Skip to content
BibleKenya

TRADUCTION BILBE EN KINYANGA

Yohana 15:13

Verse 13 is marked below, with the whole chapter around it. Read from the start

Yesu nge musabibu w'eriira

«Ani nge musabibu w'eriira, na Tita nge muhingi. Iwe ukeranga kira ntabi nji irikumunda nani inji itabutanga byuma. Ina kira ntabi nji ibutanga byuma, usarienga yo kongo yabuta tu byuma bingi. Banu ngie mumakinda ishuururwa bushwa mbu mumamisa ebinwa mbi ebyabwerenga ani. Murike kumunda nani, nani narika kumunda ninu. Entabi itamubuta byuma kuba ntiyarika mu musabibu. Ngebumbo hotu nabanu mutumukocha ibuta byuma kuba ntimurika kumunda nani.

«Ani nge musabibu, nabanu ntabi. Ewarika kumunda nani, nani kumunda nae wǎbuta byuma bingi, bushwa mbu kuba ntíniri ninu mutumakocha ironja kikai. Kuba emwea ntwarika kumunda nani, iwe uri buri ntabi eyatawa n'ikama. Esantabi esakama sisesonjiwa n'irekerwa munkati n'ekasha nato sǎshirira. Kuba murika kumunda nani n'ebinwa byani byarika kumunda ninu, mukuhema kiti-kiti echaraa mu banu, na mukuninkwa cho. Kuba mubuta byuma bingi, Tita wǎtatwa, nampo muriira mukubese banafunsi bani. Ebwanishima Tita, nani hotu nabushima. Murike mu nchimi njo. Kuba muronjange ebweba eMyomba yani, mukurika mu nchimi yani, imbu bukianga ani naronja ebweba eMomba wa Tita n'irika mu nchimi yae.

«Nibwirengi banu ebinwa bino kongo mu moa buri ani. N'erimoa rinu ribesi rikiri. Uno nge Momba ewabusiere ani: mushimane imbu ebwabushima ani. Kusira ingu uri na nchimi nkiri irenga emwea ngu ewasibura ebuingo bwae bushwa n'ebira bae. Banu bira bani, kuba muronja imbu ebubwerengi ani. Ntanga bubikira tu mbu banu bakori, bushwa mbu emukori watasibanga ebironjange nyere kurwae. Nibubikirange mbu banu bira bani bushwa mbu namabushea ebiti mbi ebyarukiranga ani kwa Tita. Ntíbanu nge mukunirondora, ina ani nge nakuburondora. Nani nabutuma mwendi kabuta byuma mbi bitasiriyo. Bushwa nancho Tita wasebuninka kiti-kiti nchi kisekonga banu mu rina rani. Emomba wabuninka ani nti ieba mbu mushimane.

Echuo chabaa Yesu n'ebanafunsi bae

«Kuba ebea b'echuo babubaa banu, musibanga mbu ani nge babuchanga inibaa. Kuba mumabesengi bea b'echuo kino, echuo chamubushimange, bushwa mbu banu bea bacho. Ina namaburondora ituka mu chuo kino, na banu ntí bea b'echuo kino. Bushwa nancho, echuo kino chabubaa. Musubukianga imbu bwabwerenga ani mbu emukori utamubese mukwakare irenga nyere kurwae. Kuba baninubyanga, na banu hotu basebunubya. Na kuba bakuronja ebweba ebinwa byani, baseronja hotu ebweba ebinwa binu. Ina basebukore banu ebiti mbi bushwa nani, bushwa ntíbosi ingu ewakunituma. Kuba ntameyange keba nabo ani kisine, batamubesengi na nsambi. Ina ke batakochi ituna esansambi sabo tu. Ingu wanibaa, wabaa hotu Tita. Kuba ntamuronjange munkati nabo mikorere inji itangaronjiwanga nompe mwea, batamubesengi na nsambi. Ina ke bamisungire yo. Akiro mbo banibaa ani, babaa na Tita. Ina bamaronja mbo, kongo ekinwa kino chabererera echaandikwa mu Myomba yabo mbu: ‹Banibaenga busa.›1

«Nasebutumire eMutima w'eriira ingu usebusake. eMutima ngo usesaire kwa Tita. Na usekiyayo weya, io nge usebese kariho kani. Nabanu hotu, mukubese ba kariho kani, bushwa mbu ngie banu muri hima nani itukire mu ntangiro.

Source notes (1)
  1. Footnote Soma Sab 35.19.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.