Skip to content
BibleKenya

TRADUCTION BILBE EN KINYANGA

Matthew 23

Yesu uhakanyange eBafarisayo

(Mar 12.38-39; Ruk 11.43,46; 20.45-46)

Kuruma n'ebinwa mbyo, Yesu were ekikembe ch'ebea hima n'ebanafunsi bae mbu: «Ebahani b'eMyomba n'eBafarisayo bari na murimo w'ihana eMyomba ya Musa. Bushwa nancho, muhwa ibereresha n'ironja ebinwa biti mbi bisenda bibwerengi bo.

«Ina kiro banu mwendi mumisange emikorere yabo bushwa mbu ebinwa mbi byebangǎ bo ntí nge bikorangǎ bo. Barongerenga bampe mirio yaritohyaa, inji yasuma iria, n'iriesha bo yo mu bituri, ina ibo bisine baterekanga iria mu yo n'ekantonya murisake bo. Ebinwa biti bikorangǎ bo, bakorangǎ byo kongo basungwa n'ebea. Ibo batohyangǎ etwamasanduku etumbarangǎ bo mu mbaso abe mu mine.1 Ngebumbo hotu, esaropo nsi simbaranga bo sirikanga na mipindo yarembe-rembe mwishea mbu ibo basubaha eMyomba ya Ongo.2 Kinsi mpi haronjiwange kibimbi, bashimangǎ irika mu bitumbi by'ebukwakare. Na mu masinangoki, bashimangǎ irika mu bitumbi bya kubusondori. Bashimangǎ hotu mbu ebea bendi bakeange bo n'usubaho mu sankumanano, n'ibikirwa mbu: ‹Muhani!›

«Ina banu kiro mwendi musimira ibikirwa mbu: ‹Muhani!› Bushwa mbu banu bati banakima, na banu muri na Muhani uma ho. Ngebumbo hotu hano mu chuo, kiro mwendi mubikira mwea uti-uti mbu: ‹Tita.› Bushwa mbu banu muri na Tita uma ho ingu uri mu mbingu. Kiro mwendi murisia ibikirwa mbu: ‹Mukwakare!› Bushwa mbu banu muri na Mukwakare uma ho nge Kirisitu. Kai, kinsi ngu mukwakare munkati ninu, wabesenga mukori winu. Kinsi mwea ngu witarisha, wasehichiwa. Ina ngu wihicha, iwe wasetarishwa.

Yesu washemba enkuse y'ebakwakare b'ebakuhani n'eBafarisayo

(Mar 12.40; Ruk 11.39-52; 20.45-47)

«Buhanya kuri banu ebahani b'eMyomba na banu Bafarisayo! Banu bea ba nkuse! Banu muminengi bampe bea ense y'erikime mu Bwami bwa mu mbingu, na banu bisine mutungakime mu yo. Nambi bahunange ikime mu bwami mbo, banu muhangirengi bo.

[ «Buhanya kuri banu ebahani b'eMyomba na banu Bafarisayo! Banu bea ba nkuse! Banu mubakanga ebehe by'ebashumbakari n'ihema mahemo a mundiendie kongo ebea babusunga. Bushwa nancho, mukuhukumiwayo rasuma nguru!]

«Buhanya kuri banu ebahani b'eMyomba na banu Bafarisayo! Banu bea ba nkuse! Banu mutimbange echuo n'enyansa kongo mubundura mwea uma wabesi w'ekikembe kinu. Mumashee emwea ngo, banu mumuronjanga buri wakomenwa ihukumiwa ra meta abi iburenga banu.

«Buhanya kuri banu ebakwakare bihumihumi! Banu mwebanga mbu: ‹Kuba mwea wasere mu rina r'eNumba ya Ongo, hasira mwinda! Ina kuba wasere mu rina r'enoro nji iri mu Numba ya Ongo njo, emwea ngo wakomenwa ironja ebyakusere we.› Banu birunge tuna banu bihumihumi! Kinki charenga kimpe, mbeni enoro nji irikire mu Numba ya Ongo abe enumba ya Ongo yisine abe eNumba ya Ongo nge yasingwa enoro njo yabese yashurukara? Ngebumbo hotu bwebangǎ banu mbu: ‹Kuba mwea wasere mu rina r'ebutanda bw'empero,3 hasira mwinda! Ina kuba wasere mu rina r'ebisabo mbi birikire ha butanda bw'empero mpo, wahwa ironja mbu bwakusere we.› Rero banu bihumihumi! Kinki nge charenga kimpe? Mbeni ebisabo abe ebutanda bw'empero? Ebutanda bw'empero nge busingwange ebisabo byabese byashurukara! Bushwa nancho, kuba mwea wasere mu rina r'ebutanda bw'empero, ngerieba mbu wasere bushwa n'ebiti mbi biri hiyo n'ebutanda mbo. N'emwea ngu wasere mu rina r'eNumba ya Ongo, wasere mu rina r'eNumba ya Ongo na mu rina ra Ongo ngu urikanga kumunda nayo. Nangu wasere mu rina ra mu mbingu, wasere mu rina r'erutebe rwa Ongo, na mu rina ra Ongo ngu warika hiyo naro.4

«Buhanya kuri banu ebahani b'eMyomba na banu Bafarisayo! Banu bea ba nkuse! Banu musabanga Ongo echakumi ch'esanyenyi5, ina banu musianga ebinwa mbi byaraisha nguru mu Myomba, buri ironja byaombokara mu makako a Ongo, ikwirane bonso, n'eribese mwea w'iira. Ebinwa mbyo nge byakomenwa rero ienda bironjange banu hima n'ebimpe. Banu bakwakare bihumihumi! Banu mushongoranga emunsari mu byeriomo, ina banu muminanga ngamia kintenga!

