nwanwanendeɛ ne mɔ mɔɔ wɔ wɔ mɛla ne mɔ anu la. 19Mele ɛyɛvolɛ wɔ azɛlɛ ye azo, wɔ mekɛ ekyi bie ala; mmafa wɔ mɛla ne mɔ ɛfea me. 20Me ɛkɛla ne anwo ɛlɛdɔ wɔ somaa; mekulo kɛ menwu wɔ ndɛnebualɛ ne mɔ mekɛ biala.

21Wɔmɔ ɛtwi amemaabɛnwozovoma anyunlu; munzule ɛha bɛdabɛ mɔɔ bɛmɛ bɛse bɛnrɛli wɔ ngyehyɛlɛ ne mɔ azo la. 22Ye me fi bɛ amgbuzilɛ ɔ nee bɛ anyehoanlɛbulɛ ne mɔ anu, ɔluakɛ meli wɔ mɛla ne mɔ azo. 23Kanzɛ arelemgbunli di ahua yɛ ngyehyɛleɛ ɛtane tia me bɔbɔ a, mame, wɔ sonvolɛ, mebadɛnla aze koonwu meadwenledwenle wɔ mɛla ne mɔ anwo. 24Wɔ mɛla ne mɔ yɛɛ me nye die nwo a; bɛle me folɛtuvolɛma.

25Bɛli me nwo zo konim, me ɛkɛla la azeva ne anu; tunwue me, kɛmɔ ɛdawɔ wɔbɔ me ɛwɔkɛ la. 26Menganle me ɛtane ne mɔ kpokpoti mengilele wɔ, na ɛdiele me; kilehile me wɔ ndenle ne mɔ. 27Boa me maa mende wɔ mɛla ne mɔ abo, na mebadɛnla aze koonwu meadwenledwenle wɔ nwanwane ngilehile ne mɔ anwo.

28Me ɛkɛla ɛlɛkolo agua wɔ nyane nu; maa me anwosesebɛ kɛmɔ ɛdawɔ wɔbɔ me ɛwɔkɛ la. 29Ye adalɛ nyɛleɛ kɔ moamoa fi me nwo zo, na wɔ wɔ ɛlolɛ nu ala, kilehile me wɔ mɛla ne mɔ. 30Mefa nɔhalɛlilɛ adenle ne azo; meva wɔ mɛla ne mɔ mezie me nyunlu. 31O Nana Nyamenle; meli ɛ nloa edwɛkɛ biala azo; mmamaa me nyunlu nyiane gua aze. 32Mebali wɔ mɛla ne mɔ azo anyebololɛ nu ala; ɔboalekɛ, ɛbamaa me ndelebɛbo nu api.

33O Nana Nyamenle, kilehile me wɔ mɛla ne mɔ abo, na mebali zolɛ meahɔ awieleɛ. 34Maa me ndelebɛbo, amaa meazie wɔ mɛla ne; na meava me ahonle muala meali zolɛ. 35Maa menyɛ tieyɛ wɔ wɔ mɛla ne mɔ anwo, ɔboalekɛ, wɔ bɛ nu yɛɛ menyia fɛlɛkolilɛ a.

36Maa me ahonle ɛhwe ɛbikye wɔ daselɛlilɛ ne mɔ, tɛla kɛ menwɔnyia me nwo a. 37Ye me nye fi ninyɛne mɔɔ nvasoɛ ɛnle zo la azo; kakyi me ahonle, kɛmɔ ɛdawɔ wɔbɔ me ɛwɔkɛ la. 38Si wɔ ɛwɔkɛ ne pi maa me, mame wɔ sonvolɛ, ɛwɔkɛ ne mɔɔ ɛfa ɛmaa bɛdabɛ mɔɔ bɛdi wɔ eni la.

39Ye me fi amgbuzilɛ nee anyehoanlɛbulɛ ne mɔ mɔɔ mesulo bɛ la anu; ɔluakɛ wɔ ndɛnebualɛ ne mɔ yɛ nwanwane. 40Nea kɛ me nwo dɔ wɔ mɛla ne mɔ bie a! Maa menyia ngoane fofolɛ, wɔ wɔ tenleneyɛlɛ ne anu. 41O Nana Nyamenle, maa menwu ɛhulolɛ mɔɔ ɛkulo me la ye bolɛ mɔɔ ɔsonle a; na die me ngoane kɛmɔ wɔ ɛwɔkɛ ne de la. 42Yemɔ yɛɛ mebanyia mualɛ meamaa bɛdabɛ mɔɔ bɛsi me amgbu la a; ɔluakɛ wɔ edwɛkɛ ne anu yɛɛ meva me rɛle mewula a.

