Skip to content
BibleKenya

TRADUCTION BILBE EN KINYANGA

Matthew 27

Yesu warierwa mu makako a Pirato

(Mar 15.1; Ruk 23.1-2; Yoh 18.28-32)

Ebutu bwakianga bwamacha, ebakwakare b'ebakuhani bati n'ebakungu b'eBayuta batinge nama y'erishura Yesu. Bamumina, bamuria n'imusia mu makako emukwakare Pirato.

Yuta wikonora

(Miko 1.18-19)

Yuta ngu wasiburanga Yesu, wakianga wamasunga Yesu wamahukumiwa, watindibara nguru. Nampo waringa ebikoroto mbyo makumi ashatu by'ebehe n'ikuruchie byo ebakwakare b'ebakuhani n'ebakungu b'eBayuta. Were bo mbu: «Namaronja nsambi murisibura mwea ngu usira bubi!» Nabo bamusako mbu: «Rwabe ndo, nti rwatukae tu!»

Yuta wataa ebikoroto mbyo mu Numba ya Ongo. Kuruma nampo, wenda kikonora.

Ebakwakare b'ebakuhani basombo-sombo ebikoroto mbyo. Beba mbu: «Itukana n'eMyomba yitu, ebehe bino ntibyakomenwa ibikwa mu nku y'eNumba ya Ongo, bushwa mbu behe bya nchama.»

Bushwa nancho, barana mbu basekoresha ebehe mbyo mwichura ishwa ra murenga uma wa marea kongo benda bataange ebeni muro. Ngyasingwa erishwa ndo rabikirwa ieya na runotu mbu: «Ishwa ra Nchama.»

Nampo, byabererera ebinwa mbi byebanga emutahwa Yeremia mbu: «Batingenga bikoroto makumi ashatu bya behe itukana n'ebusi bwasunganga Baisiraeri mbu bwakomenwa iengana nae. Ebehe mbyo, bachura byo ishwa ra murenga wa marea imbu bwanirenga Nyere Kuritu.»1

Yesu uburanange mu makako a Pirato

(Mar 15.2-5; Ruk 23.3-5; Yoh 18.29-38)

Mu kashangi nko, Yesu warierwa mu makako emukwakare Pirato. Pirato wakianga umusambishange, wamushisha mbu: «Mbeni ǒngo nge Mwami w'eBayuta?» Nae mbu: «Ǒngo kisine ng'umeba!»

Kuruma nampo, ebakwakare b'ebakuhani n'ebakungu b'eBayuta babucha isongere Yesu. Ina Yesu ntwasakonga kinwa. Bushwa nancho, Pirato wamushisha tu mbu: «Ebinwa biti mbi bikusongerengi bo, mbeni utungarukira byo?» Ina mu biti mbyo, Yesu ntwasakonga kinwa kiti-kiti. Bushwa nacho, emukwakare Pirato washishara nguru.

Pirato wahukumu Yesu mbu wakwe

(Mar 15.6-15; Ruk 23.13-25; Yoh 18.39; 19.16)

Mu kirotu rukiri rw'ePasaka, emukwakare wabesenga ubororenga ebea mwea uma mu'mbi baminwa ingu washima bo. Mu matu ngo, Mwea uma mbu nge Yesu Baraba wabesenga waminwa. Baraba ngo, wabesenga usibirwe nguru bushwa n'ebibí bikorangǎ we.2

Ebea bakianga bamakumanana hima, Pirato washisha bo mbu: «Mushima mbu nibuboreri inye? Mbeni Yesu Baraba, abe Yesu uno ubikirwange mbu Kirisitu?» Washishanga mbo bushwa mbu wabesenga wosi mbu ebea bamurishienga Yesu bushwa n'erimukwire mono.

Pirato wakianga ukiri usambishange Yesu hamburano mpo, mukaryae wamutumire mwasi mbu: «Angi kwiria mu binwa by'emwea ngo waombokara! Bushwa mbu, mu butu bwa runotu, nakunonta nsori bushwa nae, n'esansori nso sakuninubya nguru.»

Ina ebakwakare b'ebakuhani n'ebakungu b'eBayuta basheeresha ebea mbu bakonge Baraba woborwe, na Yesu washurwe.

Emukwakare Pirato washisha tu bo mbu: «Munkati n'ebea babi bano, mbeni mushima nibuboreri inye?» Nabo mbu: «Baraba!» Pirato washisha tu bo mbu: «Mbeni mushima nironje buni na uno Yesu ngu ubikirwange mbu Kirisitu?» Ebati basako mbu: «Watundikwe mu musaraba!» Pirato washisha tu bo mbu: «Mbeni inye bubi bwakuronja we?» Ina ibo benderee n'ikua nguru mbu: «Watundikwe mu musaraba!»

