Skip to content
BibleKenya

TRADUCTION BILBE EN KINYANGA

Yohana 14:6

Verse 6 is marked below, with the whole chapter around it. Read from the start

Yesu nge inse yerienda kwa Ongo

Kuruma nampo, Yesu were ebanafunsi bae mbu: «Anga murukwa buhoro mu mitima, musimire Ongo, nani hotu munisimire. Mu numba ya Tita muri ndikaro singi. Ritamubesengi mbo, ntámubweringi mbu nenda ka buronjee ndikaro. Na namakindi iburonjee endikaro, nǎkuruka tu n'iburinga, kongo mpi hasebunduke ani, nabanu murike ho. Banu mosi ense y'ekwendange ani.»

Tomasi wamwire mbu: «eNyere Kuritu, ntítosi ekwendange ǒngo, mbeni buni nge bwasesiba bate ense?»

Yesu wamusako mbu: «Ani nge inse, eriira n'ekaramo. Emwea watameya kwa Tita kuba ntweta kuri ani. Kuba mumanisibange, mumasibange Tita hotu. N'itukire enompena mumamusiba na mumamusunga.»

Firipo wamwire mbu: «eNyere Kuritu, tushee Tita, burombo.»

Yesu wasako mbu: «eFiripo, namamana ninu matu mingi, nenki nt'unisiba ho? Ewamanisunga, wamasunga Tita. Bushwanki ǒngo webange mbu: ‹Tushee Tita?› Mbeni nt'usimira mbu ani na Tita mwea uma, iwe uri kumunda nani, nani kumunda nae? Ebinwa mbi bibwirengi ani, ntangeba byo mu bukwakare bwani kisine. Ina Tita ngu uri kumunda nani ng'ukorange emirimo yae. Munisimire entambi nebange mbu ani niri kumunda na Tita, na Tita kumunda nani. Kuba ntímbo, musimire bushwa n'emikorere yakuronja ani. Muriira nibwirengi mbu: kinsi ngu wanisimira waseronja hotu ebironjange ani. Waseronja hotu ebyarenga bino, bushwa mbu nendange kwa Tita. Nani nǎronja kiti-kiti kisekonga banu murina rani, kongo Tita watatwa ietere eMwana. Kuba mukonga kikai kiti-kiti murina rani, nǎronja cho.

Eriya r'eMutima Washurukara

«Kuba munishima, mǔranga eMyomba yani. Nani nǎkonga Tita wabuninke mutaberi umpe ingu userika ninu ematu ati. Nae nge Mutima w'eriira. Echuo kitamukocha imukoke bushwa mbu kitangamusunga na ntíkimosi. Ina banu mumosi, bushwa mbu uri hima ninu, nae uri kumunda ninu.

«Ntabusii buri nkubi, nǎkuruka tu kuri banu. Hasia ntambi nkeke echuo kitanisungi tu, ina banu mukunisunga. Bushwa mbu ani niri ho, na banu mukubese ho. Erotu ndo, mukuteerera mbu ani niri kumunda na Tita, nabanu muri kumunda nani, nani kumunda ninu.

«Ingu ewasimira eMyomba yani, nimisa yo, iwe ngwanishima. Tita washima ngu ewanishima, nani hotu nasemushima, n'ikwishea kuri we.»

Nampo mwanafunsi uma erinarae nge Yuta, ina ntí Yuta Isikarioti, wamushisha mbu: «eNyere Kuritu, mbeni buni nge busekwishea ǒngo kuri bate ina ntíkuri ebampe bea b'echuo kino?»

Yesu wamusako mbu: «Kinsi ewanishima wasesimira ebinwa byani. Tita wasemushima, na bate na Tita twǎkime kumunda nae n'irika kumunda nae. Ina kinsi mwea ngu ntwanishima, iwe ntwasimira ebinwa byani. Ebinwa mbi bibwirengi ani ntíbyani ina bya Tita ngu ewakunituma kuri banu.

«Namabwire ebinwa mbyo bushwa mbu nikiri niri hima ninu. Ina eMutaberi nge Mutima Washurukara ingu usekia Tita watuma murina rani. Wasebuhana ebinwa biti nibusubukia ebiti mbi byakubwire ani.

«Nabusiere buhoro. Nabuninka ebuhoro bwani. Ebuhoro buno ntíburi mbu butukange mu chuo kino. Angi murukwa buhoro mu mitima, na kiro musubaha. Mumarukira ebwamabwire ani mbu: ‹Nenda, ina nasekuruka tu kuri banu.› Kuba muriira mumanishimange, mumashimange murirukira mbu nendange kwa Tita, bushwa mbu Tita nge mukwakare inirenga. Namabwire ebiti mbyo nti tinensi byasaa, kongo byasekiyayo byasaa, mubesi n'erisimira. Ntebi tu ninu binwa bingi, bushwa mbu Mushumbu ewasimanire echuo kino weya. Ina iwe usira bukwakare bushwa nani. Ina echuo chakomenwa isiba mbu nashima Tita, na n'ironjange imbi byebanga we.

«Ngebumbo, musimane, tutuke hano.

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.