43Mmamaa me rɛle fi wɔ edwɛkɛ ne mɔ ɛlɛ, maa dahuu menga nɔhalɛ ne; ɔluakɛ me anyelazo kpokpoti wɔ wɔ mɛla ne mɔ anu. 44Mebali wɔ mɛla ne azo dahuu, meahɔ mekɛ mɔɔ ɔnlɛ awieleɛ la. 45Mebadɛnla ngoane nu wɔ fanwodililɛ mɔɔ di munli la anu, ɔboalekɛ, mebɔ mɔdenle kɛ menwɔli wɔ ngilehile ne mɔ azo. 46Mebabɔ wɔ daselɛlilɛ ne mɔ anwo nolo wɔ arelemgbunli nyunlu, na me nyunlu nyiane ɛnrɛgua aze.

47Menyia anyeliele wɔ wɔ ngyehyɛlɛ ne mɔ azo ɛlilɛ nu, ɔboalekɛ, mekulo bɛ la ati. 48Medi wɔ mɛla ne mɔ eni, na mekulo bɛ noko; mebazie me ti koonwu meadwenledwenle wɔ mɛla ne mɔ anwo.

49Kakye wɔ ɛwɔkɛ ne mɔ mɔɔ ɛbɔle ɛmaanle mame, wɔ sonvolɛ ne la, ɔluakɛ bɛmɛ a bɛle me anyelazo mɔɔ ɛha la a. 50Bɔbɔ, wɔ me anwubɛnyunlu nu, bɛmaanle me arɛlekyekyelɛ, ɔboalekɛ, wɔ ɛwɔkɛ ne maanle me ngoane. 51Amemaabɛnwozovoma tietia me nwo zo dahuu, noko akee mengakyi me nzi menzi wɔ mɛla ne mɔ. 52Saa mekakye wɔ tete ndɛnebualɛ ne mɔ a, menyia arɛlekyekyelɛ, O Nana Nyamenle.

53Saa menwu kɛ amumuyɛvoma ɛlɛbulu wɔ mɛla ne mɔ azo a, ɛya ku me totohyia. 54Wɔ mɛla ne mɔ yɛɛ ale me edwɛne, wɔ me ɛbɛlabɔlɛ adendulɛ ne mɔ anu a. 55Aledwolɛ nu mekakye wɔ duma, O Nana Nyamenle, na medwenledwenle wɔ mɛla ne mɔ anwo. 56Nyilalɛ ba me nwo zo, ɔlua wɔ mɛla ne mɔ mɔɔ medi zo la ati.

57Wɔmɔ a ɛle debie biala mɔɔ mekpondɛ la a, O Nana Nyamenle; mebɔ ɛwɔkɛ kɛ menwɔli wɔ mɛla ne mɔ azo. 58Mefa me ahonle muala mesɛlɛ wɔ kɛ ɛnwu me anwunvɔne, kɛmɔ ɛdawɔ wɔbɔ me ɛwɔkɛ la. 59Menleɛnlea me nyɛleɛ nu kpalɛ, na mebɔ ɛwɔkɛ kɛ menwɔva wɔ daselɛlilɛ ndenle ne mɔ azo. 60Ndɛndɛ nu, menli nwolɛ nwɔhoa kɛ menwɔli wɔ mɛla ne mɔ azo. 61Bɔbɔ saa kpɔvolɛma fa nyɛma sua me ɛhane a, me rɛle ɛnvi wɔ mɛla ne mɔ.

62Alevinli-mu-nwiɔ avinli medwazo meye wɔ ayɛlɛ, wɔ wɔ tenlene ndɛnebualɛ ne mɔ anwo. 63Me gɔnwo mɔ a le bɛdabɛ mɔɔ bɛsonle wɔ, bɛmɛ mɔɔ bɛdi wɔ mɛla ne mɔ azo la. 64O Nana Nyamenle, wɔ ɛhulolɛ kpundii ne ɛyi azɛlɛ ye azo tɛkɛɛ; kilehile me maa meni wɔ mɛla ne mɔ azo.