Pirato wakianga wasunga mbu usira tu ch'erironja, na bushwa n'eririra r'eburunga munkati ebea, waringa mecha n'ishua emine munkati n'ebea bati. Weba mbu: «Kiro enchama y'emwea uno yabese hiyo n'emuntwe wani, ina hiyo n'emuntwe winu!»

Ebea bati basako mbu: «Nanki! Enchama yae yabesenga hiyo n'emuntwe witu n'ebana bitu!»

Nampo ke, Pirato wobore bo Baraba, n'ihumbisha Yesu tushushu. Kuruma nampo, wasibure bo we kongo bamutundika mu musaraba.

Ebasura bacharikange Yesu

(Mar 15.16-20; Yoh 19.2-3)

Kuruma nampo, ebasura b'emukwakare Pirato baria Yesu mu butara bukiri bw'enumba y'emukwakare ngo. Ekikembe kiti ch'ebasura bamutimba. Ebasura mbo bamukungura esanchangi sae n'imwambicha nchangi yaaruka.3 Baruka kakumbu ka bisu biri na menke, n'imwambicha ko hiyo n'emuntwe. Baria n'iseke mu mwine wae w'ekwabume. Kuruma nampo, benda bamukomerengi emaru na nti bamucharikange mbu: «Emwami w'eBayuta, tukukeange!» Bamuturae inte, batinge iseke n'ibucha imurasaka ro hiyo n'emuntwe.

Bakianga bamahea imucharika mbo, bamukungura enchangi njo n'imumbaricha tu esanchangi sae. Kuruma nampo, benda nae kamutundika hamusaraba.

Yesu watundikwa mu musaraba

(Mar 15.21-32; Ruk 23.26-43; Yoh 19.17-27)

Ebasura mbo bakianga batukange murubungu, bakumana mwea uma w'erubungu rwa ku Kurene mbu nge Simoni. Simoni ngo, bamuriesha emusaraba wa Yesu ra kamimo.

Kuruma nampo, beya mpi habikirwange mbu Ngoringota, ngerieba mbu «eRou rw'eRikua r'eKahangasi.» Baninka Yesu ndifai yasonyiwa na kabi. Ina wakianga wamarora mu yo, watina yo.

Ebasura mbo bakianga bamamutundika mu musaraba, babanyana esanchangi sae mwitaa emishari.4 Kuruma nampo, barika mpo mwiranga Yesu. Na hiyo n'emuntwe wae, batereka ho kisai nchi chaandikwa mo binwa mbi byasingwanga bamuhukumu. N'ebinwa mbyo byabesenga byeba mbu: «Uno nge Yesu, Mwami w'eBayuta.»

Banyai babi nabo babesenga bamatundikwa mu misaraba hima na Yesu, uma muruharo rw'ekwabume kwae n'eumpe muruharo rw'ekurembe.

Ebea mbi babesenga betange mpo, babesenga bamukambaange n'itenja emintwe, n'imwire mbu: «Era, mbeni nti ǒngo ng'uhunayo ikakura eNumba ya Ongo n'iumba tu yo mu matu ashatu? Kuba ho ǒngo nge Musike wa Ongo, ishukaye ke ǒngo kisine, ikutu ke mu musaraba mpo!»

Ebakwakare b'ebakuhani hotu, n'ebahani b'eMyomba hima n'ebakungu b'eBayuta, babesenga bamuseange ntibebange mbu: «Wabeseyo ushukayange bampe bea, ina iwe kisine wafundwa kwishukaya! Mbeni ntiwe ketu nge Mwami w'eBaisiraeri? Wikutu ke mu musaraba kongo twamusimira! Wabeseyo winyihire Ongo na ntwebange mbu iwe Musike wa Ongo. Kai kuba Ongo ngo wamushima, wamushukaye enompena!»

Ebanyai mbi batundikwanga hima na Yesu, nabo hotu babesenga bamukambaange.

Erikwa ra Yesu

(Mar 15.33-41; Ruk 23.44-49; Yoh 19.28-30)

Kuruma nampo, emwirimya wahumbe echuo kiti ibuchie ntambi mutuba sa mumwishi ieya na ntambi mwenda sa mwiyoro. Murisonda irumira ntambi mwenda, Yesu wákua murenge mukiri mbu: «Eri! Eri! Rama sabakitani?» Ngerieba mbu: «Ongo wani! Ongo wani! Mbeni umanisia bushwa nki?»