«Buhanya kuri banu ebahani b'eMyomba na banu Bafarisayo! Banu bea ba nkuse! Banu mushuanga erusara n'entengi ekumbuka ho, ina kumunda nabyo kurisere bikai mbi byakushee banu mu bwibi na mu karawa kema. Ǒngo Mufarisayo kihumihumi! Wenda ushua kasa kumunda n'erusara na kumunda n'entengi, n'ekumbuka kwabyo kusehunda.

«Buhanya kuri banu ebahani b'eMyomba na banu Bafarisayo! Banu bea ba nkuse! Mususanyiwa na masinda ngi asingurwa mpemba. Emasinda ngo asungwange ekumbuka buri akoma-koma, kai kumunda arisere makua a bakwi na bimpe biborebore. Nge buri hotu banu bumbo ho. Mu meso ebea, banu musungwange buri bea baombokara mu makako a Ongo. Ina kumunda ninu, banu murisere nkuse hima na bibí.

Ehukumu y'eBafarisayo n'ebahani b'eMyomba

(Ruk 11.47-51)

«Buhanya kuri banu ebahani b'eMyomba na banu Bafarisayo! Banu bea ba nkuse! Banu mwimbanga emasinda ebatahwa n'itonda emasinda ebea baombokara mu makako a Ongo. Banu mwebanga mbu: ‹Twamubesengi ho mu matu a batitanku bitu, kongo tutamuberengi nabo mu nama y'erishura ebatahwa.› Murieba mbo, banu musheange banu bisine mbu banu bana ba bea mbi bashuranga ebatahwa.

«Kai, emurimo ngu wabuchanga batitanku binu, muheanye o! Banu muri buri kisasa cha nsoka! Mbeni buni nge bwamukocha banu ibeka ehukumu ya h'irunga? Bushwa nancho, nasebutumireyo batahwa hima na bea ba butesa, na bahani. Mukushurayo bima mubo, mukutundikayo bampe mu musaraba, na bampe mukurasayo bo tushushu kumunda n'emasinangoki inu n'ihenda bo ubungu mu rumpe. Bushwa nancho, enchama y'ebea mbi basira bibí mu chuo kino, isebeseyo hiyo n'emintwe yinu. Ibuchie kuri Aberi, ewabesenga mwea waombokara mu makako a Ongo, ieya na kuri Sakaria musike wa Barakia ingu washurenga banu mu Numba ya Ongo munkati-nkati n'eBuari Bwashurukara n'ebutanda bw'empero.6 Nibwirengi muriira mbu erishurwa r'ebea bati mbo, ebea b'ematu ano nge baseshishiwayo ro.

Yesu warire bisa ku Yerusaremu

(Ruk 13.34-35)

«Banu bisa ku Yerusaremu, bisa ku Yerusaremu! Banu mushuranga ebatahwa, n'ebea bampe mbi babutumirengǎ Ongo, banu mushuranga bo na makoi. Ngendo singi nihunange rero ibukumanyanya imbu bukianga enkoko yasonja etunyau twae kumunda n'ebyubi, ina banu mukutinanga mbo! Eo, mukohyanga! Enumba yinu isesia munu7 Nibwirengi mbu itukire enompena, mutunisungiyo tu ieya n'erotu ndu rusekiayo mweba mbu: ‹Wakasanirwe uno ngu weyange mu rina ra Nyere kuritu8!›»

Source notes (8)
  1. Footnote Twamasanduku: eBayuta babesenga bambaranga twamasanduku mu mbaso abe mu mine. Etwamasanduku nto, kumunda nato kwabesenga kwabikwa binwa bima-bima by'eMitiro Yashurukara. Soma Ituka 13.16
  2. Footnote Soma Ians 15.37-41.
  3. Footnote Ebutanda bw'empero: Eku Bayuta, ebutanda bw'empero bwabesenga bwimbwanga murishike mubo mafuta abe mpero nji yasiburwa kuri Ongo. Yabesenga itumbwanga na miti, ina biriki abe makoi. Ongo nae wasimiranga mbu ebea bae benda bamusiburengi mpero murishike yo habutanda mbo.
  4. Footnote Soma Isa 66.1; Mat 5.34.
  5. Footnote Soma Bar 27.30; Isub 14.22.
  6. Footnote Soma Ntangiro 4.8; 2 Biranga 24.20-22.
  7. Footnote Soma Yer 22.5.
  8. Footnote Soma Sab 118.26.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.