Runyankore - Rukiga Bible 1964
Enfumu 28
Okugyeragyeranisa abarungi n'ababi
Omubi ahunga, hataine omubingire;
Kwonka abahikiriire baba emanzi nk'entare. 2
Ensi ku eshobya, egira abategyeki baingi;
Kwonka ku egira abanyabwengye abaine okumanya,
Bagireetera okuguma ehamire 3
Omworo orikuhata abandi booro,
Ni nk'enjura etatsiga myaka. 4
Abareka ebiragiro basiima ababi,
Kwonka ababyorobera babarwanisa. 5
Enkozi z'ebibi tizimanya by'oburyo,
Kwonka abasherura MUKAMA bamanya byona. 6
Omworo ogyendera omu bwesigwa
Akira omutungi oyehabagiriza omu mihanda ye. 7
Omwana oyorobera ebiragiro aba ow'obwengye,
Kwonka onywana n'abanyamururu ahemura ishe. 8
Okanyisa eitungo rye ahabw'ebiteebwamu n'amagoba ebirengyesereize,
Aba ahendekyeire orikusaasira abooro. 9
Oyeita amatu ngu atahurira ebiragiro,
Okushaba kwe kuba ekirikunugwa. 10
Orikuhabisa ow'omutima gugororokire, akamutooza omuhanda mubi,
Aryagwa omu kiina eki atimbire;
Kwonka otaine kamogo aryahungura ebirungi.
Omutungi ayeyeta omunyabwengye,
Kwonka omworo orikwetegyereza amumanyira kimwe. 11
Abahikiriire ku basingura, habaho ekitiinisa kingi;
Kwonka ababi ku batunguuka, abantu beeshereka. 12
Orikushereka eby'okushiisha bye, tariba gye;
Kwonka orikubyatura, akabireka, aryasaasirwa.
Omuntu orikutiina MUKAMA obutoosha aine omugisha;
Kwonka orikugangaaza omutima gwe, aryagwerwa akagwe. 13
Omutegyeki mubi orikutegyeka eihanga ry'abooro,
Ni nk'entare erikutsinda, nari nk'edubu eyaasyokayo kurwana.
Omutegyeki otaine kwetegyereza abonabonesa abantu munonga,
Kwonka omuntu orikwanga amagoba mabi aryahangaara.
Omuntu otukuriirwe eshagama y'ou aitsire,
K'agume ari omuhungi, okuhitsya aha kufa;
Kandi hatarigira owaamuhwera. 14
Orikugyendera omu bwesigwa aryajunwa.
Kwonka orikwehabagiriza omu mihanda ye, aryagwa omu kiina. 15
Orikuhinga emisiri ye, aryagira eby'okurya bingi,
Kwonka orikukuratira ebitaine mugasho, aryagira obworo bwingi. 16
Omuntu omwesigwa aryagira emigisha mingi,
Kwonka orikutunga ebya bugubugu taribura kufubirwa. 17
Okushoroora omu bantu ti kirungi,
N'obu kwakuba omuntu okushiisha ahabw'ak'okurya kakye.
Omuntu engumya asheruza eitungo obwira,
Kandi tamanya ku obworo burimuhikaho. 18
Orikuhana omuntu aryakundwa
Okukira ow'orurimi rurikumamarika.
Oiba ishe nari nyina, akagira ati: Tiinyine ki naashobya,
Ogwo aba ari munywani w'omuhwerekyerezi. 19
Omunyamururu aimutsya entongane,
Kwonka orikwesiga MUKAMA aryatungisibwa. 20
Orikwesiga omutima gwe n'omushema;
Kwonka orikugyendera omu bwengye aryajunwa. 21
Orikuha abooro, tarikyena;
Kwonka orikubeehuzya aryagira emikyeeno mingi. 22
Ababi ku batunguuka, abantu beeshereka;
Kwonka ku bacwekyerera, abahikiriire bakanya.
Source notes (22)
- Cross-reference Lev 26:17; 1 Sam 17:37.
- Cross-reference 1 Bag 16:8-23.
- Cross-reference Mat 18:28.
- Cross-reference 1 Bag 18:18, 21; Neh 13:11, 15; Mat 3:7; Rom 1:32.
- Cross-reference Zab 92:6; 119:100; Yoh 7:17; 1 Kor 2:15.
- Cross-reference Enf 19:1.
- Cross-reference Enf 23:20.
- Cross-reference Enf 14:31; Lev 25:36.
- Cross-reference Enf 15:8; Zab 109:7.
- Cross-reference Zab 7:15.
- Cross-reference Enf 11:10; 28:28.
- Cross-reference Yob 31:33; Zab 32:5; 1 Yoh 1:8, 9.
- Cross-reference Kur 1:13, 14; Mat 2:16.
- Cross-reference Enf 10:9.
- Cross-reference Enf 12:11.
- Cross-reference 1 Tim 6:9.
- Cross-reference Enf 18:5; Ezk 13:19.
- Cross-reference Enf 27:5, 6; 29:5.
- Cross-reference Enf 15:18.
- Cross-reference 1 Kor 3:18.
- Cross-reference Enf 11:24; 19:17.
- Cross-reference Enf 28:12.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.