65Wɔli wɔ ɛwɔkɛ ne azo, O Nana Nyamenle, wɔhile atiakunlukɛnlɛma wɔmaa mame, wɔ sonvolɛ. 66Kilehile me ndɛnebualɛ kpalɛ, na maa me adwenle, ɔboalekɛ, medie wɔ mɛla ne mɔ medi. 67Kolaa na wɔadea me la, menvile wɔ adenle ne azo, na emomu kɛkala ɛdeɛ, medi wɔ edwɛkɛ ne azo. 68Nea kɛ ɛ ti akunlu le kpalɛ bie a, ɛle kpalɛ somaa! Kilehile me wɔ mɛla ne mɔ.

69Menli mɔɔ ɛnzonle Nyamenle la, ɛbɔ adalɛ ɛgua me nwo zo bie ala; noko akee mefa me ahonle muala medi wɔ mɛla ne mɔ amuala azo. 70Menli ɛhye mɔ ɛnlɛ ndelebɛbo, noko akee mame me nye die wɔ wɔ mɛla ne mɔ anu.

71Ɔle kpalɛ ɔmaa me kɛ menwunle amaneɛ a, ɔluakɛ ndeanlɛ ne mɔ maanle menzukoale wɔ mɛla ne mɔ.

72Mɛla ne mɔɔ ɛvale ɛmaanle me la, hyia me ɛsesebɛ ɛsesebɛ tɛla nvutuke nee dwɛtɛ fufule kpokpoti mɔɔ wɔ aleɛabo la. 73Wɔmɔ a ɛbɔle me, O Awulae, na ɛfa me ɛsie kpalɛ a; maa menyia ndelebɛbo amaa meazukoa wɔ mɛla ne mɔ. 74Bɛdabɛ mɔɔ bɛsulo wɔ la banwu me na bɛ nye alie, ɔluakɛ wɔ edwɛkɛ ne azo yɛɛ melua menyianle anyelazo a.

75O Nana Nyamenle, meze kɛ wɔ ndɛnebuale ne mɔ le fɔɔnwo, na ɔlua ɛhye ati noko a ɛdeanle me a; ɔluakɛ wɔmɔ ɛle tenlene. 76Maa wɔ ɛhulolɛ kpundii ne ɛyɛ anwomoalɛ kɛ ɔkɛkyekye me rɛle, kɛmɔ wɔ ɛwɔkɛ ne mɔɔ ɛvale ɛbɔle mame, wɔ sonvolɛ ne de la. 77Maa wɔ anwunvɔnezelɛ ne ɛrɛla me nwo zo, na meadɛnla ngoane nu; ɔluakɛ wɔ mɛla ne mɔ anu a me anyelielɛ wɔ a.

78Maa mgbanyizonleyɛvoma anyunlu nyiane ɛgua aze, ɔluakɛ bɛlua ɛkpɔlɛ nu bɛpepɛ me gyakɛ anzi; na mame, mebadwenledwenle wɔ mɛla ne mɔ anwo wɔ me ahonle nu. 79Maa bɛdabɛ mɔɔ bɛsulo wɔ la ɛhakyi ɛrɛla me ɛkɛ, amaa bɛanwu wɔ daselɛlilɛ ne mɔ. 80Maa me ahonle ɛli munli wɔ wɔ mɛla ne mɔ anwo, ammaa me nyunlu nyiane angua aze.

