Skip to content
BibleKenya

TRADUCTION BILBE EN KINYANGA

Matthew 22

Emushinga w'ekibimbi ch'eriherucha

(Ruk 14.15-24)

Yesu wenderee ieba n'ebea mbo mu mishinga. Were bo mbu: «eBwami bwa mu mbingu bwasusanyiwa na mwami uma ngu waronjeenga musikyae kibimbi ch'iherucha. Emwami ngo watuma ebakori bae mbu bendi kabikira ebea mbi babesenga bamararika we mu kibimbi ncho. Ina ebea mbo batina ieya. Kuruma nampo watuma bampe bakori. Were bo mbu: ‹Mwendi kere ebea mbi bakurarika ani mbu: "Namakinda rero ibaa nkambu sani, na simpe nyama nsi sanone-none. Ebikai biti ngie biri ho, ngebumbo, mweye mu kibimbi."› Ina ebararikwanga batirai mu murariko ngo, biire mu byabo. Uma wiire ekwishwa rae, umpe wiire kanonka, n'ebampe batinge ebakori mbo, banubya bo n'ishura bo.

«Nampo emwami ngo wasubuka nguru. Watuma ebasura bae kashura ebayeri mbo n'ishika erubungu rwabo. Kuruma nampo, were ebakori bae mbu: ‹Ebio by'ekibimbi ch'eriherucha byamahwa, ina ebea mbi bakurarika ani ntí nge barawanga byo. Bushwa nancho, mwendi mu makano, n'ebea bati mbi basekumana banu, mubikire bo beye mu kibimbi ch'eriherucha.› Ebakori mbo benda mu myengere, basonja ebea bati mbi basunganga bo, ebarongu n'ebema. Enumba y'ekibimbi yarisa beni.

«Emwami ngo warekɨa wamakime mu numba njo kongo wakae ebeni, wasunga mwea uma ngu wabesenga ntwambara mu nchangi y'ekibimbi ch'eriherucha. Wamushisha mbu: ‹Emirani, mbeni umakime muno buni na nt'umbara enchangi y'ekibimbi?› Emwea ngo watasubii kinwa. Nampo ke, emwami ngo were ebakori bae mbu: ‹Emwea uno mumumɨne emine n'ebisando, mumutae habutara mu mwirimya! Na mu mwirimya ngo nge muserire we n'inuba nguru.›»

Kuruma nampo, Yesu weba ke mbu: «Ebararikwa bingi, ina ebarondorwa bakeke.»

Ebea bashisha Yesu bushwa n'eritua ehoro ya Kaisari

(Mar 12.13-17; Ruk 20.20-26)

Kuruma nampo, eBafarisayo benda nama y'eritea Yesu kinwa kongo bamutinge ietere ebinwa byae. Bamutumire banafunsi babo bima hima na bea bingi ba mu kikembe cha Herote. Beya kashisha Yesu mbu: «eMuhani, bate tosi mbu ǒngo webanga iira, n'ihana ebea binwa bya Ongo ebyakomenwa imisa bo. Ngebumbo hotu, utusubahanga mwea uti-uti, na nt'urae mu kirira cha mwea. Kai, twiiri ekianikirange ǒngo mu kinwa kino: mbeni emyomba yitu yarisia abe ntyarisia twendi tutuange ehoro kuri Kaisari?»

Ina bushwa mbu Yesu wabesenga wamasiba emyanikiri yabo yema, wasako bo mbu: «Banu bea ba nkuse! Bushwa nki banu munerekange? Munishee ebehe mbi bininkanangǎ banu muritua ehoro.»

Bamurishie kikoroto kima cha behe bya tinari. Ngerikia Yesu washisha bo mbu: «Mbeni ensusanya ino n'erina rino raandikwa hano, byanye?» Nabo mbu: «Bya Kaisari!»

Nampo Yesu were bo mbu: «Kai mwendi muninka Kaisari imbi byae, na Ongo nae mwendi mumuninka byae.» Ebea mbo barekia barukira mbo, bashishara nguru. Bamureke, biire.