Bea bima mu mbi babesenga mpo bakianga bamarukira mbo, beba mbu: «Ubikirange Eria!» Hiha-hiha, mwea uma mubo watibita karinga kabe ka nchangi, n'iboboya ko mu ndifai yasua nguru. Ekabe k'enchangi nko, wamina ko hiyo n'useke. Watarishie ko Yesu mbu womu. Ina ebampe, ibo beba mbu: «Mumureki tukai kuba Eria waseya kamushukaya!» Yesu wakua tu nguru. Kuruma nampo, wakera emutima.

Hiha-hiha, enchangi nji yabesenga irembengi mu Numba ya Ongo5 yabenguka bebe bibí itukire ekwiyo ieya n'ekwansi. Nampo, kweta karingiri kasuma n'esankanga sabenguchaa. Emasinda oboka, na bea bakwanga bashurukara bafuka. Basaa-saa mu masinda, na kuruma n'erifuka ra Yesu, bakime murubungu rwashurukara rwa ku Yerusaremu, na bea bingi basunga bo.

Mukwakare uma wa basura hima n'ebasura bae mbi babesenga barangange Yesu, bakianga bamasunga ekaringiri, n'ebinwa biti mbi byameta, bakwa boba nguru. Babucha ieba mbu: «Muriira, emwea uno wabesenga Musike wa Ongo!»

Himpo habesenga bomina bingi bakairirengi kore kakeke. Ebomina mbo bamisanga Yesu itukire ku Ngariraya nti bamukorengi. Munkati nabo, mwabesenga Maria wa ku Makitara, Maria nina wa Yakobo na Yosefu, na nina w'ebasike ba Sebendayo.

Yosefu wataa ekinda cha Yesu murisinda

(Mar 15.42-47; Ruk 23.50-56; Yoh 19.38-42)

Ebutu bwakianga bwamaoroba, kwasaa mwea uma mutumba w'erubungu rwa ku Arimatayo wabikirwa mbu Yosefu. Yosefu ngo, nae wabesenga mwanafunsi wa Yesu. Wenda kuri Pirato kamukonga ekinda cha Yesu. Pirato weba mbu baninke Yosefu ekinda ncho. Yosefu watinge ekinda ncho, waondonda-ondonda cho mu murekani mushasha. Wenda kataa cho murisinda rae rishasha. Erisinda ndo, wabesenga wamitimishe ro murukanga. Kuruma nampo, watereka ikoi rikiri hamiango n'erisinda, n'ikwiire. Maria wa ku Makitara n'eumpe Maria, babesenga bakurika ekwansi mpo, habusondori n'erisinda.

Ebasura barangange erisinda ra Yesu

Erotu ndo, nge rwabesenga rw'emarario eSabato,6 rweta. Ebutu bwakianga bwamacha, ebakwakare b'ebakuhani n'eBafarisayo, bakumanana kwa Pirato. Bamwire mbu: «eNyere Kuritu, twasubukia ematu akukianga emwea w'enkuse ngo nt'ukiri ho, weba mbu: ‹Nasekwa, ina nasefuka mu matu ashatu.› Bushwa nancho, ere ebasura mbu barange erisinda ieya n'erotu ndo rw'emeta ashatu, kongo ebanafunsi bae bateyi kashuma ekinda chae, kuruma bendi kahusa ebea mbu wamafuka. Kai emanko ngo nge asesuma ketu nguru irenga ngi aroso.» Pirato wasako bo mbu: «Banu muri n'ebasura! Mwendi karanga erisinda imbu bwashima banu.»

Ngerikia ke basimana n'ienda h'isinda. Bakaso ekashe hiyo n'erikoi ndi rabesenga rabumbe erisinda ndo, n'isia ho barangi.

Source notes (6)
  1. Footnote Soma Sak 11.12-13; Yer 32.6-15.
  2. Footnote Yesu Baraba: Bitabo bima bitasheanga mbu Baraba nae wabikirwa mbu Yesu.
  3. Footnote Nchangi yaaruka : Enchangi yaaruka yabesenga nchangi ya bubake ekuBaroma. Ebasura b'eBaroma bambarichanga Yesu enchangi njo mwimucharika
  4. Footnote Soma Sab 22.19.
  5. Footnote Soma Ituk 26.31-33.
  6. Footnote Erotu rw'emarario eSabato, rwabesenga otu rwa asanu, n'erotu rw'emutuba nge rwabesenga rw'eSabato.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.