81Me ɛkɛla ɛli nyane ɛvɛ, O Awulae, melɛkendɛ wɔ amaa wɔaralie me ngoane; mefa me rɛle mewula wɔ edwɛkɛ ne mɔ anu. 82Me nye ɛla ɛwɔkɛ ne mɔɔ ɛbɔle la ade dedee ɛvɛ; akee mebiza kɛ: “Kenle nzu yɛɛ ɛkɛva mɔ moalɛ ne ɛkɛrakyekye me rɛle a?” 83Meyɛ sonlamgbane kɛ nwanye kodoku mɔɔ henda senle nzi la; noko akee me rɛle ɛtɛfile wɔ mɛla ne mɔ. 84Kɔkpula kenle nzu, yɛɛ ɔwɔ kɛ wɔ sonvolɛ di nyane a? Kenle nzu, yɛɛ ɛkɛbua bɛdabɛ mɔɔ bɛsisi me la ndɛne fɔle a? 85Menli mɔɔ bɛnzonle Nyamenle, na bɛnli wɔ mɛla ne mɔ azo la ɛpɛ kuma kɛ bɛfa bɛazua me ɛhane. 86Wɔ mɛla ne mɔ kpokpoti di munli; menli bɔ adalɛ tia me na bɛpepɛ me gyakɛ anzi. Boa me ɛ, O Awulae! 87Bɔbɔ asɛɛ bɛye me bɛvi azɛlɛ ye azo ɛdeɛ, noko akee metɛkpole wɔ mɛla ne mɔ. 88Ɔlua wɔ ɛhulolɛ kpundii ne ati, fa me ngoane kyɛ me, amaa meali ɛ nloa anu daselɛ ne mɔ azo. 89O Nana Nyamenle, wɔ edwɛkɛ ne wɔ ɛkɛ dahuu; na ɔgyi ye kpundii wɔ anwuma maanle ne anu. 90Wɔ nɔhalɛlilɛ ne wɔ ɛkɛ dahuu maa ɛlɔnwɔne kpokpoti; wɔmɔ yɛɛ ɛbɔle azɛlɛ ye a, na ɔgyi ɛkɛ kpundii. 91Ɔlua wɔ ngyehyɛlɛ ne ati, debie biala wɔ ɛkɛ ne bakpula ɛnɛ, ɔluakɛ bɛ muala bɛle wɔ sonvolɛ ne deɛ.

92Saa wɔ mɛla ne anyɛ me anyelielɛ ne ye abobɔlɛ a, anrɛɛ me bo zo minlinle wɔ me nyanelilɛ nu. 93Me rɛle ɛnrɛvi wɔ mɛla ne mɔ ɛlɛ, ɔluakɛ ɔlua bɛmɛ ti a wɔmaa metɛte ngoane nu a. 94Mele wɔ deɛ, die me ngoane! Ɔluakɛ mekpondɛ mɔ mɛla ne mɔ abo zo. 95Kpɔvolɛma ɛlɛkendɛ kpondɛ kɛ bɛkɛzɛkye me; noko akee mebadwenledwenle wɔ daselɛlilɛ ne mɔ anwo wɔ me ahonle nu nzɛlɛlɛ nu.

96Menwu ye wienyi kɛ amuanrɛɛ debie biala lɛ ɔ ti nee ɔ bo; na wɔ mɛla ne mɔ ɛdeɛ, bɛdi munli bɔkɔɔ. 97O, nea kɛ me nye ɛlie wɔ mɛla ne mɔ anwo bie a! Ɔle me adwenledwenle alehyenlɛ muala. 98Wɔ mɛla ne mɔ maa meyɛ nrɛlɛbɛvolɛ metɛla me kpɔvolɛma ne mɔ; ɔluakɛ dahuu bɛ nee me a de a. 99Melɛ ndelebɛbo dɔɔnwo metɛla me kilehilevolɛma, ɔluakɛ wɔ daselɛlilɛ ne mɔ yɛɛ medwenledwenle nwolɛ a. 100Melɛ ndelebɛbo nee nrɛlɛbɛ dɔɔnwo metɛla mgbanyinli, ɔluakɛ medi wɔ mɛla ne mɔ azo.

101Me gyakɛ sia fi ɛtane adenle biala azo, amaa meali wɔ edwɛkɛ ne azo. 102Memmakyi menvi wɔ mɛla adenle ne mɔ azo, ɔluakɛ ɛdawɔ mumua ne yɛɛ ɛle me kilehilevolɛ a. 103Nea kɛ wɔ edwɛkɛ ne mɔ yɛ me fɛ bie a! Ɔle menlemenle bɔbɔ ɔtɛla dɔdɔ! 104Ɔlua wɔ mɛla ne mɔ azo yɛɛ menyia ndelebɛbo a, zɔhane ati mekyi ngunzi nyɛleɛ biala.

105Wɔ edwɛkɛ ne le kɛnlaneɛ mɔɔ sinza me a; ɔta wienyi wɔ me adenle zo. 106Mebali me ɛwɔkɛ nwuanzanwuanza ne mɔɔ membɔle, kɛ mebali wɔ pɛlepɛle ngyehyɛlɛ ne mɔ azo la azo.

