Skip to content
BibleKenya

TRADUCTION BILBE EN KINYANGA

Yohana 13

Yesu washua ebanafunsi bae bisando

Kwabesenga kwasia otu ruma kubusondori n'ekibimbi ch'ePasaka. Yesu wasiba mbu esantambi sae serituka mu chuo n'ikuruka Kwishe sa meya. Wabesenga washima ebea bae mbi babesenga mu chuo, na wáenderee ishima bo ieya na hende. Yesu n'ebanafunsi bae bakianga barengerange, Mushumbu wabesenga wamakinda ishooreshe Yuta musike wa Simoni Isikarioti mbu wasibure Yesu. Yesu wasibanga mbu Ishe wamaria ebiti mu bukwakare bwae, n'isiba mbu iwe kisine wákutuka kuri Ongo na wakuruka kwa Ongo. Nampo, Yesu wasimana ntibakiri barisange, wakungura enchangi nji yabesenga yambara we hiyo n'eimpe, wimina kitambara mu mangati. Kuruma nampo, waria mecha mu ntengi, n'ibucha ishua ebisando by'ebanafunsi bae n'ikono byo n'ekitambara nchi chakumina we mu mangati. Warekia weya hari Simoni Petero, Petero wamwire mbu: «eNyere Kuritu, mbeni iira ǒngo sondange nishua ebisando?» Yesu wamusako mbu: «Ntinensi uteerera ebironjange ani, ina uteerera byo kuruma.»

Petero wamwire mbu: «Anga, utunishui ebisando!»

Yesu wamusako mbu: «Kuba ntínakushua ebisando, nti tíukoane nani.»

Simoni Petero wamwire tu mbu: «eNyere Kuritu, kuti bumbo, kai angi nishua ho ebisando, ina nishue hotu n'emine hima n'emuntwe.» Yesu wamwire mbu: «Emwea ingu wamishua emubi uti, ntwarae tu mu kwishua, ina ebisando ho, bushwa mbu emubi wae nti wamashurukara. Na banu mushukara, ina ntíebati.» Yesu wabesenga wosi ingu wase musibura. Ngyasingwanga weba mbu: «Nti banu bati nge mushukara.»

Yesu warekia wamakinda ishua bo ebisando, wambara tu enchangi yae n'ikuruka tu hamesa. Were bo mbu: «Mbeni muteerera ebyamaburonjee ani? Banu munibikirange mbu ‹Muhani› na ‹Nyere Kuritu›, banu mwebange iira, bushwa mbu bumbo nge buri ani. Kuba ani eMuhani na Nyere Kurinu namabushua ebisando, na banu hotu mukomenwa ishuana ebisando. Ani nama bushea ho ebwamukia banu, na banu muronje ebwakuburonjee ani. Muriira, nibwirengi mbu, emukori ntímukwakare irenga nyere kurwae, abe ewakutumwa ntímukwakare irenga ewakumutuma. Bushwa mbu banu mosi ekinwa kino, mǔbese na nyomoro kuba muronja cho.

«Ntangeba bushwa ninu banu bati. Nosi mbi barondoranga ani. Ina rakomenwa ebinwa bino mbi ebyebwa mu Mitiro Yashurukara bi bererere: ‹Ingu eurisange hima nani wamanibunduke.› Nibwirengi banu ebiti bino nti tinensi byasaa, kongo entambi bisesaa, musimire mbu ‹Ani nge niriho.› Muriira, nibwirengi mbu: emwea wamakoke ewatuma ani, wamǎnikoke hotu. N'emwea ingu wanikoke, wakoke ingu ewakunituma.»

Yesu wakianga wameba ebinwa mbyo, warukwa buhoro mu mutima, weba mbu: «Muriira nibwirengi mbu uma winu wanisibura.»

Yesu weba mbu Yuta wasemusibura

(Mat 26.20-25; Mar 14.17-21; Ruk 22.21-23)

Ebanafunsi bakayane, bushwa mbu ntíbasibanga kuba Yesu webange bushwa nanye. Uma mu banafunsi bae wabesenga warika kwihi nae mu ntambi yeririsa. Emwanafunsi ngo, Yesu wabesenga wamushima nguru. Simoni Petero wasime emwanafunsi ngo mbu washishe Yesu kuba webange bushwa nanye. Nampo, emwanafunsi ngo wiseke kuri Yesu n'imushisha mbu: «eNyere Kuritu, mbeni inye?» Yesu wasako mbu: «Naserubie chunda cha mukati. Ingu waseninka ani cho nge uo.» Nampo, Yesu warubie echunda ch'emukati ncho nininka cho Yuta musike wa Simoni Isikarioti. Yuta warekia wamatinge echunda ch'emukati ncho, Mushumbu wamukime mo. Nampo, Yesu wámwire mbu: «Ebisondange ironja ǒngo, ronja byo tete!» Kusira mwea mu mbi babesenga barisange ewasibanga kuba Yesu wamwire mbo bushwanki. Bima bahakanga mbu Yesu wamamwire mbu wendi kachura ebikai mbi byabesenga byarae mubo mu kibimbi, abe wendi kasake ebasene, bushwa mbu Yuta ngwabesenga uranganga enku y'ebehe.

Yuta warekia wamatinge echunda ch'emukati ncho, hiha-hiha wasaa hambuka. Ebutu bwabesenga bwamasira.

eMomba mushasha

Yuta wakianga wamasaa, Yesu weba mbu: «Eo, eMwana w'eMwea wamatatwa. Na Ongo wamatatwa bushwa nae. Na kuba Ongo wamatatwa bushwa nae, ngebumbo Ongo nae wasetata eMwana ietere iwe wisine, nae watasii murimutata. Ebana bani, nikiri hima ninu mu ntambi nkeke ho. Mǔnisonda, ina itukana nambu bwakukia n'ere eBayuta, na banu hotu nibwirengi mbu mutukochi ieya impi hendange ani. Nabuninka momba mushasha: Mushimane banu mu banu. Imbu bwabushima ani, na banu mushimane hotu bumbo. Ebea bati basesiba mbu banu banafunsi bani, kuba mushimana banu mu banu.»

Yesu weba mbu Petero wǎmutuna

Simoni Petero wamukonga mbu: «eNyere Kuritu, mbeni ǒngo wendange kuni?»

Yesu wamusako mbu: «Utumukocha inimisa ekwendange ani, ina unimisa kuruma.» Petero wamushisha mbu: «eNyere Kuritu, kinki chamusingwa ntakumisi? Ani nasimira isibura ebuingo bwani bushwa nabe!»

Yesu wamusako mbu: «Mbeni iira usimira isibura ebuingo bwabe bushwa nani? Muriira nikwirengi mbu: kubusondori enchongore nensi ntyabikira, ukubese nt'umanituna meta ashatu.»

TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.