Skip to content
BibleKenya

TRADUCTION BILBE EN KINYANGA

Matthew 28:20

Verse 20 is marked below, with the whole chapter around it. Read from the start

Erifuka ra Yesu

(Mar 16.1-10; Ruk 24.1-12; Yoh 20.1-10)

Erotu rw'eSabato rweta. Mu mukoma-koma w'erotu rw'eriinga, Maria wa ku Makitara n'eumpe Maria benda kasunga erisinda. Hiha-hiha, kweta karingiri kasuma, bushwa mbu emaraika wa Nyere Kuritu wahitanga ituka mu mbingu, wakensere kwihi n'erisinda. Wahimira erikoi ndo kumushi n'irika hiyo naro. Emaraika ngo wabesenga usanange nguru buri kimpenya, n'esanchangi sae sabesenga sisanange nguru buri mahungu. Ebasura mbi babesenga barangange erisinda bakwa boba nguru n'ibucha ititimane, n'ibese buri bamakwa.

Emaraika ngo were ebomina mbo mbu: «Kiro musubaha, bushwa nosi mbu banu musondange Yesu ngu wakutundikwa mu musaraba. Usira tu hano. Wamafuka itukana nambu bwabesenga bwameba we. Mweye kisungire impi habeseyo hamamuraamya bo. Mwendí tete kere ebanafunsi bae mbu wamafuka, na wamasondore bo ku Ngariraya. Nanko nge kusemusungire bo. Ngebumbo, namakinda ibuture emwasi!»

Ebomina mbo batuka h'isinda tete na nti basubaha, ina babesenga bamoa nguru. Emwasi ngo, batibita tete kature o ebanafunsi bae.

Hiha-hiha, Yesu wasaire bo n'iere bo mbu: «Nabukea!» Bakensere kwihi nae, batinge mu bisando byae n'imusimanike.

Nampo, Yesu were bo mbu: «Kiro musubaha! Mwendi kere banakitu mbu bendi ku Ngariraya. Nanko nge kusenisungire bo.»

Ebasura batura mwasi wa manko

Ebomina mbo bakianga bakiri mu munse, basura bima mu mbi babesenga barangange erisinda benda murubungu.1 Ebasura mbo bature ebakwakare b'ebakuhani ebinwa biti mbi byakweta. Bushwa nancho, ebakwakare b'ebakuhani mbo bakumanana hima n'ebakungu b'eBayuta n'ikera rwanko. Baninka ebasura mbo behe bingi, n'iere bo mbu: «Mwendi keba mbu: ‹Ebanafunsi bae bakweya kamushuma mu mutu nti turere.› N'emwasi ngo, kuba emukwakare Pirato nae warukira o, bate bisine twaseba nae. Nampo, ekinwa ncho kitaburishii ubansa.»

Ebasura mbo, batinge ebehe mbyo n'ironja mbu bwakukia bere bo. Emwasi ngo wansansabana kuri eBayuta ieya na runotu.

Yesu watuma ebanafunsi bae mu murimo

(Mar 16.14-18; Ruk 24.36-49; Yoh 20.19-23; Miko 1.6-8)

Kuruma nampo, ebanafunsi ikumi na uma ba Yesu benda ku Ngariraya mu rou ndu rwabesenga rwamakia Yesu washéa bo. Bakianga bamusunga, bamusimanike. Ina bima mubo batikatika.

Kuruma nampo, Yesu wakensere kwihi nabo. Were bo mbu: «Namaninkwa ebukwakare buti mu mbingu na mu chuo. Kai, mwenderi ebea b'ebyuo biti, kongo babese banafunsi bani. Mwenda banu murubikange bo mu rina ra Tita, na r'eMwana, na r'eMutima Washurukara. Mwenda banu muhanange bo ironja ebiti mbi byabwireyo ani. Na musibanga mbu niri hima ninu ematu ati ieya na hende echuo.»

Source notes (1)
  1. Footnote Murubungu: Yerusaremu.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.