107Nɔhalɛ nu, me anwubɛnyunlu zonle somaa, O Nana Nyamenle; maa menyia ngoane, kɛmɔ ɛdawɔ wɔbɔ me ɛwɔkɛ la. 108O Nana Nyamenle, die me moyɛlɛ nzɛlɛlɛ ne, na kilehile me wɔ mɛla ne mɔ. 109Meyɛ anwomoalɛ kɛ menwɔhwele me ngoane; noko akee me rɛle ɛtɛfile wɔ mɛla ne mɔ. 110Kpɔvolɛma suozua me ngane, noko akee mengoati wɔ mɛla ne mɔ anu ko bɔbɔ. 111Wɔ daselɛlilɛ ne mɔ le me damɛnlangoate agyapadeɛ; ɛhɛe, bɛle me ahonle ne ye anyelielɛde. 112Meyeye me ahonle nu kɛ menwɔyɛ wɔ ɛhulolɛdeɛ, kɔkpula kenle mɔɔ menwɔwu la.

113Mekyi menli mɔɔ bɛ adwenle le nwiɔ nwiɔ la, na mekulo wɔ mɛla ne mɔ. 114Wɔmɔ yɛɛ ɛle me feabelɛ ɔ nee me wowadeɛ a; me anyelazo muala wɔ wɔ ɛwɔkɛ ne anu. 115Bɛvi me nwo ɛke bɛhɔ, bɛmɛ ɛtanevolɛma! Mebali me Nyamenle ye ngyehyɛlɛ ne mɔ azo. 116Maa me anwosesebɛ kɛmɔ wɔ ɛwɔkɛ ne de la, amaa meanyia ngoane; meamaa me nyunlu nyiane gua aze wɔ me anyelazo nu. 117Sɔ me nu dwaa, amaa meanyia me ngoane, na dahuu mebayɛ ɛnzolɛ meamaa wɔ ngyehyɛlɛ ne mɔ.

118Wɔmɔ ɛmbu menli mɔɔ koati fi wɔ mɛla ne anwo la. Ɛhɛe, bɛ mɛlɛbɛla ngyehyɛleɛ ne mɔ le gyɛne. 119Ɛtanevolɛma kpokpoti mɔɔ wɔ azɛlɛ ye azo la, wɔmɔ ɛbu bɛ kɛ bɛle ezukoa nye evinli la; zɔhane ati mekulo wɔ daselɛlilɛ ne mɔ. 120Ɔlua wɔmɔ ti, me nwo wozo me zɛhae ala; ɛzulolɛ ngome ɛyi me tɛkɛɛ ɔlua wɔ ndɛnebualɛ ne mɔ ati.

121Meyɛ mɔɔ le tenlene ɔ nee mɔɔ le fɔɔnwo la; mmagyakyi me adevinli ɛmaa me kpɔvolɛma. 122Di wɔ sonvolɛ ne agyinlanu kɔ kpalɛ nu; mmamaa bɛdabɛ mɔɔ bɛnzonle Nyamenle la komo me nwo zo! 123Me nye ɛla wɔ ngoanelielɛ moalɛ ne ade ɛhyɛ, ɔ nee wɔ ɛkpɔnenlɛ ɛwɔkɛ ne mɔɔ ɛbɔle la. 124Ɛ nee wɔ sonvolɛ ne ɛli ye kɛmɔ wɔ ɛhulolɛ kpundii ne de la, na kilehile me wɔ mɛl ne mɔ. 125Mele wɔ sonvolɛ; maa me ndelebɛbo, amaa meanwu wɔ daselɛlilɛ ne mɔ.

126O Nana Nyamenle, mekɛ ɛdwu mɔɔ ɔwɔ kɛ ɛdi wɔ gyima a, ɔluakɛ menli gua zo ɛlɛbu wɔ mɛla ne mɔ azo. 127Mekulo wɔ mɛla ne mɔ metɛla ezukoa nvutuke, bɔbɔ nvutuke kɛnlɛma mɔɔ sonle bolɛ la. 128Zɔhane ati metudu agyakɛ mefa wɔ mɛla ndenle ne mɔ azo; mekyi adalɛ ndenle biala.

129Wɔ ngilehile ne mɔ le nwanwane; zɔhane ati mefa me ahonle kpokpoti medi zolɛ. 130Wɔ ngilehile ne mɔ abo ɛhilelɛ maa wienyi, na ɔmaa koasea nyia ndelebɛbo. 131Me ahonle si pi, na me nloa ka ɛkɛ, ɔluakɛ me nye la wɔ mɛla ne mɔ adenle.

