Biblica® Open Nzema Word of Life Gospels & Psalms 1984
Edwɛndolɛ 114
Edwɛndolɛ mɔɔ fale Maanle ye awolɛ fofolɛ nwo la
Bɛye Awulae ayɛlɛ! Mekɛ mɔɔ Yizilayɛma vile Yigyibiti, mekɛ mɔɔ Gyekɔbo abo zo amra vile aneɛ fofolɛ maanle ne anu la, Dwuda rayɛle Awulae ye nwuanzanwuanza menli, Yizilayɛ rayɛle ye belemgbunli maanle.
Nyevile Kɔkɔlɛ ne nwunle bɛ kɛ bɛlɛba, na ɔnriandinle ndɛndɛ zo; Azule Dwɔdan gyakyile ɛzenlɛ ɔmaanle bɛpɛle ye. Awoka mgbole ne mɔ wuluwulule kɛ mboane nyinli la, yɛɛ awoka ngyikyi ne mɔ wuluwulule kɛ mboane mralɛ la. O Nyevile Kɔkɔlɛ, duzu edwɛkɛ a zile, mɔɔ ɔlua zo ɛkpakyele ɛ nwo nu nwiɔ a? Na wɔmɔ, O Dwɔdan, duzu ati a ɛgyakyile ɛzenlɛ a? O bɛmɛ Awoka, duzu ati a bɛwuluwulule kyelakyela kɛ mboane nyinli la a? Bɛmɛ awoka ngyikyi ngyikyi, duzu ati a bɛwuluwulule kɛ mboane mralɛ a?
O Azɛlɛ, fa anwowozolɛ sulo wɔ mekɛ mɔɔ Awulae kɛra la, wɔ Gyekɔbo ye Nyamenle ne anyunlu; yemɔ mɔɔ ɔmaa awolɛ kakyi nzulebula, na bolɛ ɛsesebɛ kakyi azudenle la.
Biblica® Open Nzema Word of Life Gospels & Psalms 1984. Copyright © Biblica, Inc. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.