Runyankore - Rukiga Bible 1964
Isaaya 20
Misiri na Esiopia okuhanuurwaho eby'okutwarwa omu bukwatwa
Omu mwaka ogu Tarutaani, owaatumiirwe Sarugooni omugabe wa Asiria, yaiziiremu Ashidoodi, akagirwanisa, akagikwata, 2 omu bunaku obwo MUKAMA akagambira Isaaya mwene Amozi, ati: Irooko, oyezirikuurure ebiguniya, ojuure enkaito. Nawe nikwo yaakozire, akagyenda ajwaire busha, kandi ataine nkaito. 3 MUKAMA akagira ati: Nk'oku omwiru wangye Isaaya amazire emyaka eshatu naagyenda ajwaire busha kandi ataine nkaito, okubeera Misri na Esiopia akamanyiso n'eky'okutangaaza, 4 nikwo n'omugabe wa Asiria aritwara Abanyamisri bari enkwatwa, n'Abaesiopia bari encuubwa, abato n'abakuru, bakagyenda bajwaire busha, bataine nkaito, ebibunu biri aheeru, kuhemura Misri. 5 Bwanyima abo abaabaire bataire amatsiko ahari Esiopia, nibeehimbisiza ahari Misri, baryahahaaza emitima, bashoberwe. Eryo izooba abatuuzi b'omuri egi nsi y'aha rubaju rw'enyanja baryagira bati: Mbwenu, abu twabaire tutaireho amatsiko, tukabahungiraho ngu batujune omugabe wa Asiria, ku baraabe babaire batyo, itwe turyakira tuta?
Source notes (5)
- Cross-reference 2 Bag 18:17.
- Cross-reference 1 Sam 19:24; Mik 1:8.
- Cross-reference Isa 8:18.
- Cross-reference Isa 19:4; 2 Sam 10:4; Mik 1:11.
- Cross-reference Isa 30:3, 5; 2 Bag 18:21.
Runyankore - Rukiga Bible 1964. Public domain. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · Public domain · SourceEdition imported 2026-11-09.