132Kakyi ɛ nye bɛla me nwo zo, na nwu me anwunvɔne, kɛmɔ ɛyɛ ɛmaa bɛdabɛ mɔɔ bɛkulo wɔ duma ne la. 133Maa menziezie me gyakɛ boɛ wɔ wɔ ɛwɔkɛbɔlɛ ne ati; mmamaa ɛtane di me nwo zo konim. 134Die me fi sonla dasanli ye nzisi bo, amaa meali wɔ mɛla ne mɔ azo. 135Maa ɛ nyunlu ɛda wɔ wɔ sonvolɛ ne anwo zo, na kilehile me wɔ mɛla ne mɔ. 136Me nye kpolo monle kɛ azule mɔɔ se la, ɔluakɛ menli ɛnli wɔ mɛla ne mɔ azo.

137O Nana Nyamenle, wɔmɔ ɛle tenlene, na wɔ ndɛnebualɛ ne mɔ le fɔɔnwo. 138Daselɛlilɛ ne mɔ mɔɔ wɔzie wɔmaa dasanli la, le fɔɔnwo nee tenlene bɔkɔɔ. 139Me ɛhulolɛ wɔ wɔ gyima ne anwo ɛlɛku me, ɔluakɛ me kpɔvolɛma ɛmbu wɔ edwɛkɛ ne mɔ bie hweledede. 140Yɛzɔ wɔ ɛwɔkɛ ne mɔ yɛnlea, na yenwu kɛ bɛdi munli bɔkɔɔ! Nea kɛ wɔ sonvolɛ ne kulo ye bie a! 141Mele ekyi, yɛɛ bɛmbu me bie, noko akee me rɛle ɛnvi wɔ ngilehile ne mɔ.

142Wɔ tenleneyɛlɛ ne baboa ɛkɛ ne dahuu; na wɔ mɛla ne mɔ noko le nɔhalɛ. 143Ɛvɛlɛ ɔ nee nyane ɛbu me nwo zo, noko akee wɔ mɛla ne mɔ fa anyelielɛ bɛlɛ me. 144Wɔ daselɛlilɛ ne mɔ le fɔɔnwo dahuu; maa me ndelebɛbo amaa meadɛnla ngoane nu.

145Mefa me ahonle muala yɛɛ mesu mefɛlɛ wɔ a; O Nana Nyamenle, tie me, na mebali wɔ mɛla ne mɔ azo! 146Mesu mefɛlɛ wɔ; die me ngoane, na mebali wɔ daselɛlilɛ ne mɔ azo! 147Medwazo aleɛbahye, yɛɛ mesu mefɛlɛ moalɛ a, mefa me anyelazo mewula wɔ edwɛkɛ ne mɔ anu. 148Aledwolɛ muala, kɛ me nye gyi zo wɔ me nla nu ala la ɛne, amaa meahola meadwenledwenle wɔ mɛla ne mɔ anwo wɔ me ahonle nu koonwu. 149Tie me ne, wɔ wɔ ɛhulolɛ kpundii ne ati, O Nana Nyamenle; kile wɔ anwunvɔnezelɛ ne, na fa me ngoane sie kpalɛ!

150Bɛdabɛ mɔɔ bɛkyi me, na bɛpepɛ me gyakɛ anzi la ɛlɛtwe abikye me, bɛ nee wɔ mɛla ne mɔ avinli wale kɛ. 151Noko akee, O Nana Nyamenle, wɔmɔ ɛbikye me, na wɔ mɛla ne mɔ amuala gyi kpundii. 152Mekɛ tendendenlenle yɛɛ meva menwu wɔ daselɛlilɛ ne mɔ kɛ, wɔmɔ ɛyɛle bɛ ɛmaanle mekɛ mɔɔ ɔnlɛ awieleɛ la a.

153Nea me nyanenwunlɛ, na die me ngoane, ɔluakɛ me nye ɛtɛfonle wɔ mɛla ne mɔ anu biala. 154Di me ti edwɛkɛ maa me, na pepɛ die me; die me ngoane kɛmɔ ɛdawɔ ɛbɔle me ɛwɔkɛ la. 155Ngoanelielɛ wɔ moamoa maa amumuyɛvoma; ɔluakɛ bɛmkpo wɔ mɛla ne mɔ abo zo. 156Noko akee, O Nana Nyamenle, wɔ anwunvɔnezelɛ ne le totohyia; maa me ngoane bieko, kɛmɔ wɔ pɛpɛlilɛ ne de la.

