Runyankore - Rukiga Bible 1964
Zaaburi 145
Okuhimbisa Ruhanga ahabw'obukuru bwe n'oburungi bwe
Ekyeshongoro kya Daudi eky'okuhimbisa
Ndyakuhimbisa, ai Ruhanga wangye kandi Omugabe wangye;
Ndyasiima eiziina ryawe ebiro byona.
Buri izooba ndyakusiima,
Mpimbise eiziina ryawe ebiro n'ebiro. 2
MUKAMA ni mukuru, kandi ashemereire kuhimbisibwa munonga,
Obukuru bwe tibwetegyerezibwa. 3
Ab'obusingye bumwe baryagambira ab'obundi busingye, nibasiima emirimo yaawe,
Kandi bamanyise eby'amaani ebi waakozire.
Ndyagamba aha burungi bw'ekitiinisa ky'obukuru bwawe,
Ngume ninteekateeka aha mirimo yaawe y'okutangaaza. 4
Abantu baryagamba aha maani g'ebirikutiinisa ebi okora;
Kandi naanye ndyagamba aha bukuru bwawe. 5
Baryagamba munonga aha kurangaanwa kw'oburungi bwawe obwingi,
Beeshongore eby'okuhikiirira kwawe. 6
MUKAMA n'owembabazi kandi n'omunyasaasi buzima,
Tarahuka kuguubwa kubi, kandi aine okusaasira kwingi. 7
MUKAMA ni murungi ahari boona,
Kandi agira embabazi nyingi ahari byona ebi yaahangire. 8
Ai MUKAMA, ebi waahangire byona biryakuhimbisa,
N'abarikwera baawe baryakusingiza.
Baryagamba aha kitiinisa ky'obukama bwawe,
Bagambe aha by'obushoboorozi bwawe, 9
Okumanyisa abantu eby'amaani ebi okora,
N'ekitiinisa ky'obukuru bw'obukama bwawe. 10
Obukama bwawe n'obukama bw'ebiro byona,
N'obutegyeki bwawe buryagumaho obusingye bwona. 11
MUKAMA aramira boona abarikugwa,
Kandi aimutsya boona abeyinamiriire. 12
Ebintu byona bikutega amaisho,
Naiwe obiha eby'okurya omu bunaku obuhikire.
Oshashaanura engaro zaawe,
Ohaazya ekintu kyona ekihuriire ebi kirikwetenga. 13
MUKAMA n'ohikiriire omu mitwarize ye yoona,
Kandi ow'embabazi omu bi akora byona. 14
MUKAMA ari haihi na boona abamutakira,
Boona abamutakira omu mazima. 15
Abarikumutiina aryabamarira ebi barikwetenga,
Kandi aryahurira okutaka kwabo, abajune. 16
MUKAMA arinda boona abarikumukunda;
Kwonka ababi boona aryabahwerekyereza. 17
Akanwa kangye karyagamba eby'okuhimbisa MUKAMA;
Ebiine omubiri byona bisiime eiziina rye eririkwera ebiro n'ebiro.
Source notes (17)
- Cross-reference Zab 99:5; 146:2.
- Cross-reference Zab 48:1; Isa 40:28.
- Cross-reference Bir 3:24; Isa 38:19.
- Cross-reference Zab 78:4.
- Cross-reference Isa 63:7.
- Cross-reference Zab 86:15; Kur 34:6.
- Cross-reference Zab 100:5; Mat 5:45.
- Cross-reference Zab 19:1; 103:22.
- Cross-reference Zab 105:1.
- Cross-reference Zab 10:16; Dan 4:34.
- Cross-reference Zab 37:24; 146:8.
- Cross-reference Zab 104:27, 28.
- Cross-reference Zab 116:5.
- Cross-reference Zab 119:151; Bir 4:7; Yoh 4:23, 24; Yak 4:8.
- Cross-reference Zab 31:22; Enf 10:24; Yoh 9:31; 1 Yoh 5:14.
- Cross-reference Zab 97:10.
- Cross-reference Zab 150:6.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.