Basandukayo bashisha Yesu bushwa n'erifuka r'ebakwi

(Mar 12.18-27; Ruk 20.27-40)

Mu rotu ruro-ruro, Basandukayo bima nabo beyere Yesu. eBasandukayo, nge bebangǎ mbu ebakwi batafukiyo. Bamushisha mbu: «eMuhani, Musa webanga mbu: ‹Kuba emwea wakwa na nti wasia mwana, rakomenwa moto wae wabinge emushumbakari ngo kongo wabutire muku wae bana.›1 Munkati nitu, kwarikanga misike irinda ya bura buma. Entangi yabinga mumina, wakwa na nti tíwarebʉta. Moto we watinge emushumbakari ngo. Rabesa tumbo na kuri w'emeta abi. Rabesa tu mbo kuri w'emeta ashatu ieya na mu w'emeta arinda. Kuruma n'erikwa r'emisike irinda iti njo, emumina ngo nae wakwa. Erotu ndu rusekiayo ebarikwa bafuka, mbeni emumina ngo wasebeseyo wanye? Bushwa mbu ebati bamubinganga!»

Yesu wasako bo mbu: «Banu mwihusange bushwa n'erirukwa rinu isiba eMitiro Yashurukara, abe isiba emaa a Ongo. Bushwa mbu entambi ebakwi basefukayo, ebabume n'ebomina batabinganiyo tu, ina basebeseyo buri bamaraika mu mbingu.» Na bushwa n'erifuka r'ebea mbi bakwire, mbeni mutungasomanga ebinwa bino mbi byakianga Ongo wabwire mbu: «Ani nge Ongo wa Iburahimu, na wa Isake, na wa Yakobo2.» Yesu were tubo mbu: «Ongo nti Ongo w'ebea mbi barikwa, ina iwe Ongo w'ebea mbi bashere.»

Ekikembe ch'ebea barekia barukira mbo, bashishara nguru bushwa n'ebinwa mbi byabesenga bihanange Yesu.

Emomba mukiri irenga eimpe

(Mar 12.28-34; Ruk 10.25-28)

eBafarisayo bakianga bamarukira mbu bwamakia Yesu wakamya eBasandukayo erote, batumana hima. Muhani uma w'eMyomba munkati n'eBafarisayo mbo wereka Yesu mbu: «eMuhani, kumunda n'eMyomba, mbeni uni momba nge mukiri irenga eimpe?»

Yesu wamusako mbu: «‹Wendi ushima Nyere kurinu Ongo mu mutima wabe uti, na mu myanikiri yabe iti, na mu bwenge bwabe buti3.› Uo nge momba mukiri nguru, na nge waroso. N'emomba w'emeta abi nao uri ho buri ngu waroso weba mbu: ‹Wendi ushima ngu uri kumushi nabe imbu bwishima ǒngo kisine4.› Emyomba ibi njo nge yakanda ebinwa biti byaandikwa mu Myomba ya Musa na mu Bitabo by'ebatahwa.»

Kirisitu nge mukwakare irenga Ndauti

(Mar 12.35-37; Ruk 20.41-44)

eBafarisayo mbo barekia bakutumana hima, Yesu washisha bo mbu: «Mbeni banu mwanikirange nki bushwa na Kirisitu? Kirisitu ngo, iwe musike wanye?» Nabo bamusako mbu: «Iwe musike w'emwami Ndauti.» Nampo Yesu washisha tu bo mbu: «Buni ke bwamukia Ndauti ngu wabesenga wenjiwange n'eMutima Washurukara, wabesenga ubikirange Kirisitu mbu Nyere kurwabo? Bushwa webanga mbu:

‹Nyere Kuritu Ongo werenga Nyere Kuritu mbu:

"Rika mu ruharo rwani rw'ekwabume,

ieya nambu buseria ani ebarenda babe

kumunda n'ebisando byabe5."›

«Kuba Ndauti ubikirange Kirisitu mbu: ‹Nyere Kuritu›, buni ketu bwamukia Kirisitu ngo wabese musikyae?»

Yesu wakianga wamakinda ieba mbo, ntíkwabesenga mwea uti-uti ngu wakochanga imusako kinwa. N'itukire mu matu ngo kusira tu mwea ngu werekanga imushisha kinwa.

Source notes (5)
  1. Footnote Soma Isub 25.5-6.
  2. Footnote Soma Ituk 3.6.
  3. Footnote Soma Isub 6.5.
  4. Footnote Soma Bar 19.18.
  5. Footnote Soma Sab 110.1.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.