157Menli mɔɔ pepɛ me gyakɛ anzi, ɔ nee me kpɔvolɛma ne mɔ ɛzo somaa; noko akee mengyakyi kɛ menwɔli wɔ daselɛlilɛ ne mɔ azo. 158Saa menea menli mɔɔ ɛnlɛ diedi la a, ɛnee bɛ nwo bɔbɔ yɛ me alɔbɔlɛ, ɔluakɛ bɛnli wɔ mɛla ne mɔ azo. 159Nea kɛ mesi mekulo wɔ mɛla ne mɔ bie a, O Nana Nyamenle! Wɔ ɛhulolɛ nwanwane ne ɛngakyi ɛlɛ, ɔti die me ngoane! 160Wɔ edwɛkɛ ne amuala ye ayiazo, yemɔ a le nɔhalɛ ne; yɛɛ wɔ tenlene ndɛnebualɛ ne mɔ amuala le damɛnlangoate.

161Arelemgbunli pepɛ me gyakɛ anzi gyɛne, wɔ mekɛ mɔɔ metɛsele bɛ bu, metɛsele bɛ bɛ la; noko akee mefa ɛbulɛ memaa wɔ mɛla ne mɔ. 162Nea kɛ medi fɛlɛko wɔ wɔ ɛwɔkɛ ne mɔ anwo bie a! Me nye die kɛ sonla mɔɔ yedu ahu totohyia bie la. 163Mekyi, na mekpo adalɛbɔlɛ kɔkɔkɔkɔ, na emomu mekulo wɔ mɛla ne mɔ. 164Meyɛ wɔ mo fane nsuu alehyenlɛ biala wɔ wɔ tenlene ndɛnebualɛ ne mɔ ati.

165Anzondwolɛ totohyia wɔ ɛkɛ maa bɛdabɛ mɔɔ bɛkulo wɔ mɛla ne mɔ la; na debie biala ɛnle ɛkɛ mɔɔ kɛmaa bɛ gyakɛ kɛkpula a. 166O Nana Nyamenle, me nye la wɔ ngoanelielɛ ne adenle, na medi wɔ mɛla ne mɔ azo. 167Me ɛkɛla di wɔ daselɛlilɛ ne mɔ azo; mefa me ahonle kpokpoti mekulo bɛ totohyia. 168Medi wɔ mɛla ne mɔ ɔ nee wɔ daselɛlilɛ ne mɔ azo; ɔluakɛ ɛnwu debie biala mɔɔ meyɛ la.

169O Nana Nyamenle, maa me moalɛ ɛzunlɛ ɛdwu ɛ nyunlu! Maa me ndelebɛbo, kɛmɔ wɔ edwɛkɛ ne de la. 170Maa me nzɛlɛlɛ ɛdwu ɛ nyunlu, na die me ngoane kɛmɔ wɔ ɛwɔkɛ ne de la. 171Me nloa babonle ne baye wɔ ayɛlɛ dahuu, ɔboalekɛ, ɛkilehile me wɔ mɛla ne mɔ. 172Me tafinlima bado wɔ edwɛkɛ ne anwo edwɛne, ɔluakɛ wɔ mɛla ne mɔ le fɔɔnwo. 173Yɛ anwomoalɛ kɛ ɛkɛboa me dahuu, ɔluakɛ metoa wɔ mɛla ne mɔ abo zo. 174O Nana Nyamenle, nea kɛ me nye la wɔ ngoanelielɛ ne ade bie a! Menyia anyelielɛ wɔ wɔ mɛla ne mɔ anu. 175Maa mendɛnla ngoane nu, amaa meaye wɔ ayɛlɛ; na maa wɔ ngyehyɛlɛ ne mɔ ɛboa me.

176Mevo mevi wɔ adenle ne azo kɛ boane mɔɔ ɛminli la; ɛhye ati bɛla na bakpondɛ me, wɔ sonvolɛ, ɔluakɛ metɛgyakyile wɔ mɛla ne mɔ azo ɛlilɛ metɛsiele ahanle.