2 Samueli 9

Daudi okugarura Mefiboshesi omu bintu bya Saulo ishenkuru

11

Bwanyima Daudi yaabuuza ati: Ebyo haine owaatsigaireho omu nju ya Saulo, nkamukorera eby'embabazi ahabwa Yonasaani? 22 Omu biro ebyo hakaba hariho omuheereza ow'omu nju ya Saulo orikwetwa Ziiba; baamwetera Daudi omugabe, yaamubuuza ati: Niiwe Ziiba? Onu ati: Niinye omwiru waawe. 33 Omugabe yaamubuuza ati: Omu nju ya Saulo haine okiriho nkamukorera eby'embabazi za Ruhanga? Ziiba yaamugarukamu ati: Hakiriho mutabani wa Yonasaani, oremaire ebigyere. 44 Omugabe yaamubuuza ati: Arahi? Ziiba yaamugarukamu ati: Ari Lodebaari omu nju ya Makiri mwene Amieli. 5Omugabe Daudi nikwo kutuma, bakamwiha Lodebaari omu nju ya Makiri mwene Amieli. 65 Atyo Mefiboshesi mwene Yonasaani, mwijukuru wa Saulo yaija owa Daudi, yaajuumara omu maisho ge, yaamutangirira. Daudi yaamugira ati: Mefiboshesi! Onu yaamugarukamu ati: Omwiru waawe ari aha. 76 Daudi yaamugira ati: Otatiina, ahabw'okuba buzimazima niinyija kukukorera eby'embabazi ahabwa Yonasaani sho, nkugarurire ebibanja bya shwenkuru byona; kandi oryaguma nooriira aha meeza yangye obutoosha. 8Mefiboshesi yaagaruka yaamwinamira, yaagira ati: omwiru waawe ni kintu ki, iwe okuunyetaho, nyowe embwa efiire?

9Bwanyima omugabe yaayeta Ziiba omuheereza wa Saulo, yaamugira ati: Ebyabaire biri ebya Saulo byona n'eby'ab'omu ka ye boona, naabiha mutabani wa mukama waawe. 107 Kandi iwe n'abatabani baawe n'abairu baawe mugume mumuhingire emisiri, mumureetere ebyezire, mutabani wa mukama waawe abone kutunga eby'okurya; kwonka Mefiboshesi mutabani wa mukama waawe aryaguma naariira aha meeza yangye obutoosha. Kandi Ziiba ogwo akaba aine abatabani ikumi na bataano, n'abairu makumi abiri. 11Ziiba yaagira omugabe ati: Ebi Nyakusinga omugabe yaaragiira omwiru we byona, omwiru we nikwo araagume naabitwaza. Okuruga aho Mefiboshesi yaaguma naariira aha meeza y'omugabe, nk'omwana w'omugabe. 128 Kandi Mefiboshesi akaba aine omutabani muto orikwetwa Miika; ab'omu ka ya Ziiba boona bakaba bari abairu ba Mefiboshesi. 13Atyo Mefiboshesi yaaguma Yerusaalemu, ahakuba akaba ariira aha meeza y'omugabe obutoosha; kandi akaba aremaire ebigyere byombi.